Le canto

In mi anima vive le musica

In mi corde vive le canto

Cantante, io parla con le vita

e cata die es significante

Con aer io plena mi pulmones,

e cerca mi proprie melodia,

lassa mi chordas vocal vibrar

Le guitarra da dulce harmonias

Io canta del sol ardente

que me saluta cata matino

e del pallide soror, le Luna

que in silentio trova su cammino

Canta con me iste vespere!

Adeo al sol, salute Luna!

Tene mi mano in frigide nocte

Le stellas nos da fortuna

Nostre animas le musica funde

Nostre cordes le canto uni

Quando nos canta, le vita es ver

e le gloria nunquam fini

Le sensualitate del cinque sensos

Io vole vider te

quando justo eveliate

e le sonios ancora plena

tu oculos soporose

Tu me reguarda e surride

pensante del die passate,

quando nos al fin poteva

de novo esser insimul

 

Io vole audir te

quando tu parla e ride

in le camera vicin,

quando tu susurra secretos

in mi aure,

como tu canta un poco

quando tu te vesti

 

Io vole sentir te

tanto proximemente

quando tu jace in mi bracios

Io vole sentir

tu peso super me,

tu corpore calide,

le rhythmo de tu respiration,

tu halitos in mi aure

e como tu longe capillos

titilla mi facie

 

Io vole sentir tu fragrantia

quando io duce mi digitos

trans tu justo lavate capillos

Illos fragra de flores primaveral

e me rememora del die

quando nostre amor le prime vice

displicava su folios

Io vole gustar te

de novo e de novo

Io es affamate

e nunquam sera satiate

Io vole biber tu nectare,

sentir te in mi bucca,

basiar te passionatemente

durante que le luna passa al celo,

gustar le petalos del rosa

quando tote le mundo dormi

e le unic cosa que existe

es nos duo e le nocte,

le nocte que deliciosemente

remane ancora

alcun horas

durante que tu e io

satia nostre sensos,

satia nostre fame,

voga insimul

in le calide mar del amor

ubi nulle terra

es in vista

Le lecto

Frida Kahlo pinge in le lecto.

Chronica publicate in Panorama in interlingua, no.5, 2022

Le lecto es forsan le plus importante loco de nostre vita. Ibi nos passa plus o minus un tertio de nostre vita.

Le plus habitual activitate del lecto es dormir. Le corpore reposa, sin mover se, e le mente cammina in le peculiar mundos del sonios.

A vices on jace in le lecto sin poter dormir, e se torque a tote directiones, non succedente trovar pace, durante que le pensatas remastica le evenimentos del die passate, o se perde in preoccupationes super le futuro incerte.

Interdum le lecto es le scena del expressiones physic del amor romantic. Duo corpores comparti un momento intime. Cute caressa cute, labios tocca labios, tenere parolas es susurrate in aures plen de expectation.

A vices colpa un maladia. Languidemente e febricitante, on de novo jace in le lecto. Sudante e tussiente on prende le temperatura e ingere medicinas.

In lectos eveni alcun del plus importante occurrentias del vita human.

In lectos nove vita es create (durante le acto sexual), in lectos (de hospital) homines nasce e in lectos homines mori. 

A multe homines gusta leger un poco ante de addormir se. Alcunes prende le telephono intelligente con se al lecto. Ma isto non es tanto intelligente, proque il es plus difficile addormir se quando on es stimulate de jocos e medias social. Le plus devote usatores del smartphonos se evelia plure vices cata nocte e controla le plus recente evenimentos in le fluxo incessante del internet.

Alcunes ha televisores in lor cameras a dormir. Illes specta programmas casual usque a que illes se addormi. Sovente illes non succede extinguer le apparato ante que Hypnos los prende al pais del somno. Tunc le televisor continua monstrar pelliculas accidental pro oculos claudite.

Considerante le facto que nos passa tante tempore in le lecto, il es importante haber un commode matras, pro haber un reposo optimal e un apte position de dormir. Forsan alcun lectores pensa que un commode matras es troppo car, ma de facto il ha alternativas a bon mercato e alte qualitate, per exemplo de un svedese interprisa global, le qual lassa le clientes mesme montar lor mobiles. Il non es mi objecto a facer marketing hic, assi io non vole revelar le nomine de iste interprisa.

Assi, un sovente ignorate ma importante factor pro attinger felicitate in su vita, es un commode lecto, preferibilemente in agradabile colores e motivos. Hic on pote dormir, erotisar, reguardar le television, esser malade o solmente jacer e pensar. Forsan mesmo participar in incontros e conferentias, con le adjuta de videotelephonia.

Quando on es preste a dormir, on fatigatemente se pone super le molle, recentemente lavate copertura, que dulcemente crepita. Postea le lecto es transformate a un vehiculo que nos prende al incantate pais de sonios, ubi toto es possibile.

Un oceano in un gutta

 

Io es un oceano

in un gutta,

 

un plagia

in un grano,

un silva

in un folio,

un humanitate

in un oculo, 

un universo

in un atomo

Commendant Elephant

Commendant' Elephant':

animal tant' pesant' 

Nunquam es charmant' 

Mult' bombastic, arrogant' 

 

Ille ha un grand' armea  

con soldatos araneas 

Mille ha cannones 

operate per miniones 

 

Ille ha multe bombas 

con grandor de columbas 

Le flotta de submarinos 

nata in bassinos

 

Ebrie hallebarderos  

duce bombarderos 

Somnolent' nigre cattos 

duce aviones de combatto 

 

E omne le naves de guerra 

reman' al solide terra 

e le missiles ballistic

es in manos separatistic

 

In vice de fusilar 

cata militar fusil 

solment' pot’ scintillar 

sonante samba de Brasil  

 

Cata un que usa un arma 

crea difficile karma 

Alor' le buddhistas 

remane pacifistas 

 

In vic’ de un bayonetta 

cat' soldat' ha un furchetta,

non vole combatter,  

ma mangiar e biber 

 

Commendant’ Elephant'  

ha un non functionant' 

armea e armada 

solment’ pro paradas

Ballerina Mandolina

Ballerina mandolina 

Belle donna, multo fina 

Quando dansa, anque canta 

In le pausa, bibe Fanta 

 

Ballerina mandolina 

Sexy como Cicciolina 

Omne viros la desira 

Incantate, illes mira 

 

Quando illa monstra suave

ballets legier e anque grave

Basios illa jecta centos  

que dispare con le ventos 

Homo Pomo

Como Homo Pomo 

face iste sono?  

Ille prende piras, 

torna los in bira  

Adde cardamomo,

un poc de cinnamomo,

prende su grande lyra,

jecta lo al pyra

E pois al pyra

bulli le bira

e Homo Pomo

ama le sono

de bira evaporante,

al pirieros condensante

Le cyclo es plenate

Homo Pomo es grate

Professor alligator

Professor alligator 

es un passionate lector 

Multe libros ille devora 

In bibliotheca semper demora 

 

Libro post libro post libro dispare 

Vacuitate plena le plancas 

Tosto tote libros manca 

ma le alligator satiate pare 

Le plus grande extasis

Le plus grande extasis

non es funder se

con un altere persona,

sed con le cosmo,

jacer al terra

imbraciate del herba molle

que fragra dulcemente,

e spectar le nubes,

lor formas majestatic

que plena le celo,

attendente lor tepide

pluvia estive