Dec 23, 2013

Floccos de nive



Cata flocco de nive
es unic
e ha su proprie
forma crystallin

Illos nasce
in le celo
e le ventos frigide
los modella
in elaborate
ornamentate symmetrias
a vices reminiscente
de micre stellas
o de transparente
plantas

Illos cade lentemente
pro finalmente
attinger le terra
e facer tote le mundo
blanc e scintillante
sub le basse
sol hibernal

Dec 19, 2013

Dismascate


Io reguardava le speculo
e videva
nihil

Es io un illusion
que ha dismascate se mesme?
Es mi dolor
sin substantia?
Es mi perdition irreal?

Io senti alleviation
e plana via sin direction
ex le camera
domo
citate
pais
continente
planeta
systema solar

pro finalmente esser dissolvite
in le oblivion cosmic

Dec 13, 2013

Riso e surriso

Le riso es le jubilation del anima
e le surriso
un pacific meditation

Dec 6, 2013

Duo monachos

Duo monachos promenava insimul.
Le un diceva al altere:
-Qual es le cosa que tu ha facite
le plus sovente durante tu vita?
-Io ha pensate, pensate e pensate? E tu?
-Respirate, respirate e respirate.

Dec 5, 2013

Poesia transformante

Le poesia transforma le verbos a obras de arte
face le phrases devenir orationes,
incantationes, mantras e cantos,
construe un nave que porta le lingua
al oceano del destino human
e lassa le poemas e pensatas
dar nomines al vento, al undas
e al sculpturas metamorphic del nubes
le quales plena le dies e le noctes
de nostre viage curte ma intense

Le poesia es le companion invisibile
que susurra ex le fundos del anima,
aperi le oculos al beltate del mundo
e dona alleviation e solacio al suffrente,
adjuta nos vider le magia del vita quotidian,
monta le dies in quadros ornamentate,
liga le versos que nasce nunc
con le parolas del scaldos usque al antiquitate
e nos uni con le epos kaleidoscopic
nominate Le Saga Del Homine

Dec 2, 2013

Le morto

Un experientia difficile:
vider un homine morte
Immobile como un statua
sin respiration
ancora un persona
ma simultaneemente 
alco radicalmente differente
Materia que cambia 
de carne a humus
un figura temporari
sub transformation

Io la videva un ultime vice
quando io entrava in le camera
pro prender le ultime photographias
un con e un sin flash
pro postea silentemente exir
Le sala de hospital 
era como un sanctuario

Isto era le prime vice
que io videva un morte corpore
io non memora tante detalios
ma plus clarmente le sentimentos:
dignitate, lucto, ma anque pavor
Proque pavor?

Illos coperiva le morto
e lo transportava al morgue
Io retornava al domo
pro jentar


Nov 21, 2013

Io es un nube



Io es un nube
que sin peso
lentemente plana
super aride
paisages autumnal


Le tepide radios
del pallide sol
me insensibilemente
transforma


Le occultante dolor nocturne
me patientemente attende
e le stellas ancora
son troppo distante


 Io veni ex nihil
e vade a nihil
e interim es
un umbra blanc in le celo
que sin esser notate
passa super homines
qui rarmente specta in alto


Io es un forma temporari
in le cyclo vetuste del aqua
Prendite del oceano
et elevate in alto
io tosto cadera
al fluvio del montania


 Le sentieros del mar, del celo e del fluvio 
ha devenite le mie durante un momento
le viagiator es mortal
ma le viage es sin fin
e quando un die le aqua siccara
su tracias remanera
gravate in petra durante millennios
in le montanias sempiterne


Istos son le pensatas del nube
justo nunc, iste postmeridie
Iste momento nunquam revenira
proque le essame del nubes
sempre crea nove formationes


Nov 18, 2013

Svedia hibernal

Obscuritate ha devorate
le Svedia hibernal
e le nive ancora tarda

Io vade somnolente
trans stratas durante crepusculo

Quando le sol ha disparite
le lumine distante del stellas
face le spero superviver

Nov 17, 2013

Le plus grande fortia

Pecunia face
le mundo girar
ma Amor
lo face crescer

Nov 10, 2013

Lactation

 
Un femina lacta
su parve bebe

Illa es un mammal
e anque io, de facto

Facile es oblidar
que le homine es un animal

Nov 6, 2013

Le hospital


Le hospital es tanto grande
e le homines tanto parve
Il ha multe cameras
in le domo del medicina
In alcunos habita desperation
e in alteres le spero
In alcunos cresce le sanitate
e in alteres illo marce

Le hospital es tanto grande
e le homines tanto parve
alcunos entra
pro non plus exir
ma pro alteres iste domo
es le prime que illos vide

