Dec 28, 2012

Duo-itude

Nostr' amor va durar
proque illo es erigite
al fundamento stabile 
del amicitate

Quand' le passion passara
remanera nostr' amor
e si l'amor passara
remanera l'amicitate

Nos ha tante respecto
e comprension inter nos
incontrante in harmonia
in gaudio e riso
nostr' animas trovava 
un lingua mutual

Yo rejecta le sol-itude
in vice preferente
duo-itude con te
e mult-itude con nostre 
infantes futur

Si nos primo imbracia 
le un le altere
nos postea potera 
imbraciar le mundo
vadente insimul 
nos sentira
que le carga del vita 
sera plus legier

Nostr' amor es mi joia
mi joia es mi fortia
e mi fortia yo divide 
con te pro facer 
l'amor continuar 
crescer

Dec 26, 2012

Le placide delecto del amor


Como yo pote dicer te
quanto yo te ama
quando le verbos manca a me?
Yo intona un canto sin parolas,
crita con dolor in mi languimento
ride, plora, sentiente e pena e joia

Ma quando le tempesta ha passate 
veni le calma

Nos nasce de novo cata momento
le amor arresta le tempore
e yo reposa in tu bracios
in un eterne, calde nunc

Nos reposa in le amor
intra illo nos trova pace
le inamoramento es un tornado
ma in le oculo del tempesta
regna le placide delecto del amor

Dec 25, 2012

Vino rubide como sanguine


Tu surriso funde mi corde
e tu oculos funde mi spirito
Io es transformate a vino 
rubide como sanguine
que flue a in un calice auree

Tu duce le calice a tu labios
e bibe le vino rubide
Io afflue in te,
e me uni con tu corpore

Le battimento de tu corde 
me face fluer
a omne tu venas
Io senti tote tu corpore
e tu me senti intra te

Dec 22, 2012

Le harpa



Io es un harpa
e tu dece digitos
caressa mi quaranta-septe 
cordas crystallin

Legiermente inclinate a tu spatula
io audi como tu canta silentemente
e responde con tonos delicate
que plena le camera 
como dansante scintillas

Mi cordas vibra con emotiones
e le musica te face tremer
profundemente respirante 
con oculos claudite 

Sona nostre musica omne vespere
que illo nunquam mutescera
Que illo plenara le mundo 
con su harmonia clar
e donara a omnes 
felicitate e pace

Dec 12, 2012

Le luce del alba


Nostre amor es como le luce del alba
illo crea le matino del nove spero
Le spero de un longe et insolate die
plenate de gaudio e riso de infantes

Quando le luce del aurora dispersa
l'obscuritate del firmamento
le nubes son colorate in rosee e rubee
omne l'aves canta e lauda le victoria del lumine
e le helianthos aperi su folios

Como le beltate del aurora
nostre amor es un miraculo del natura
un dono que cresce
ab le fundamento del existentia


Dec 9, 2012

Le angelo


Io errava in le Valle del Umbra Mortal
le via era obscur, le mente sombre
le joia disparite e le spero moribunde

Sed tunc le celo se aperiva
e in un gloria de lumine un angelo se revelava:
illa surrideva et extendeva su mano a me

Nos planava in alto trans le spatio, mano in mano
le planeta blau se diminueva sub le pedes
Le universo se aperiva ante mi oculos
plenate de milliones de soles

Illa me duceva a su celeste habitation
tanto distante sed totevia tan proxime
Illa me offereva the del Tulsi
e le plus dulce coco con persicas

Quando nos reveniva le Valle del Umbra Mortal
era transformate ultra recognition
le sol habeva apparite
e le via nunc era clar e lucente

Le joia reveniva e le spero viveva
io continuava vader con legier passos
e al fin del via ancora attende
mi angelo amate, belle e resplendente

Dec 7, 2012

Le dono


Io prende tu mano
e nos vade insimul
a un jardin florante
Le rosas benedice nostre amor
con lor fragrantia magic
e le vento caressa nostre facies
jocosemente e teneremente

Pois que nos nos ama
nihil es impossibile
assi io prende
vinti-un parve stellas
ex le firmamento scintillante
e mitte los a un catena
le qual io pende a tu collo

