Renascentia illuminate

Quando le corpore nasceva, 

le anima moriva
e quando le anima renasceva 

le corpore deveniva cinere
 

Ex le cinere le spirito emergeva
le qual univa le corpore e le anima

Quando le corpore renasceva
le oculo del anima se aperiva
e le luce del spirito radiava ex illo

§11:6

Le genio,
assi como le lunatico,
face lo inexpectate

Domo mancate

Pote on mancar un domo
assi como on manca un homine?

Caressar le cameras perdite
con su memorias

In su pensatas vader
ex le cocina al salon
e postea al dormitorio

Teneremente toccar le mobiles

Rememorar se como le solo craccava
e como le vento sufflava detra le fenestras

Pote on mancar un domo
assi como on manca un homine?

Usque ora le domo remane
ma le interior es totalmente cambiate
Altere personas ora vive ibi

Al superficie le mesme
ma internemente cambiate
- an le caso non es al contrario
con homines?

Estate eterne

Io te amara

un eternitate

usque al fin

de iste estate

Lo que nos ha oblidate

Le arbores memora
lo que nos
ha oblidate

Un nocte productive

Ille se sedeva in le vespere
pro scriber un romance
ma quando veniva le alba
ille habeva scribite un haiku

Crear es viver

Quando on crea
on senti que on vive:

modella in le nunc
marcas permanente

forma le materia
con su pensatas

deveni un deo
durante un secunda

lassa le submarino
del pensatas
descender in le fundos
del subconscientia
pro recuperar tresores,
esser espaventate
per murenas,
emerger al superficie
transformate
e renascite,
preste a crear
alco nove
o repeter
lo que jam
ha essite oblidate

Abandonate

Quando le traino habeva partite
un sol figura
remaneva al platteforma

Le masca

 

Le corpore es le masca del anima
e le anima es le sculptor del corpore

Le anima tira le masca
assi que illo ride e face grimasses

e finalmente es rumpite a pecias...

Menses minuscule

Monologos monumental
mobilisa massive musculos
monstrante menses minuscule,
menaciantemente municipal

Le lingua de mi patre

Io era nascite in le pais de mi patre
e apprendeva su lingua
ma tosto io era tirate via de ille
e transferite a un pais estranie

Io apprendeva un nove lingua
ma le lingua de mi patre
insensibilemente io oblidava

Ora io ha retrovate mi patre
ille parla mi nove lingua
ma io non ha succedite
reapprender le sue

Chaos e ordine

Chaos es
ordine complexe
e ordine es
chaos simplificate