Le homines vestite in blanc
diligentemente vade inter cameras
como leucocytos
et essaya destruer
omne infectiones
Le hospital es grande
e le homines parve
- ma numerose

Nov 4, 2013

Le eremita


Heri io visitava le eremita

Ille me salutava:

"Tacer es melior
de repeter se"

Postea ille taceva
le resto del die

In le vespere
io retornava al domo

Oct 29, 2013

Infante de octobre

Nostre carissime
infante de octobre,
tu arrivava al mundo
quando plenate de colores,
quando le pomos maturava
e quando le amor
su domo trovava

Duo calde
bracios suspirante
te attendeva
e te protegera
del frigor hibernal

Le primavera attende
ad audir tu prime parolas
e le estate attende
a vider tu prime passos

Nostre carissime
infante de octobre,
tu veniva a nos,
homines de autumno,
portante un fragrantia primaveral 

Oct 24, 2013

Duo robatores


Duo robatores fugiente ante le policia un die arrivava in un grande citate
ubi illes nunquam habeva essite antea. Lor auto se rumpeva justo ante que illes
attingeva le limite del urbe, dunque illes vadeva a pede al centro. Le un
esseva blonde, le altere brunette. Ambes esseva vestite in jeans e nigre
jachettas de corio, cata uno con un pistola in le tasca interne.

Illes planava robar un banca e postea fugir del pais con adjuta de identitates
falsificate pro passar le resto de lor vita in luxo a un insula caribe. Illes jam
habeva obtenite le passaportos falsificate. Ma, como nos tosto videra, lor
plano esseva imperfecte.

Post alcun tempore illes videva un banca: "Banca del Sud". Illes mirava
al interior trans un grande fenestra. Nulle clientes esseva visibile. Un cassera
sedeva detra le banco. Illes spectava le un al altere e nutava. Postea illes
poneva pantys a lor capites, le quales celava lor physionomias, e curreva
a in le banca con armas levate:

"Isto es un robamento! Manos in alto!" le blonde robator critava.
Le cassera reageva e con timor e con surprisa. Illa levava su tremente manos.
Le viros la approchava con hasta:
"Nos da tot' le moneta, prompt'!" clamava le viro brunette.

"N...nos...non...h...ha...moneta..." illa balbutiava con terror.
"Ah, folle donna, clar' que vos ha moneta! Nos guid' al cassa forte!"
le viro brunette continuava.
"Nos solo offere consilio economic e simile servicios. Nos non plus manea
moneta contante."
Le cassera habeva recuperate partialmente su continentia.
"E si alicun' vole prender moneta de su conto?"
"Illes debe ir al cassero automatic."
"OK, e ubi es illo?" le viro blonde diceva impatientemente.
"Nos lo habeva presso le entrata, ma illo esseva usate tanto rarmente que
finalmente illo esseva removite. Le cassero automatic le plus proxime es situate
al station ferroviari un medie kilometro via."
Subito distante sirenas deveniva audibile. Le sonos rapidemente cresceva
in volumine. Ambe le viros succuteva e currente exiva del banca. Illes trovava
un auto in le vicinitate del entrata. Le blonde fracassava un del vitros lateral,
aperiva le porta ex le interior, entrava in le auto e aperiva le altere porta assi que su
companion poteva entrar.
"Ignira nos le carro a filo calid' e vamos d'aqui com' fulmines!" ille vociferava.

Ma quando ille non videva ni le volante ni le cassa de cambios, ille deveniva
paralysate. Ante ille solo esseva un schermo con textos animate in colores forte.
Un molle, ma mechanic, voce feminin parlava ex un altoparlator:
"Benvenite al Taxi Autopilota S.A. Insere tu carta bancari in le apertura sub
le schermo e postea dice tu destination."

"Diabolo! Es un de ille damnate taxis!" le brunette blasphemava. "Merda,
in le passat' era plu' facil' ser un robator. On potev' negotiar con ver homines,
qui comprendev' le fort' argument' del pistol'!"
Illes ambes curreva ex le auto. Duo autos policiari jam esseva la.
Quatro policieros exiva de illos e se positionava detra le portas del autos
con armas levate:

"Quita vostre armas e leva le manos super vostre capites!" un de illes critava.
Le viro blonde reageva rapidissime. Ille celeremente hastava a un passante
femina, sasiva su collo e poneva le pistola contra su capite:
"Dispare vos d'aqui, policieros, o yo tirara le capite d'iste donna in pecias!"
Le donna respondeva a un voce basse e molle:
"Io es le androide de menage LY2314. Si tu damnifica me, tu debe reimbursar
mi proprietario con un unitate equivalente."