Porta iste collar con joia!
Su lustro va calefacer
tu benigne figura
e monstrar al mundo
que es io qui te ama

Dec 5, 2012

Aurora del amor


Io me evelia
-nunc es le aurora del amor
io face le reverentia a illo
con un salutation del sol
Un nove die ha arrivate
a un nove mundo
proque amor renasce toto

Deo es le fonte del amor
ma hic in le terra
nos lo incontra
in nostre spirito affin

Oh, tu mi spirito affin,
finalmente io te trovava
nos ambes ha cercate in van
usque iste die

Quita tu timor,
quita tu dubitas,
prende mi mano extendite!
Io sape que in realitate
tu senti lo mesmo
proque le amor in tu anima
radia trans tu oculos

Dec 4, 2012

Le campana Tibetan


Tu caressa le campana de laton
e illo sona in tu manos
le tonica superate
del spectro magic del harmonicos

Le sonoritates ancian de Tibet
transloca nos al scarpas del Himalaya
In le insondabile vibrationes
habita le celate sagessa del Buddha

Le tono continue e hypnotic
nos prende via ma anque coalisa
con bodhisattvas surridente qui inflora
nostre via con lotos rubie


Dec 3, 2012

Mi amico le Luna


Io confideva al Luna
quanto io te ama
proque le Luna es mi amico

Illo me accompania
durante insomne noctes
quando io pensa a te

Le luce del Luna non es su proprie
Illo reflecte le lumine solar
ma iste nocte illo brilla tanto clarmente

proque su reflexion es fortificate
per mi reguarda amorose
plenate del lumine de suspiro

Dec 2, 2012

Puera furtive


A ubi vadeva
le dulce puera?
Illa prendeva mi corde,
solo mi corde,
e dispareva al nocte

Forsan ora illa sede
presso le foco del campo
e caressa teneremente su captura
ascoltante le surdinate guitarra
e le lamentante violino

Forsan illa continuava su viage
trans paises lontan
con su preda in le sacco
pro cercar felicitate
in le regno al fin del horizonte

Dec 1, 2012

Patientia



Mi amor pote vincer
super omne l'obstaculos del mundo
assi como le sol primaveral
funde tote le nive hibernal
Si, como le sol del ver
illo face le folios crescer
e le flores comenciar su florimento

Le Vita me insenia patientia
illo proba le veritate 
de mi sentimentos
Io va monstrar
al Vita et a te
con cento cantos amorose
e mille devote poemas
mi pur honestitate

Mi amor es sincer
e illo es durabile
io va attender
le tempore necessari
Como un amico
io vadera presso te
ma in le anima io porta
le myosotis de suspiro 
que un die eveliara
le lucentia de tu corde


Nov 23, 2012

Que gaudio!

Finalmente nos exi!
Io senti le aer fresc,
inhala le mixtura
de fragrantias fascinante
trans mi humide nares,
seque un odor
al latere del cammino,
ma le dama me retene

Nos attinge le prato
Io es liberate del collar
e comencia saltar
inter flores e insectos
con lingua agitante
Que gaudio! Que gaudio!

Nov 22, 2012

Le aves


Le aves son mi amicos
illos sede in le arbores
e pipa a me
re celos e nubes
campos lontan e dense silvas
parve lacos e vaste mares

Forsan, in un vita passate
io era un de illos
volava con illos
cantava con illos
le plus belle melodias del natura

Le aves
- le alate choro del verde paisages
pro sempre sera mi amicos

Nov 21, 2012

Parve cosas


Le optimista pessimistic diceva:
gaude te al parve cosas
proque le grande cosas solo significa problemas

Nov 19, 2012

Le voce que ha mutescite

Io es calme al superficie
e non pote incontrar 
mi sentimentos justo nunc
si le plorar venirea
illo serea infrenabile
ma isto occurrera un altere vice,
quando le homine con le falce 
ha disparite detra le horizonte

Le telephono non plus sona tanto sovente
Io pensa del voce que ha mutescite
durante que io perspice le cosas que remane
le majoritate va esser jectate via 
ma certe cosas io vole conservar

Le penna es mi amico
Le papiro es mi amico
Illos me adjuta plenar le vacuitate
con le litteras, le parolas
e le lingua que io ama

Nov 18, 2012

Le grammatica irregular del vita

Apprender le grammatica del vita non es facile
frequentemente on incontra
declinationes irregular et exceptiones
le quales barricada le via
e solo pote esser removite
per imperativos plenate con invectivas

Guai! Iste verbos que son declinate secundo
persona, tempore, temperatura,
phase lunar e grandor del scarpas
e in le forma passive pende
como discolorate, humide vestitura ponite a siccar

E omne iste cacographos
que non potte ortoghrapiar...
como les castigara Le Grande Grammatico
pro su transgressiones?
Forsan con le cruel foco del analphabetismo?

