Jun 20, 2012

Spatio pro inspiration

Non oblida respirar
a vices te mesme vacuar
per un hora de meditation
crear spatio pro inspiration

Jun 19, 2012

Solo un vita


Io prefere solo un vita
plenate de amor
ante immortalitate
ultra sentimentos

Jun 18, 2012

Mundo immunde

Alcuno ha facite
le mundo immunde
alcuno ha causate
que illa ha febre

Su pulmones plenate
con fumo toxic
illa tussi, suda
e treme fortemente

Qual sorta de infection
la ha colpate?
Como superara
illa su pena?

Quanto alte
debe le febre
devenir pro causar
le peste perir?

Jun 17, 2012

Molle undas


Sempre le mar ha lavate
le plagias con molle undas
e sempre io sera
plenate con gaudio seren
audiente aqua fluente

Jun 10, 2012

Le vita es plenate con paradoxos

Pro cambiar su destino
on debe acceptar
su sorte actual

Pro vincer
on debe arrestar
le lucta sin fin

Pro attraher homines
on debe cessar
esser timide del solitude

Es placente seder in un commode auto
ma alora le risco es plus grande
de addormir se detra le volante

Es quando on cerca
su berillos
que illos es le plus besoniate

Pro trovar su proprie via
on primarimente debe perder se
al via de qualcuno altere

Pro appreciar ver felicitate
on primarimente debe suffrer
sever luctos e adversitates

Pro attinger pace del mente
on debe cessar ruminar
sur como solver tote su problemas

Le can es le melior
amico del homine
ma infortunatemente illo es mute

Illos qui labora multo non ha tempore
pro dispender lor moneta
e illos qui son disoccupate ha multe tempore
ma manca pecunia pro plenar lo con divertimentos

Lo que on ja sape on debe audir cata die
ma lo que on vermente vole saper
nunquam es mentionate

Quando on deveni vetule
e finalmente ha apprendite como viver
on tosto debe morir

Jun 9, 2012

Tu amico le dolor

Non time le dolor,
illo es tu amico
que te rememora
que alco es mal

Ascolta su message
que es sufflate a te
trans le silentio:

Cerca quietude
trova relaxamento
face te mesme vacue

Lassa le fluvio
de pensatas, angustia
emotiones e reactiones,
fluer via pro in vice
reciper le influxo
de nove inspiration
que curara le vulneres
in tu anima

Jun 8, 2012

Maccinio


 
In le forestes svedese
un nove baca ha nascite
in modo tote natural
Myrtillo e Vaccinio ha procreate
e le infante es appellate Maccinio
Ma le botanista Flora Bosco
non approba del nomine:
"Illo deberea esser Myrtinio,
le medietate del cata
nomine parental"
Illa prende un manata del bacas
e los degusta:
"Illos non gusta mal
ma anque non tanto ben"
A isto io responde como sempre:
De gustibus non est disputandum


Vaccinio = Vaccinium vitis-idaea = lingon (sv.)
Myrtillo = Vaccinium Cyanococcus = blåbär (sv.)
Maccinio = blingon
Myrtinio = blågon




  

Jun 7, 2012

Le facie del citate


Su tracias son arrugate
per autos, gentes e edificios
Le labios parla multe verbos
diverse idiomas de tote le mundo
quiete dialogos
discussiones animate
critas, plorar e risadas

Illo se contrahe e tusse
contaminate son le pulmones
de escappamentos de autos
e sempre fumante caminos

Le innumerabile oculos de vitro
del grattacelos gigantesc
specta le suburbios lontan
Iste oculos que nunquam se cela
illuminate durante le nocte
de milles de lampas

Le naso inhala le fragrantia
del panes e panettos fresc
e le odor del immunditias
del asphalto que ferve
calefacite del rutilante sol
e le aromas del flores
que plena le parcos

Tanto variate
es le facie del citate

Jun 6, 2012

Le benediction


Le vetere homine diceva:
-Sia benedicte iste infante.
Que illo vivera un vita san e que illo sera felice.
Que illo trovara su proprie via e edificara un mundo harmonic.

Le matre respondeva:
-Gratias pro vostre benediction.
Illo es un dono rar e potente.
Troppo pauc homines ha inspiration de benedicer o donar fortia.

Le vetere homine explicava:
Ille qui benedice primarimente debe parturir le benediction intra se mesme.
Le fortia que ille dona es le fortia del amor, que sempre cresce quando illo flue.
Ille qui benedice alteres al mesme tempore benedice se mesme.
Durante multe annos io ha benedicte homines, e le vita ha benedicte me.

Jun 5, 2012

Cecate


Io levava mi reguardo al celo
pro esser cecate del sol
un foramine esseva ardite in mi vista
trans le qual io vide le morte

Jun 4, 2012

Anima perdite


Al die tenebrose,
transforma le dolor interior
a fortia spiritual

Lassa le dolor esser tu guida
al pais ultra suffrentia
ubi vive le veritate del vita

Non escappa al false
consolation del drogas
que solo duce
de plus in plus al perdition

Fide te al fortia
que es plus grande que tu
Tu lo non cognosce
ma illo cognosce te

Le Amor sempre es ibi
anque al momentos quando
tu non pote sentir su presentia

Quando le spero te abandona
fide que Le Amor finalmente
trovara tu anima perdite

Jun 3, 2012

Amor infelice


Amar illa es
como appeter fabulas
que le ventos porta