"Diabolo! Ancor' un de ille pupas! Illos son ubique iste dies!”
In desperation ille tirava contra un del policieros. Le balla colpava su capite.
Illo ricochetava creante un sono metallic. Le policiero androide diceva a
un alte voce autoritari:
"Tu ha usate fortia violente contra un functionario statal. Tu es un unitate
defective. Tu essera reprogrammate a un unitate de servicio del tertie rango.

Le policiero esturdiva le blonde homine con un radio laser de su arma,
e ille cadeva al solo. Ora le homine brunette jectava su pistola al strata
e gemeva anxiosemente:
"Io capitula! Lassa me devenir un unitate de servicio del secunde rango,
ma io demanda vos: non me reprogramma!!!"

Oct 12, 2013

Le silente radio

Le viro sedeva ante le radio
ascoltante musica silente
su parve camera
mancava electricitate

Le radio calmemente
jaceva al tabula basse
die post die post die
et era nettate cata septimana

Oct 6, 2013

Duo viagiatores



Voyager Uno e Voyager Duo
lassava le terra in '77
lor mission esseva examinar
le grande planetas del systema solar


Anno post anno
imagines phantastic illos nos dava:
le tempestas phrenetic de Jupiter
le vulcanos furiose de Io, su luna


Le anellos magnific de Saturno
le lisie et enigmatic superficie de Urano
e le profunde blau lucentia de Neptuno
que quasi resimila lo del Terra


Quando illos le corpores celeste passava
lor fortia de attraction los lanceava
in ultra al stellate profunditate
con sempre plus grande velocitate

 
Ora Voyager Uno es dece-octo
milliardos kilometros del Terra
nos recipe su signal debile
solo post dece-septe horas
Voyager Duo avantia tres milliardos
kilometros post su gemine


Illos porta al longe viage
al spatio inter stellas
cata uno un disco auree
con information, imagines e sonos


Quante milliones annos volara
le sondas trans le vacue spatio
ante que illos con un stella collidera
o sera trovate de esseres intelligente?


Oct 3, 2013

Spatio e tempore sin limite

Luce distante del stellas remote
caressa nostre facies nocturne
con su lumine ancian

Nostre oculos specta
le passato del fundos cosmic
e al mesme tempore
le lustro del futuro
del planeta Marte

Que nos cogita
le spatio e le tempore sin limite
iste nocte
in frigide silentio

Que nos attende al matino
durante que le constellationes
uni le futuro e le passato
ante nostre oculos

Oct 1, 2013

Le bestia

Yo non es morte
solo dormiente
attendente
al luna que evelia
l'umbrose fortias
del nocte veniente

Yo tosto sera
libere del luce
ma de novo incatenate
del obscuritate
que dona placer
miscite con dolor

Vesperal figuras
lentemente se transforma
al nocturne umbras
e quando nemo 
pote penetrar l'obscuritate
al fin yo vade foras

Yo non vole que alicuno
videra que yo face
yo non vole spectar
lor aversion e repugnantia
yo es sempre celate
assi como mi opera

Yo non es morte
solo dormiente
attendente
que mi tempore venira
tunc yo potera satiar
mi fame abysmal

Sep 26, 2013

Poema pomoic

Ecce un poema re pomos in le dialecto pomoic de Interlingua.
Esque vos lo pote decifrar?

Poiomo apomamo popomosmo
poemo anpoquemo guspotamo pirpoasmo
frucpotosmo posonmo depoliciomose
poemo anpoquemo sapolubmore


Poiomo parpolamo polemo linpoguamo 
podelmo popomosmo
propoquemo pomimo bucpocamo poesmo 
poplenmo podemo ilpolosmo
dunpoquemo pomimo proponunciamotion
depovemoni mulpotomo pepoculmoiar


Poinmo polemo vipocinitamote 
podemo pomimo caposamo
poilmo pohamo pounmo jarpodinmo 
poconmo pompoiemoros
heporimo poiomo polomo vipositamova
poemo repotornamova poconmo 
pounmo corpobemo pleponamote


Sep 20, 2013

Le puero sin nomine

Novella
 

Ille non sapeva quanto longe ille habeva vivite in le domo. Ille non memorava quando ille nasceva. Ille non habeva un nomine. Ille esseva sol in tres cameras
sin portas o fenestras.

In le camera central il habeva un sofa ante un schermo. Ci ille sedeva le majoritate del tempore. Al schermo esseva monstrate imagines de homines qui 

faceva estranie sonos con su buccas, viagiava in diverse vasculos e vadeva
trans grande, aperte spatios plenate con objectos in multe differente formas. Sempre nove imagines appareva. Le mesme personas esseva visibile durante un tempore limitate e postea deveniva reimplaciate de alteres. Le imagines nunquam dispareva e illos sempre fascinava le puero sin nomine.