A vices nos incontra decisiones difficile:
qual preposition es le correcte?
Un sol parola erronee
pote destruer le senso del vita
o in le pessime caso, le senso auditive

Que fortuna que nos ha LE LIBRO
ubi le grammatica del juste vita es declarate
Le sol problema es que mi amico con le barba
ha un altere libro de grammatica
e su lingua es inintelligibile

E que responder a iste insolente juvenes
le quales parla un lingua multo peculiar?
Impertinentemente illes dice:
"Aŭdu, dandaĉo, vi devas kompreni ke vi
ne kaptas la babiladon.
Iru hejmen kaj kombu vin..."
Como illes osa parlar in iste maniera
a un persona suffrente de alopecia?

Nov 13, 2012

Nos non es sol


Sonoritates xenophonic
Musica extraterrestre
Un radio-telescopio ha recipite
signales inexplicate

Qui canta a nos trans
spatios interstellar?
Qui sona instrumentos
nunquam audite?

Le melodias enigmatic
evelia phantasias hallucinatori,
molle sonios illuminate
del ballante radios jalne e rubie
ex soles cunante le imagination
de nos, pavide terranos

Un voce estranie dice verbos
articulate per un longissime lingua
e labios tense et oscillante
vocales profunde e clause
triphthongos acrobatic
parolas indistinguibile
intensivemente stupefaciente

Nos non es sol
le vita profita inter stellas
intelligentia habita le galaxias
e si communication lingual
non functionara
nos communicara mathematicamente
sur un base de constantes physic
-le lingua universal

Nov 12, 2012

Le ave del morte

Le ave del morte faceva un visita
al medio del nocte
illo veniva volante sin sono
con becco acute e oculos vacue
pro aveller un vita
calmar le fortiate respiration 
del tormentate corpore
e postea, con un colpo del alas
disparer sin tracia 

Nov 9, 2012

Aqua oceanic


Que dice le aqua oceanic
que unda post unda
lava nostre litores

...del animales marin
le quales illo ha sustenite e caressate
durante milliones de annos?

...del forte ventos
que sempre agita le superficie
ma nunquam disturba
le profundos pacific?

...de su evaporation,
migration trans le celo,
cadita sur montanias
e finalmente le retorno con fluvios
a su origine?

Descende al aqua
e nata via
lassa le sagessa del oceano cunar te
usque a tu te uni con illo
e postea,
transformate,
reveni al terra firme

Nov 8, 2012

Appello constructive

Alcunos construe e alteres destrue
Al longe - qui vincera?
Si le fortias constructive,
nos omnes sera vincitores,
si le destructive:
perditores

Esque compassion superara indifferentia
o va avaritia ruinar le senso de responsabilitate?
Esque amor substituera le guerras
o va fame de poter manducar le amicabilitate?

Non solo le mie es le decision
e non solo le tue
ma nostre commun
Io prendeva le mie pro inspirar te a le tue
e postea nos potera inspirar alteres

Nov 7, 2012

Anima fraternal


 Reguarda mi facie
Vide tu le tracias del lacrimas sur mi genas?
Si tu vole vider mi beltate
tu non pote evitar vider mi dolor

Esque tu vide tu reflexion in mi oculos?
Pote tu recognoscer
tu anima fraternal?
Ha nos vadite sur le mesme sentieros?

