Calide Venus

Venus brilla como

un lanterna lontan

que incanta e voca

e me face suspirar

Io vole ascender

del grave terra

jacer me trans frigide

vacue spatio

sapiente que valente

io lo sustenera

reinfortiate del sperantia

del calide Venus

qui me caressara

con luce teneremente

quando io un die

planara a su suave

campo de gravitation

pro durante eones

remaner su satellite

Le universo comenciava un jovedi

Le universo comenciava
     un jovedi, postmeridie
          dece-tres comma septe
                  milliardos annos retro

                  Isto occurreva
                  subito, imprevistemente                      
                  primo un fluctuation
                  del quanto in le vacuo 
                  e postea un rapidissime
                  silente expansion

                  Quarks e gluones,
                              memora vos iste tempore
                                            quando vos era
                                                         calide e libere?

                                                         Isto era ante
                                                         que vos era frigidate
                                                         e incatenate
                                                         in captivitate    

                                                         durante le inflation
                                                                   initial quando le spatio
                                                                              expandeva in quasi
                                                                                            perfecte symmetria

                                                                                            e in un fraction
                                                                                            del secunda deveniva
                                                                                            dece al vinti-octave
                                                                                            potentia vices
                                                                                            major que su
                                                                                            grandor initial

                                                                                            Ma in iste symmetria 
                                                                                 se dispersava fluctuationes:
                                                                     iste semines
                                                            del futur structura cosmic

                                                           Le quarks deveniva
                                                           hadrones, leptones
                                                           e postea atomos

                                                           e le materia continuava
                                                 expander a un altissime
                                       velocitate pro plenar
                               le vacuo con spatio

                               Le resto es,
                               como on dice,
                               historia:
                               nebulosas, stellas
                               e galaxias nasceva

                               Ma nihil pote
                    esser comparate
         con le prime
tempore del pioneros

Ergo, le jovedi veniente:
que nos toasta
in Champagne!

Festina lente

Festina lente

malgrado le ardente

foco in tu mente

tu te debe relaxar

Tu debe respirar

e nunquam lassar

l'insanitate triumphar

sur le vita preciose

Le vita amorose

vermente valorose

tu es talentose:

viv' in le momento!

Senti como le vento

te caressa tanto

como angelos cento

e un sur un campo

Amor Secrete

Io cammina in le jardin de amor

plenate con rosas rubie e rosee

Le murmurante musica del rivo

caressa le folios del orangieros

Io reveni pro vider te ancora un vice

proque ci le futuro incontra le passato

e le dulce fragrantia del rosas

preserva sentimentos eternemente

Vade con me in le verdura un momento

io te vole monstrar le frambesieros

poner un baca sur tu molle labios

e aperir los con un tenere basio

Solo ci nos pote esser insimul

nostre amor es secrete, celate del mundo

con corde pesante io lassa le jardin

ma le proxime vespere io certo revenira

Incognite dormitor

Neonate ex un sonio
ma qui es le dormitor?
Mi oculos ancora
son celate

Quando io morira
al sonio sequente
pro esser imbraciate
per le manos torpide
del incognite dormitor?

Amor e poesia

Io plena mi vita

con amor e poesia

finalmente io trovava

mi proprie via

Io plena mi dies

con le lingua belle

que flue del bucca

como dulce melle

Io es Io

Io es Io

Le luna plus proxime a Jupiter

Prestressa de Hera in Argos

e amante passionate de Zeus

Europa, Ganymedes e Callisto

son mi fratres e companiones fidel

Plus que quatro milliardos annos

Io torna circum le magne planeta

ma solo quatro centos annos retro

le prime vice un homine me videva:

Galileo spectava mi superfacie jalnastre

con su nove telescopio ameliorate

Jove me trahe con fortias enorme

e causa chaos in mi interior

provocante mi vulcanos contate in centenas

a furiosemente jectar via columnas de sulfure

e un poco de iste materia

dispare al vacue spatio

Vita, felicitate e lucto

Tote le beltate, toto lo que es amate

toto lo que nos guarda in le corde

un die se finalmente disaggregara

rumpera, morira e nihil devenira

Sed anque le fede e repugnante cosas

que appesta le aer que nos respira

equalmente al fin sera destruite

e dunque le Homine con le Falce es juste

Toto ha su comencio e toto ha su fin

ma nos non besonia portar le lucto

pro que omne die es un dono auree

que nos pote plenar con significantia

Nos pote gauder nos del dies insolate

e le compania del personas qui nos ama

e quando dolo e infortuna nos colpa:

indurar lo con patientia e cognoscimento

Cognoscimento del facto que felicitate

e lucto seque le un le altere

como nocte seque die in le vita

ubi non existe placer sin dolor

Tu Buddha interior

Cognosce tu Buddha interior

Senti su fortia pacific

e calme facultate

Lassa su respiration

devenir anque le tue

Lassa su compassion sin limite

plenar omne tu arterias

e irrigar via dolo e desperantia

como un fluxo de primavera

que porta via brancas morte

e lava munde le petras del plagia

Cognosce tu Buddha interior

Ille es un pluvia refrescante

durante le calide passion estive

Ille es le aqua transparente

in le lacos de tu pensatas

Ille es le celo clar

sur le sentieros labyrinthic de tu memorias

Cognosce tu Buddha interior

Ille es tu e tu es ille

Ille es tu natura intrinsec

e le objectivo que tu mesme non sape que tu cerca

quando tu sin reposo vade

del die a vespere a nocte a matino

Cognosce le - e trova pace

Caudas de fumo

Aves de foco

transversa le celo clar

e lassa post se

caudas de fumo

que crucia le un le altere

e se extende al horizonte

Lentemente le fumo

se dissolve e deveni

plus e plus simile a nubes

Succo dulcissime

Suave fructo de passion

imbraciate de mi palmas tremulante

dulce guttas cade a mi lingua

Dur e molle

Si tu vole trovar le via ver

como le tortuca

tu debe trovar le balancia

inter lo que es dur

e lo que es molle