Silente parolas del mystico

Io vole dicer le parolas

que indica ultra se mesme

vadente al silentio

iste silentio que porta

le responsa non pronunciate

que da pace al anima

e solo pote esser sentite

ma non comprendite

Io vole portar iste parolas

sempre in le mente

lassar illos levar mi spirito

quandocunque io los

prende a mi labios

e rememorar me

del existentia de un via

que duce a ubi mi anima suspira

Somnolente pace

Mi vita es plenate

del profunde obscuritate

del celo nocturne

e le momentos gaudiose

son le parve stellas lontan

Plure menses ha passate

depost que io ha vidite le sol

ma sin timor del nocte

io inhala somnolente pace

respirante con resignation

Profunditate vertiginose

Al tarde vespere

le stellas se revela

e nos face rememorar

le vertiginose profunditate del spatio

le longevitate del galaxias

e le breve suspiro

del vita human

Nubes migrante

Lentemente le nubes migra

trans le celo blau clar

un tardive peregrination

tamen tosto illos disparera

ma le celo sempre remanera

Memento mori - memento vivere

Memento mori

sed al mesme tempore

non oblida viver

Detra le porta celate de tu domo

le vita te attende

Tu mente es tu domo

construite de cognoscentia,

sentimentos e pensatas

Construe tu domo

con un bastante fundamento

de logica e sagessa

Parietes de integritate e confidentia

e un tecto de ideales e sonios

in iste domo tu ganiara fortia

pro con feritate viagiar

trans le mundo

Aperi le porta, exi e vive!

Vive plenmente omne tu dies!

E le die quando tu incontra le morte,

mori con pace e sin regret

sapiente que le sentieros del vita

que tu sequeva

te duceva al paises

ubi regeva sagessa e amor

In memoria de Petyo Angelov

Reposa in pace, Petyo
nunc inter angelos
Proque finiva un vita
tanto ric e promissori?

Le colores del Buddha

Buddha blau

blau como le oceano

oceano pacific

pacific e profunde

profunde e calme

calme como le Buddha

Buddha blau

Buddha nigre

nigre como le nocte

nocte plenate

plenate de stellas

stellas lucente

lucente como Buddha

Buddha nigre

Buddha blanc

blanc como papiro

papiro del libros

libros sacre

sacre e sage

sage como Buddha

Buddha blanc

Buddha auree

auree como le sol

le sol que dona calor

calor de amor

amor e compassion

compassion de Buddha

Buddha auree

Buddha rubie

rubie como sanguine

sanguine del victimas

victimas de homines

homines qui non comprendeva

non comprendeva Buddha

Buddha rubie

Buddha verde

verde como le silva

silva plenate de aves

aves que sona cantos

cantos gaudiose

gaudiose como Buddha

Buddha verde

Buddha rosate

rosate como le loto

le loto cuje petalos

petalos saluta

saluta le celo

le celo ubi es Buddha

Buddha rosate

Drappos de oblivion

Ille diceva:

ubicunque io vade

mi umbra me seque

illo devora mi dolor

e cresce constantemente

Un die illo sera plus grande que io

e tunc su illusiones obscur

inveloppara mi pensatas

in immunde, frigide drappos de oblivion

e tegera le via ante me

Disimbarcamento

Le oceano del vita

Cata unda es un die

Le costa se approxima

Silentios differente

Le silentio que io sensava hodie

- es illo le mesme silentio que heri?

Le manca de sonos pare esser le simile

ma es sensate differentemente iste vice

Deo e io

Deo es un nube

e io es un gutta de pluvia

Deo es le mar

Ascoltante le silentio

Quando le vento se ha calmate

super le foreste regna serenitate

io ascolta le silentio

que non es ascoltabile

le eternitate me dona pace