Tu vide le surriso sur mi labios
illos tosto te contara
del sentieros que finalmente duceva al gaudio

Nov 4, 2012

A mi granmatre

Tu me manca
e totevia io te memora tan vagemente
Tu deperiva,
lassava sempre minus tracias in le vita

Io reguarda photographias
que te monstra como juvene
Tunc io te non cognosceva

Tu amor era tanto intensive,
nos parlava omne le dies,
sovente io te visitava
post que tu habeva quitate le mundo
e remanite in tu quiete camera

Ha tu disparite eternemente
o continua tu vita
in un mundo invisibile 
plenate de lumine?

Ha tu devenite cinere
o ha tu reganiate
le beltate del juventute,
e del immortalitate?

Oct 29, 2012

Le catto del poeta

Le catto del poeta sede al tabula
e specta pensivemente le ballo del penna
in le vacillante lumine del candelas
Le poeta erra in le mundos de phantasia
locos distante de beltate extra-mundan
ma le catto es justo ibi:
al tabula, presso le candelas, le penna, le libro
e le poeta, qui incessantemente gratta le folios,
e illo ronrona contentemente con semi-claudite oculos

Oct 19, 2012

Le Montania



Le Montania - le mute gigante prehistoric
que lentemente se levava ab le oceano
centos de milliones annos retro
attende me detra basse arbores

Tosto io va ir in alto
sur acute petras coperite de lichen
inhalar le tenue aer fresc
con cata passo plus proxime al nubes

Parve pinos torquite per le vento
que ha indurate le climate durante seculos
indica le via con semi-calve brancas

Le summitate del montania me sporona, attrahe
ma finalmente, quando io lo attinge
io vide ancora un, plus alte, summitate
a distantia de cento metros, ultra un abysso

Io reguarda circum me, explora le largos
mi vista attinge plure kilometros
nulle homine, nulle automobile
Durante un momento le vento es calme

Post un camminata de plure horas - un plateau
e hic il ha un laco - mille metros super le mar
ubi le phalaropo, philomaco e sterna arctic habita

Presso le laco il ha un cabana de ligno
hic migratores pote pernoctar
trans le fenestra io vide cibo sur le tablo
ma continua vader, sin reposo

Io trova un petra con tracias de undas
que era create quando iste monte scandinave
nove-cento milliones annos retro
se trovava al fundo de un mar equatorial

Le montania possede un sagessa que solo
pote esser apprendite per illos que lo ha scalate
attentemente marchate sur nive e roccas
e contemplate su aspere beltate

Oct 18, 2012

Le mundo del caffe


Da me un espresso
e io me eveliara
Da me un duple espresso
e io te intertenera durante un hora
Da me un triple espresso
e nihil sera impossibile pro me

Versa lacte calide in le caffe
e io es transferite a un café in Paris

Sapora lo in vice con Whisky
e io sede in un pub in Dublin

Remove le caffeina e dilue con aqua
e subito io es in un coffeehouse in Nove York

Lassa le residuo e adde sucro
e io me delecta del alba a un balcon in Istanbul

Lassa le granos esser fermentate
in le intestinos del Paradoxurus hermaphroditus
e quando illos ha exite io te pote offerer 
un exclusive tassa de Kopi Luwak

Oct 14, 2012

Le beltate de pi



In le perfecte curvatura del circulo
nos trova eternitate
on pote sequer lo
circum, circum, sin limite
ma quanto plus longe
de su diametro es su circumferentia?
3,141 592 653 589 793...
...le decimales continua sin fin
Como pote un forma tanto simple
continer tal complexitate?

On ja ha calculate
usque a plus de dece trilliones decimales
Quante plus sera trovate?
Si omne le computatores del mundo
cercarea e registrarea plus de decimales
illos gradualmente plenarea su discos dur
(con un capacitate de plure milliardos de terabyte)
con un singule et unic, longissime serie de cifras,
sempre variate, vaste, immense,
con plus de cifras que il ha stellas in le universo
ma parturite de un simple circulo

Io transforma pi in musica
que nunquam sera silente
e que con patientia cuna le mente a
in admiration beatific
super le beltate del mathematica

Oct 12, 2012

Le partita



Le transporto eterne attende
io prende un photo del vascello
le section auree ha ponite
 su marca al construction

Tosto illo partira,
le fatigate massas sede
ante lor schermos pulverose
reguardante le partita 
Triste e abandonate
lor cameras celate in armarios:
manca cosas que illos pensa 
mere esser photographate 

Ma le passageros del aeronaves,
in cammino al vascello
jam in orbita e con motores
ponite in marcha, 
omnes ha cameras circum lor collos

Oct 11, 2012

Le ultime halitos

Illa respira
ma non pote eveliar se plus
Illos dice que solo resta
horas o dies ante...