In le sinistre latere del camera central il habeva un banda rolante. Quando le puero deveniva inquiete ille camminava sur illo usque a ille deveniva fatigate. Alora ille retornava al sofa.

In le dextere latere del camera central il habeva un grande machina rectangular con vinti buttones. Presso cata button il habeva un parve photo que monstrava un platto o un bibita. Dece buttones monstrava plattos e dece bibitas. Quando

le puero premeva un del buttones, le machina murmurava alcun secundas e postea un parve porta se aperiva con le mangiar o bibita que esseva ordinate. Quando ille habeva finite biber o mangiar ille remitteva le vitro o le platto con le coperto al parve porta, le qual alora tosto se claudeva.

In le camera dextere il habeva un litore. Justo opposite illo il habeva un guardaroba. Ci il sempre habeva munde robas e pannos de lecto. Quando le puero prendeva vestimentos ex le guardaroba, le proxime matino illos esseva reimplaciate de nove, exactemente simile vestimentos. Presso le guardaroba,      al solo, il habeva un tubo con un attachate coperculo. Ci ille jectava immunde textiles e residuos.

In le camera sinistre il habeva un WC, ducha e un lavabo. In un armario il    habeva productos hygienic le quales esseva completate secundo le mesme principio que le vestimentos in le guardaroba. 

Omne le cameras esseva illuminate con lampas fluorescente montate al tecto.

Illos luceva assatis longemente ma post un certe periodo illos comenciava lucer sempre minus fortemente. Alora le puero deveniva somnolente, se lavava
e iva al lecto pro dormir. Finalmente le lampas esseva totalmente extinguite.    Post octo horas le lampas de novo comenciava lucer con gradualmente crescente intensitate. Alora le puero se levava e primo visitava le toilette e postea le machina con mangiar e bibitas. Quando satiate, ille vadeva al sofa e reguardava le actiones del homines al schermo. Post isto ille camminava un poco al banda rolante, retro al sofa, le machina con alimentos, le sofa, le toilette, le banda rolante, le sofa, machina con alimentos, ducha, toilette, lecto. Ancora un die 

habeva finite.

Omne le dies esseva simile. Le puero non remarcava que ille cresceva.

Ma in vice ille observava que capillos comenciava crescer in nove locos. Ille deveniva sempre plus inquiete. Ille besoniava alco plus. Sempre plus sovente    ille se demandava que existeva foras del tres cameras. De ubi veniva le mangiar  e le bibita? De ubi veniva le vestimentos e le articulos hygienic? A ubi dispareva le cosas que ille jectava via in le tubo? Esque il habeva altere pueros como ille?

Le facto que plenava le puero con frustration esseva que ille non poteva trovar ulle exito. Le tubo pro immunditias esseva troppo stricte pro le passage de un persona. Le sol altere aperturas esseva le parve porta del machina con alimentos e le cloacas del camera de banio. Le parietes mat blau, le solos gris e le tectos

blanc totes esseva lisie. Ille realisava que le guardaroba debe haber aperturas celate ex le quales veniva nove vestimentos e pannos de lecto, ma in nulle loco del guardaroba ille poteva detectar ligaturas. Quando ille batteva le fundo del guardaroba isto creava quasi nulle sono. Le material esseva massive.

Un die ille tirava foras tote le contento del guardaroba e lo poneva in un pila al solo. Ma le die sequente le guardaroba remaneva vacue. Similemente post un septimana. E post un mense. Al fin le pannos e vestimentos que ille usava 

habeva mal odor. Un die quando le lumine comenciava extinguer se ille 
jectava tote le textiles, con le exception del copertura del lecto, in le tubo e 
postea se addormiva. Le sequente matino le guardaroba esseva plenate con
un complete collection de vestimentos e pannos de lecto. 

Die post die le frustration cresceva. Finalmente le puero habeva un attacco de furia. Ille critava in desperation e batteva con su pugnos le parietes, le machina con alimentos e le schermo; ma nihil occurreva. Nulle objecto esseva rumpite.

Al fin ille deveniva exhaurite e pesantemente cadeva sur le sofa. Le lampas gradualmente deveniva obscur. Ille se addormiva.

Alora alco nove eveniva, ma le puero dormiente non remarcava isto: un gas sin odor entrava le tres cameras ex minuscule, imperceptibile foramines, le quales esseva celate in le punctos ubi le angulos del parietes toccava le tecto. Cata camera habeva quatro tal foramines. Le gas creava un dense nebula in omne

le cameras ma post alcun minutas illo se dissolveva.
Post un certe tempore le lampas de novo poco a poco comenciava accender se.

