Apr 12, 2012

Pensatas gaudiose


Io senti gaudio
pensante de illa
qui pensa de me

Apr 11, 2012

Reposo


Io claudeva mi oculos
e audiva detra le fenestra
le calme vento

Apr 10, 2012

Le galaxia in un tassa de caffe


Io versava lacte a mi caffe
e un galaxia se formava

Io addeva un cubo de sucro
e le galaxia era plenate con cometas

Io agitava le liquido con un coclear:
un nave spatial gigantesc
que causava chaos inter le stellas
e fragmentava omne constellationes

Io prendeva un bibita del caffe
e postea ancora un
e gradualmente le galaxia dispareva
a in un altere dimension

Apr 9, 2012

Le beltate del credentia

Le beltate del credentia
es sequer le intuitive logica
e le suspirante sentimentos cordial

Prender le enorme passo
al terreno incognite
accompaniate de dubitas e timor

Lassar le transcendental amor sin limite
inundar le aride solo del paisages interior
tormentate de siccitate
e manca de credentia in un futuro clar

Perder se in le momento
sentiente le magia del vita authentic
in le presentia de alique multo plus vaste
que io, tu, le luna o le sol

Apr 8, 2012

Toto e nihil


Le silentio intra se mesme porta
le possibilitate de omne verbos
ergo le eremita sempre tace
dicente e toto e nihil

Apr 6, 2012

Rutilante


Le sol rutilante
evelia le mundo tenebrose
su aureola lucente
disperge le obscuritate
e libera le esseres luminose

Apr 5, 2012

Attendente al traino


Esque tu, como io
attende al traino?
Le gigante blau
que nos portara

preter silvas
campos e domos
al citate capital
pulsante de vita

Tu specta le arbustos
ante le station
e postea le village
que tu vole lassar

Nos attende in van
le minutas va
ma nulle traino veni

Subito le altoparlator
comencia sonar:
un cambio ferroviari es rumpite

Le traino non venira

Apr 4, 2012

Le homine perfecte


Un homine "perfecte"
non es perfecte
ma su perfection
jace in le combination
de defectos e talentos
non expectate,
in su capacitate
de surprender e trovar
solutiones "impossibile"
que la o le face crear
alique plus genial
que ulle invention
que jam existe
in nostre civilisation

Apr 3, 2012

Saluta le ver!


Le nive ha cadite
del nude brancas del betulas
Reveni, aves!
Saluta le ver con vostre canto
ora le vita se re-evelia

Apr 2, 2012

Apud le fichiero


Al latere de un fichiero
tranquillemente meditante
sede un illuminato
qui discatenate del duhkha
reposa in lo que es eterne

Apr 1, 2012

Inflexiones del amor


Inflexiones del parola "amare" in latino classic:
amo, amas, amat, amamus, amatis, amant, amabo,
amabis, amabit, amabimus, amabitis, amabunt
amabam, amabas, amabat, amabamus, amabatis,
amabant, amavi, amavisti, amavit, amavimus,
amavistis, amaverunt, amaveram, amaveras,
amaverat, amaveramus, amaveratis, amaverant,
amavero, amaveris, amaverit, amaverimus,
amaveritis, amaverint, amor, amaris, amatur,
amamur, amamini, amantur, amabor, amaberis,
amabitur, amabimur, amabimini, amabuntur
amabar, amabaris, amabatur, amabamur,
amabamini, amabantur, amem, ames, amet,
amemus, ametis, ament, amarem, amares, amaret,
amaremus, amaretis, amarent, amavissem, amavisses,
amavisset, amavissemus, amavissetis, amavissent,
amare, amari, amavisse, amatus, amaturus, amatum,
amandi, amando, amandum, amando, amans,
amatus, amaturus, amandus, amati,
ama! amate! amare! amamini!

Inflexiones del parola "amar" in interlingua:
ama, amava, amara, amarea, ama! amante, amate