Io senti timor de esser ibi
quando illa cessa respirar
pro de facto vider le morte
tanto proxime

Io trova consolation 
in su placide facie
et exi del camera sapente 
que forsan io la videva vivente
le ultime vice

Oct 10, 2012

Question difficile

Es melior haber regulas
le quales on disobedi
o non haber regulas del toto?

Oct 9, 2012

Ride o mori!

Io pensa:
ride o mori!
Prende le vita legiermente 
o preoccupa te usque al morte

In le medietate del difficultates 
io activemente cerca le gaudio
non como intertenimento 
ma como therapia

Io ride hodie 
proque deman me attende lacrimas
Le ephemere tragicomedia del vita 
me amusa et espaventa 
Iste vita que es un dono provisori
e a vices pote dar
momentos de satisfaction

Io recipe con gratitude 
le donos de joia rar
e surride pro alleviar le dolor

Oct 8, 2012

Rumpite symmetrias

Al fin le circulo io sequeva
le prime io esser voleva
entrava in rumpite symmetrias
belle e terrific anomalias

Un perpetuum mobile io construeva
e lo arrestava quando satis habeva
de su ruito que vermente era terribile
e faceva mi vita insuffribile

Le tempore me videva e voleva fugir
al pais ubi le nocte se pote aggrandir
ma illo in un coffro era confinate
e ibi remanera un eternitate

Oct 5, 2012

Sonios intra sonios


Trans le sonio 
io audi musica

errante preter 
diffuse cameras
 io trova le radio 

ma le tonos
non deveni plus forte 
quando io me 

approxima

Io lo arresta 
ma le canto continua

lo que me face 
comprender

que le melodias 
afflue ab un altere 

sonio

le qual io tosto 
de novo 

soniara

Oct 3, 2012

Sperantia de eones auree

Vetere es le mundo
e nos es juvene
parve infantes
comenciante jocar
le mundial tragedia
e le cosmic comedia

Nos veniva e nos vadera
como le dinosauros ante nos
ma le globo sur le qual nos cammina
in comparation es sempiterne

Forsan adjutate
de technologia genial
nos attingera immortalitate
e quando nostre corpores morira
le mentes va superviver
in computatores quantic
e quando nostre sol morira
nos viagiara ad altere stellas
in naves spatial al velocitate del lumine

Ma ora nos es ancora infantes
e si nos jocara prudentemente
nos attende eones auree
e le aperte via lactee 

Oct 1, 2012

Sphera de vitro


Ille es un sphera de vitro
transparente e perfectemente symmetric
qui plana al longe del stratas
et emana tonos crystallin
como de un harmonica a vitro:
quintas, quartas a tertias pur

Ille vide omnes ma omnes le non vide
Ille es quietude e harmonia
logica e perfection
incapabile de transformation
o deterioration

Su die natal es incognite
e su transpasso improbabile
nam que poterea exhaurir o nocer
un globo de vitro
al limite de un altere dimension
sojornante apud illos qui es imperfecte?

Sep 11, 2012

II

Espaniol - tu lingua forte e orgoliose
que flue presto ab buccas fervente
nunc claccante como castaniettas
e nunc tenere como le tonos del guitarra

Sep 10, 2012

III

Portugese - le clemente soror de Espaniol
sensual, molle e caressante
Durante le die tu es gaudiose como un samba
ma al vespere inveloppate in fado melancholic

Sep 9, 2012

IV


Italiano
- multes lauda tu beltate
que ha maturate insimul 
con dulce fructos
calefacite del sol e caressate 
de suave cantos
que ha echoate 
in belle cameras e salas,
plenate de obras maestral 
del historia del arte,
e in culinas con fragrantia 
de frutti di mare, 
e della terra

Sep 8, 2012

V

Francese - tu es un dama belle
tu surride seducente e sensualmente
me trahe a un café ruitose
pro discuter litteratura, arte e musica
e postea, al nocte: l'amour physique

Sep 7, 2012

VI

Anglese - tu fascinante mixtura romano-germanic
dispersate trans le mundo de duo imperios
esque tu remanera un permanente lingua mundial
o essera replaciate de...?