Le puero se eveliava e, con surprisa, reguardava circum se. Multe tempore habeva passate desde le ultime vice quando ille se habeva eveliate sur le sofa
in vice de sur le lecto. Ille poteva rememorar se iste occasion solo vagemente,
sin detalios. Ma isto non habeva importantia. Hodie ille se sentiva relaxate e gaudiose. Con un surriso al bucca ille vadeva al ducha.   

Sep 18, 2013

Enigmas

Nos son enigmas le un ante le altere
et essaya decryptar 
le mentes intricate del proximos
a vices sin successo, 
tunc frustrate nos diverge

A vices nos incontra post annos
un enigma del passato
un amico que deveniva un estraniero
un cognoscite facie quasi oblidate

Es le enigma ancora insolubile
post dece o vinti annos?
Ha le lectiones del vita date le claves
que era tanto necesse
olim, ante multe estates?

Le reuniones nos duce retro
a momentos que nunquam revenira
ma nonobstante evelia speros celate
de un continuation

A vices le enigmas remane enigmas
e a vices illos son solvite
destinos deveni unite e dispersate
in le mystic epos del vita

Sep 13, 2013

Chapmans stick



An io audi duo gitarras?
No, isto es le Chapmans stick
Auxiliate per le electricitate
le gitarra ha ascendite al regno del polyphonia
e prendite su placia al latere del piano

Su musica sublime
es cultivate de pauc maestros
ma illo ancora attende
al recognoscentia del massas

Le cordas non debe ser pizzicate
suffice que le digitos
los legiermente tocca
pro crear un musica dulce

Octo gratiose digitos balla sur le large manico
e lor movimentos son sequite de melodias
bassos e accordos
Iste gitarra duple evelia le arte del cordas
a nove alturas meraviliose

Sep 9, 2013

Multe facies

Mi anima ha multe facies
- qual de istos es visibile
depende del spectator

Quando tu mira mi oculos:
- vide tu un fenestra o un speculo?
- vide tu le enigma o le solution?

Sep 3, 2013

Le dono del autumno

Calor del autumno, echo del estate
ancora on audi risadas e infantes jocante 
forsan pote superviver nostre amor
quando le foco es extinguite remane le ardor

Le pomos jam ha maturate
nunc es tempore del recolta
nos ha experientiate dies insolate
ma anque periodos pluviose

Le saisones debe haber su curso
cata un nos da donos differente
e un anno es pro le terra
como pro nos un curte minuta

Lo que cresceva durante le estate
es le dono del autumno
le alimento necessari
pro indurar le frigor del hiberno

Nos cerca calor un matino in novembre
al ardor del camino, le un presso le altere
ambe sapiente que es plus facile
sustener le hiberno insimul

Aug 26, 2013

Le vita es tu canto



Nunquam lassa le tonos mutescer
Nunquam lassa le dolo vincer
Non te rememora le mute passato
lassa le cantos meliorar tu stato

Le vita prende e le vita dona
non pensa de cosas perdite
le donos que veni, veni ora
e debe ser recipite

Senti le rhythmo del secundas
minutas deveni melodias
accordos plena le horas
le dies son symphonias

Le vita es tu canto
lassa lo cata momento
plenar tote tu camera
cunar te, mi car puera

Inhala le tonos - le fresc aer
nunquam tu spirito va cader
nunquam le musica mutescera
ma sempre, sempre sonara 

Aug 25, 2013

Le pyramides


Millennio post millennio
in deserto sic e calide
sta le pyramides
Oculos mortal
los sempre admira
e quando le vetulos mori
le juvenes les reimplacia

Con calma le pyramides
sempre reguarda
le pais del fluvio longe
e del deserto ultra limites
Illos vide como le historia se repete
seculo post seculo
e como suffrentia e homine
sempre seque le un le altere
e como le grande fluvio
a vices deveni rubie

Illos ha vidite
polytheistas e monotheistas
e como le un deo
reimplaciava le multes

Illos ha vidite
pharaones e presidentes
acceder al poter
e postea cader

Quanto longe illos stara
ante que le arena los vorara,
ante que le oceano los prendera,
ante que le foco celeste
los finalmente devorara?

Le pyramides ha vidite
le florescentia del humanitate
-an anque illos spectara su morte?

