Jan 31, 2013

Tu vade con me

Un medie anno ha passate desde tu morte
Tu es disparite ma al mesme tempore
sempre con me

Tu vade con me
nos incontra insimul joias e penas
e a vices tu me da bon consilios

Io sovente sonia de te,
que nos parla sin verbos,
io non vide tu facie
ma fortemente senti tu presentia

Al superficie le vita es differente
ma su nucleo es le mesme
proque assi como nos ha vivite insimul
nos continua viver insimul
e le gaudio floresce de novo

Jan 30, 2013

Jan 29, 2013

vadente con oculos claudite

non plus
cecate del sol

io ha claudite le oculos
e vade lentemente
al longe del strata plenate de gente
et essaya supprimer
le timor illogic

le strata nunquam fini
sempre nove voces
omnes son in cammino

nemo arriva

le carosello del citate

Jan 28, 2013

Declaration de amor


                                   io
                            ama    adora
                      vide                  audi
             caressa                          basia
      comprende                              incoragia
imbracia                                               affirma
       crede                                          estima
         admira                           benedice
              glorifica                  senti
                        ascolta   desira
                                    te

Jan 27, 2013

Pangaea



Pangaea – le continente gigantesc
durante cento milliones annos
illo sol regnava sur le planeta
inglobante tote le terra firme

Illo se extendeva del polo al polo
como un littera ”c” enorme
e le calide mantello terrestre
lo sempre pressava in alto

Illo era circumferite
de Panthalassa, le sol oceano,
vaste, profunde e tanto grande
como omne le mares hodierne

In iste tempores prehistoric
le mundo era totalmente differente
hic habitava animales e plantas
extincte desde longe tempore

Omne cosas al mundo se cambia
certe lentemente, altere rapidemente
e nihil es eterne
salvo le cambiamento ipse

Plure vices le continentes se univa
pro postea, de novo, separar se
in un ballo tardive del placas tectonic
dansate durante eones

Jan 16, 2013

Musica, lingua e poesia

Quando Le Musica deveniva mute
in vice veniva le verbos
duo-dece tonos era replaciate
de vinti-sex litteras

Undas de incomprehensibile emotiones
era modulate a parolas e conceptos
Melodias serpentin se rigidiva
e deveniva prosodia

Le sanguine flueva
del corde al cerebro
Le dies passava e continuava
le incessante oration

Ma un nocte estive
con plenilunio
un filia nasceva
e on la donava le nomine Poesia
Le Musica era su matre
e Le Lingua su patre

Le Poesia tosto comenciava parlar
e su verbos flueva con tan legieressa
et esseva tan bellissime
que su matre a lacrimas era movite
e Le Musica de novo
comenciava cantar
post annos de silentia

Postea Musica
Lingua e Poesia
remaneva un familia felice
que ambulava trans le stratas
e dispersava joia
con lor captivante
cantos e contos

Jan 13, 2013

Le eveliate e le soniator


 Le eveliate se addormi
et es transformate al soniator
Le soniator incontra le matino 
et es transformate al eveliate

Illos es le mesme persona
ma vive in mundos differente
illos es le duo lateres del anima

Le eveliate vive
in le mundo solide
ma in su mente
ille es inspirate del soniator
e un poco del duressa del mundo
deveni molle ante su oculos

Le soniator vive
in le mundo molle
ma in su mente
ille es inspirate del eveliate
e pro isto le sonios
ha substantia e structura

Le duo lateres del vita
que existe intra nos:
nocte e die,
sonio e le realitate,
sovente son separate
ma a vices se misce
in le mente aperte
e crea insimul
le poesia

Jan 9, 2013

Verbos immortal

Verbos sage e nobile
supervive ille qui los ha dicite
illos se uni e crea insimul
phrases immortal
et entra in le mundo stilisate
del codices binari

Durante longe tempore illos viveva
sur le folios jalnite de libros grasse
Recitate piemente
de belle animas
cuje pensatas era como melle

Hodie illos es dispersate sur le mundo
portate de electricitate
e optica a fibras:
technica e scientias human
in perfecte symbiose

Creativitate sin limites
nasce l'inspiration
e l'inspiration nasce
creativitate sin limites
Nihil pote stoppar
iste circulo benefic:
le florescentia del humanitate

Tu es mortal
ma si un musa te va basiar
tu potera dicer le parolas immortal
que portara
l'essentia de tu spirito
trans l'eternitate
como un corda indestructibile
de unes e zeros

Jan 4, 2013

Le cavallero del unicornio



Olim ante multe annos
in un altere vita, in un altere tempore  
io era un cavallero
con armatura, gladio e un scuto
ornate con le capite del unicornio 
Mi cavallo me portava trans boscos
campos e al longe de fluvios

Io cavalcava in le servicio del Regina
ordinate fortificar le dominio
de justitia e prosperitate
ubi omnes poteva viver in pace

Io luctava pro istes
qui non poteva luctar pro se mesme
ma cata vice quando io abatteva inimicos
io sentiva le conscientia 
punger mi pectore
e un vice, in un momento de hesitation
mi adversario era plus celere de me

Desde tunc io ha passate trans multe vitas
como ferrero, panetero e sacerdote
apothecario, optico e poeta
ma totevia sempre remanite un cavallero
con le capite del unicornio al scuto
e un corde molle
sub mi armatura dur

Jan 2, 2013

Le restaurante de Martin


 Lasagna della nonna e lentilles Catalan
in le restaurante verde de Martin servite
excellente, gustose mangiar vegetarian
sempre con corde e talento facite

Le species crea un magia saporose
cumino, thymo, cardamomo e gingibre
da vita al fabas e verduras gustose
creante un deliciose prandio salubre