Sep 6, 2012

VII

Interlingua - tu es le essentia del latino moderne
e porta tote su beltate
Scientificamente fundate e con potential litterari
tu deveni le anima commun del linguas romanic
e un clave a scientia e cultura

Sep 5, 2012

VIII



Chinese - idioma de dynastias ancian
cantabile, multisense e poetic
tu conta historias del idyllio e del joia
miscite con battalias cruel
demandante un talento pro tonos
e un mano artistic pro notation juste

Sep 4, 2012

IX


Germano - tu grande e forte idioma
tu parolas era usate de guerreros brutal
ma anque de Goethe, Heine e Mann
qui los eveliava al sphera sublime

Sep 3, 2012

X

Russo - tu murmura como le aqua fresc de Volga
e del village e del agros on audi tu voces cordial
In le vespere tu canta accompaniate del guitarra con septe cordas
e caressa fatigate mentes e porta a illos dulce sonios

Руссо - ту мурмура комо лэ акуа фрэск дэ Волга
э дэл вилладже э дэл агрос он ауди воцэс кордял
Ин лэ вэспэрэ ту канта акомпанятэ дэл гитарра кон сэптэ кордас
э карэсса фатигатэ мэнтэс портантэ а иллос дулцэ сонёс

Sep 2, 2012

XI

Polonese - tu es le canto del silvas e pratos
e sibila como un vento que cuna le grano
crepita como le folios a un promenada autumnal
susurra como le apes inter flores plen de colores
vade furtivemente como un agile catto
trans le dense arbustos del phonetica

Sep 1, 2012

XII

Svedese e norvegiano - le sorores scandinave
ride, canta e lassa su blonde capillos
flottar liberemente in le vento fresc montaniose
Su gaudiose voces se misce con le sono del undas
presso fiords e archipelagos idyllic
  

Aug 11, 2012

Kalena


Sonos ab suave sonios susurra
sensibilemente como tenere mimosas
Verbos venerabile veniente con ventos
caressa le calide corde de Kalena

Que dice le dulce dactylos derivate
ab emotiones elevate al eterne beltate?
Forsan que vita es un fabula fascinante
cantate per Kalena con le capillos crystallin

Aug 10, 2012

Pantheos

Pantheos
sacre totalitate
anima del natura
sempiterne movimento

Tu es le ardor
gaudio e inspiration
dispergite ma anque
condensate in nostre mentes

Tu es le stellas
e le reflexiones in le aqua
le nebulas galactic
e le nubes atmospheric

Tu non ha un nomine
ma homines te ha appellate
in multissime manieras
limitante lo illimitabile

Pantheos
spirito de omnes
que tu sagessa intrinsec
se eveliara in le humanitate

Aug 9, 2012

Odores et aromas

Le odores te tormenta, a ubi tu escappara
in un mundo plenate de putor?
Ubi tu trovara un jardin, un refugio
un loco aromatic que calmara tu sensos?
Forsan tu pote sentir le fragrantia de mi amor
que porta un aroma de chili e cannella
le placide passion que te vole dar felicitate
inveloppar te in perfumos seren
et expeller cata tracia de fetor

Aug 8, 2012

Nubes sin umbras



Beltate extra-mundan
radia ab le fundo del anima
un lumine enigmatic
tanto tangibile pro le emotiones
e tan inexplicabile pro le pensatas
Calme joia, gaudio inexpectate
plena le angulos del camera
e alora veni le visiones:

Castellos radiante, silvas magic
le celo illuminate del luna, pontes de auro
basse e forte tonos ex cornos de bronzo
echoa inter montanias
con un altitude que supera le nubes

nubes sin umbras

Le monachos recita su mantras ancian
e in le fenestras del monasterio tintinna
multe parve campanas de crystallo

Io cammina in alto del plus grande montania
mi via es circumferite de arbustos fragrante
e finalmente entra in nubes que porta le somno
que nos evelia a un realitate incognite