Le historia es conservate
in hieroglyphicos, papyros,
rolos, libros e discos dur
e le futuro un die sera gravate
al superficies ancian del pyramides

Aug 23, 2013

Pluvia estive

Pluvia estive 
                       refresca me un poco

intona un canto 
                            del autumno approchante

evelia mi spirito 
                             con tonitro lontan

lassa le sol 
                    affundar se in le nimbos

evelia le atmosphera 
                                     e lassa me sentir

le amene illusion 
                               de levitation

solo sensibile 
                        post pluvias estive

Aug 17, 2013

Le lingua del montanias



Parla tu dulce lingua, mi amico
celate tan longe inter montanias
Lassa le mundo al fin audir lo!
Un filia del latino illa es
e ha su unic nuance
del suavitate romance

Io comprende multe verbos
sin previe studio
Io comprende le contexto
ma non le detalios

Io vole apprender plus
ergo, parla a me cata die
usque a le nebulas alpin
sera dispersate
e le belle village in le valle
devenira toto visibile

Que tu dulce lingua romancio
como tu, mi amico, longemente vivera!
Que tu filios e neptos lo parlara
con gaudio e orgolio! 

Aug 15, 2013

Mi nove domo

Tu me trova ci
ubi nemo credeva que alcuno mora
inter flores in colores inexpectate
e vetere, deteriorate tapises
Mi nove prospecto non es tanto ample
ma io vide plus de detalios

Toto cambiara
Le grande unda venira
io resta ci e lo attende sin resistentia
sapente que io ascendera al superfacie
trans le torrente del aqua agitate

Io me ha movite al montania
e al mesme tempore me approximate al solo
Ci il ha minus de personas
ma in vice aves inusual

Cata die mi biciclo me transporta
rapidemente al velle que io cognosce tanto ben
io vacilla inter lo nove e lo vetere
e cata vice quando io gira a un nove via
io senti como le momento presente
con su manos del ceramista
forma le argilla del passato
al potto del futuro
plenate con le aqua del spero

Aug 14, 2013

Le memoria del aqua

Le memoria del aqua
sanante, curante
ancora es un mysterio

Bebe un gutta
del inconcipibilitate
e senti le miraculo

Si tu vole comprender
tu deveni confundite
Si tu vole creder
tu attinge pace
Si tu vole ser sanate
tu deveni curate

Lassa le liquido
circumferer te
descende al mar vivente
e lassa lo baptisar te
in le nomine del Presentia Incognite
que es preservate in le memoria
del aqua sanante

Aug 12, 2013

Le reflexo

Io reguardava mi reflexo
e pensava inquietemente:
Forsan io es tu reflexo?

Aug 5, 2013

Senso sin parolas

Yo es ci, yo es ora
solo iste instante existe
yo es le calma
que crea movimentos
yo es le silentio
ubi musica nasce

Le quietude del mente
lucide transforma
parolas sin senso
a senso sin parolas

Jul 31, 2013

Le grammatica del spirito

Io toccava le grammatica del spirito
lassava su verbos plenar me
con sonos meraviliose
e permear mi pensatas
con su structura perfectionate
que porta ordine al chaos
e face toto comprensibile

Io audi orationes 
ex le spheras invisibile
que in mi aperte mente 
gradualmente se materialisa
io regratia le vita
pro iste dono
essayante repeter le message:
le verbos caressa mi lingua

Jul 30, 2013

Circumferite de calma




Nos vole haber tempore pro tante cosas
ma le qualitate de nostre actiones
es plus importante que le quantitate
e iste qualitate emerge
quando nos circumfere los con calma
assi como le quadro
inquadra le pictura
e accentua su beltate

Jul 29, 2013

Osa amar

Plena tu vita
con amor e joia
Lassa le beltate
innobilir tu anima

Osa amar,
trova compassion
Dona tu sentimentos
al suffrente mundo

Jul 28, 2013

Rosas sur tu tumba

Rosas rubie e blanc
reposa sur tu tumba
- le colores del patria
ma tu es sepelite 
in le solo del nove pais
unite con illo
ergo iste terra
ha devenite anque le mie

A iste loco
io sovente vole revenir
mi domo es situate
in le vicinitate
Tu era proxime a me
durante tu vita
e ancora lo es
post tu morte

Jul 27, 2013

Le historia in tres parolas

Summarisante le historia
in solo tres parolas, io dicerea:
Construction, Destruction 
e Reconstruction

Civilisationes cresce,
postea peri in guerra e chaos
et ex lor ruinas
emerge nove citates

Nos apprende del genitores
como repeter lor errores
con nove variationes

Jul 26, 2013

Le horologio solar


Horologio solar - chronometro ancian
pro l'Antiquos tu le tempore monstrava
Al dies insolate l'umbra vadeva
preter cifras roman
Al dies nebulose tu nihil diceva
e in umbras Chronos se perdeva

Tanto longe como le sol va sequer
su orbita exactemente
tu monstrara le correcte tempore
estate, autumno, hiberno e ver
decennios passa lentemente
longe tu remane, firme gnomone

Jul 25, 2013

Deman le celo videra tu alas

Qual es le loco
a ubi tu ha escappate?
Tu voleva esser libere
e non videva le catenas

Ha tu comenciate rememorar te
que tu debe oblidar
le die quando tu realisava
qui tu nunquam pote devenir?

Quando tu te aperiva ante le mundo
tu deveniva un estraniero
tu veritates deveniva su enigmas
e le vento prendeva via tu verbos

Quando tu revenira,
silentemente specta ante te
proque deman le celo
videra tu alas

Tu sape que io parla a te
malgrado que tu non audi mi voce
spectante le marcas post mi pensatas
in le panno molliate de lacrimas

Jul 24, 2013

Tempore retrogradante

Finalmente veniva le die 
quando le tempore finiva
tote le horologios se arrestava
homines e animales 
cessava su movimentos
subito petrificate 
in su routines quotidian

Le historia finiva
le universo terminava su rotation
toto deveniva totalmente calme
e mi parolas era stoppate 
al via a tu aures

Post alcun milliones de annos 
Deo deveniva enoiate
e dunque faceva 
le tempore retrogradar

Alora io inglutiva mi parolas
colligeva mangiar ex mi bucca 
con on furchetta
radeva le poemas con mi penna
e retrocedeva a in le alba

Le species deveniva 
de plus in plus simple
pro finalmente disparer
soles e planetas deveniva nebulas
e toto era tirate a in un parvissime puncto
duo centimetros ante le naso de Deo

Jul 23, 2013

Le magia del nunc

Nunquam le magia del nunc
pote ser capturate
- solo su umbra

Le beltate del momento presente
nasce e mori in le mesme instante
ma su vestigio es immortal

Io mira iste momento,
nasce e mori insimul con illo
admira lo tristemente
plora surridente
prende un photo
e ancora un
collige le umbras
e postea continua
a in un altere nunc

Jul 22, 2013

Le catto grunnion


Le catto grunnion,
il' ha un affection
pro nocturne miaular
e nos sempre eveliar

Le catto exigente,
peculiar es su mente
le mangiar rarment' es bon
plus sovent' il' dice: "Non!"

Vole ser caressate
ma tosto es stressate
- mi mano subito morde
tunc triste deveni mi corde

Su voluntate cata vice
triumpha, prevale
yo es su servitrice
e mi protestos non vale

Nonobstante iste factos
vermente iste catto
aspecta e dulc' e amar
e yo sempre lo va amar

Jul 18, 2013

Sona tu vina



Sona tu vina*, belle musicante
non hasta, tocca lo lento, lento
lassa cata tono finir sonar ante que veni le sequente
lassa los affundar se in le continuemente scintillante
drapperia sonor del tanpura*

Trova tu via al cordas alte
e postea descende al plus basse tono
lassa lo vibrar con tote su fortia
assi que le aer visibilemente tremula

Explora le scala e su melodias
lassa los contar nos del vetere maestros
qui olim los trovava
e de lor alumnos qui los perfectionava
Lassa los cantar del tempore
quando le deos viveva sur nostre mundo
e le terras fragrante
ancora non era immunde

E postea,
quando le fortias se ha assemblate:
lassa le rhythmos venir
Primo caute, postea sempre plus marcate 
Lassa los eveliar dansatores invisibile
qui vole nascer in nostre planeta
Lassa le movimentos perfectionate
emerger del calme oceano sin fundo
e teneremente caressar nostre facies
con le amor que sin verbos
dice toto 
et es toto

Le tonos glissante son como delphinos
que gratiosemente nata sub le superficie del aqua
e a vices salta a in le aer
Le radios del sol resplende in le aspergente liquido
Le melodias lentemente matura
como mangos con colores saturate
plenate de suave dulcor

Le rhythmos accelera
cresce e se propaga
pro finalmente in toto plenar le vina
tu corpore 
e mi anima

Lassa le tempore oblidar nos
nam nos ja ha quitate su dominios
le raga* nos prende via
a un viage circulante
que nos duce in alto e in basso
in basso e in alto
itero e itero
ma cata vice es unic,
differente

Veni un breve pausa
ante que le viage continua
Nos ride insimul
in joia vertiginose 
quietude et extase se fusiona 
e le vita attinge perfection

*Vina es un instrumento musical indic, usate principalmente in indic musica classic
http://en.wikipedia.org/wiki/Veena_%28instrument%29