Aug 7, 2012

Menses illogic

Le nomines del menses son illogic:
Septembre non es le septe mense, ma le none
Novembre non es le none mense, ma le dece-prime
Octobre non es le octave mense, ma le decime
Decembre non es le decime mense, ma le dece-secunde

E que face le deos roman
Janus, Februus, Mars, Maiesta e Juno
e le imperatores Julius et Augustus
in nostre calendario?
Omnes anque sape que
non ubique le buttones se aperi in april

Secundo le logica le menses deberea esser:
Primembre
Secundembre
Tertiembre
Quartembre
Quintembre
Sextembre
Septembre
Octobre
Novembre
Decembre
Undecembre
Duodecembre

Ma pro nos homines illogic
isto causarea multo confusion...

Aug 6, 2012

Le machineria

Le rotas debe revolver
le trainos debe ir
nos omnes son parve vites
in le machineria
alcunos son mal fixate
alteres cade via
ma son tosto reimplaciate
de substitutos

Ma gradualmente
le velocitate decresce
Le grande machina es fatigate
illo habeva satis de oleo
e ha masticate troppo de carbon
Illo reguarda a retro
e vide altere machinas
le quales reduce le avantia
preste a continuar le cursa

Aug 5, 2012

Le cerca


Io cerca un homine
qui cerca un homine
sufficientemente perdite pro vagabundar
ma con un bussola in su mano
pro al fin trovar su domo
e in le altere mano: un libro
con multe sage parolas
anque illo un bussola, pro le spirito
Io cerca alcuno qui vole audir
quando io narra lo que alteres me contava
e assi prolongar le vita del historias
facente circulos clauder se

Aug 4, 2012

Io spera e ama


Credentia, spero e amor:
le nucleo del christianismo
Io ha essayate fervidemente
ma io non pote creder
Totevia io spera e ama
e meravilia super le tremende
enigma del vita

Aug 3, 2012

Io prefere le gaudio

Le dolor es un via trans le lucto
le lucto es un via ultra le dolor
In le oculo del tempesta es tranquillitate
In le medio del inquietude es calma
In le centro del impotentia es fortia

Io permitte me mesme a sentir joia
malgrado de mi hospite, le lucto
Io invita le benesser
quando le dolor dormi un momento

Su vita es finite ma le mie continua
Io vole prender cura de su memoria
ma al mesme tempore proceder

Aug 2, 2012

Inexplicate

Illo levita al longe de figuras symmetric
ma exhala asymmetric vapor
Gradualmente le structuras vicin se fragmenta
e le imponderabile volitiones del vita
fracassa le ordine glacial del morte
Illo es le inexplicate Poter Creative
que a vices es adorate e a vices ponite in dubita
mesmo in iste momento: experientiate trans
molle, calide, somnolente brumas
-iste nebula ubi quecunque pote exister
e ubi alcun parte de nos mesme remane
post le evelia involuntari

Aug 1, 2012

Dicer adeo

Viver sin te sera difficile
ma viver con te es impossibile
Dicer adeo es ardue
ma io debe facer lo

Pensar al momentos dulce
es dolorose, ma le facto es
que illos era troppo pauc
plus sovente nos nos noceva

Nos son de disparate planetas
e parla idiomas differente
le sonos son quasi le mesme
ma le significationes dissimilar

Io debe trovar mi proprie via
camminar in solitude alcun menses
trovar me mesme ante probar
trovar mi car medietate

Jul 14, 2012

Nemo pote occider un sonio


 Io volerea viver in un universo
ubi John Lennon non era occidite
ubi le pace habeva un ver opportunitate
e ubi le soniatores ha le autoritate

Un universo ubi Amor es rege
e Musica le regina
ubi le homines son libere
e ha tote le tempore que illos besonia
pro facer lor creativitate florescer

Io vide John Lennon al strata in Nove York
con le dorso curve e gris capillos e barba
ma su oculos son attentive e jocose
ille me reguarda e dice pensivemente
in su dialecto typic de Liverpool:
-Es tu le soniator qui da vita al soniatores?
Io responde con su proprie parolas:
-"Tu pote dicer que io es un soniator,
ma io non es le sol."
Ille responde:
-Continua soniar, mi amico!
E non oblida que nemo pote occider un sonio...