*Tanpura en un instrumento musical indic, usate pro sonar un burdon continue
durante representationes de indic musica classic   
http://en.wikipedia.org/wiki/Tanpura

*Raga es un modo musical consistente de un scala e de formulas melodic
que forma le base detaliate pro le improvisate representationes de pecias musical
del traditional musica classic de India
http://en.wikipedia.org/wiki/Raga 

Jul 17, 2013

Felicitate e dolo

Felicitate es plus 
que solo le manca de dolo
e dolo es plus 
que solo le manca de felicitate
e ambe iste "plus" pote coexister
o mancar in toto
in un mundo de melancholicos ridente
optimistas plorante
e pallide figuras sin expression
que te passa in le strata 
sin esser notate

Jul 11, 2013

Perdite in le mar de diamantes

Yo videva un nave al mar de diamantes      
su corpore era d'argento
le velas era taliate de seta
e le capitano habeva un corde auree

Sed l'agulia del compasso non era magnetic
e non indicava al nord
ma sequeva l'inclination del nave
que deveniva de plus in plus perdite
errante trans aquas incognite
vogante in circulos
deludite per constellationes stellar
difficile a interpretar

Multe tempestas tormentava le nave
e le color argentin perdeva su lustro 
le velas era lacerate
e volava via con le vento

Le capitano deveniva discoragiate
e su corde de auro deveniva
involvite in l'obscuritate del melancholia

Ille audiva le tintinnante tonos
del vaste mar de diamantes
sed le nocte le impediva
vider su resplendentia in-imaginabile 
nam iste nocte habeva durate
tan longe que ille poteva memorar
-ille non plus cognosceva
le die que precedeva le nocte

Finalmente,
irresistibilemente
veniva le alba
e le prime radios del sol
trovava lor via al fundos
del mar de diamantes
e le aqua lentemente
gradualmente plus fortemente
comenciava lucer 
apparentemente con su proprie fortia

Post un momento il semblava
que le mar luceva plu' fortement' que le sol
le luminositate deveniva tan intense
que illo levava le nave
e lento, caute
lo traheva verso le celo

le nave argentin de novo luceva
e le corde de auro del capitano
reflecteva le lucentia del diamantes
pro finalmente funder se
e dispersar se con mille radios
trans le mundo integre

Essente e ubique e nusquam 
le capitano non plus esseva perdite:
ille habeva attingite su porto final

Jun 29, 2013

Le vinti-secunde concerto




Iste matino quando io incendeva le radio
io audiva le vinti-secunde concerto 
pro piano e orchestra de Mozart
Io immediatemente recognosceva le musica
que io ha audite ante tante tempore

Le tonos me faceva retornar
a un tempore quando toto era differente
Mi aures se ha transformate
ma le melodias es le mesme
illos existeva ante me
e remanera post me

A vices durante mi vita
iste musica reveni a me
e io pote audir lo cantar
e memora
lo que es belle
e lo que es durabile

Jun 28, 2013

Libere sclavo

Tu non es toto libere
ma anque non toto submisse
A vices tu passa
limites non plus intimidante
e a vices discoperi nove

Tu es le liberate sclavo
e le opprimite homine libere
dunque un die
tu apprendera
aperir portas claudite
ma ignorar le serrate
al via verso le fenestra
al ultime etage

Jun 27, 2013

Le homine sin nomine

Ille nasceva
sin nomine

Su prime nomine 
su matre le dava

Su secunde nomine 
su patre le dava

Su tertie nomine 
su magistro le dava

Su quarte nomine 
ille mesme trovava

Su quinte nomine 
su amata le dava

Su sexte nomine 
su infantes le dava

Su septime nomine 
le historicos le dava

Sed le die quando le historia 
era oblidate
ille de novo deveniva 
le homine sin nomine

Jun 26, 2013

Lustro sonor


L'archetto lento
caressa l'instrumento
plena le domo
con dulce sono

Trans le aer
comencia tremer
un lustro sonor:
le tonal tresor

Jun 25, 2013

Le scaldo

A un strata in le citate
sta le scaldo mascate
declama versos d'amor
a voce suave e sonor

Preter ille hasta le homines
non audiente su verbos nobile
a vices alcuno su capite verte
con oculos quasi sempre inerte

Quasi nunquam gentes se arresta
pro audir un poema integre
su beltate e valor attesta
pro facer le scaldo allegre

Declama ille pro aures surde?
Ha le mundo le poesia oblidate?
Parla ille un lingua absurde
refusate del majoritate?

Quando veni le vespere
le scaldo cessa parlar
va via in vento aspere
deman toto sera similar