Infante de octobre

Nostre carissime

infante de octobre,

tu arrivava al mundo

quando plenate de colores,

quando le pomos maturava

e quando le amor

su domo trovava

Duo calde

bracios suspirante

te attendeva

e te protegera

del frigor hibernal

Le primavera attende

ad audir tu prime parolas

e le estate attende

a vider tu prime passos

Nostre carissime

infante de octobre,

tu veniva a nos,

homines de autumno,

portante un fragrantia primaveral 

Duo robatores

Duo robatores fugiente ante le policia un die arrivava in un grande citate
ubi illes nunquam habeva essite antea. Lor auto se rumpeva justo ante que illes
attingeva le limite del urbe, dunque illes vadeva a pede al centro. Le un
esseva blonde, le altere brunette. Ambes esseva vestite in jeans e nigre
jachettas de corio, cata uno con un pistola in le tasca interne.

Illes planava robar un banca e postea fugir del pais con adjuta de identitates
falsificate pro passar le resto de lor vita in luxo a un insula caribe. Illes jam
habeva obtenite le passaportos falsificate. Ma, como nos tosto videra, lor
plano esseva imperfecte.

Post alcun tempore illes videva un banca: "Banca del Sud". Illes mirava
al interior trans un grande fenestra. Nulle clientes esseva visibile. Un cassera
sedeva detra le banco. Illes spectava le un al altere e nutava. Postea illes
poneva pantys a lor capites, le quales celava lor physionomias, e curreva
a in le banca con armas levate:

"Isto es un robamento! Manos in alto!" le blonde robator critava.
Le cassera reageva e con timor e con surprisa. Illa levava su tremente manos.
Le viros la approchava con hasta:
"Nos da tot' le moneta, prompt'!" clamava le viro brunette.

"N...nos...non...h...ha...moneta..." illa balbutiava con terror.
"Ah, folle donna, clar' que vos ha moneta! Nos guid' al cassa forte!"
le viro brunette continuava.
"Nos solo offere consilio economic e simile servicios. Nos non plus manea
moneta contante."
Le cassera habeva recuperate partialmente su continentia.
"E si alicun' vole prender moneta de su conto?"
"Illes debe ir al cassero automatic."
"OK, e ubi es illo?" le viro blonde diceva impatientemente.
"Nos lo habeva presso le entrata, ma illo esseva usate tanto rarmente que
finalmente illo esseva removite. Le cassero automatic le plus proxime es situate
al station ferroviari un medie kilometro via."
Subito distante sirenas deveniva audibile. Le sonos rapidemente cresceva
in volumine. Ambe le viros succuteva e currente exiva del banca. Illes trovava
un auto in le vicinitate del entrata. Le blonde fracassava un del vitros lateral,
aperiva le porta ex le interior, entrava in le auto e aperiva le altere porta assi que su
companion poteva entrar.
"Ignira nos le carro a filo calid' e vamos d'aqui com' fulmines!" ille vociferava.

Ma quando ille non videva ni le volante ni le cassa de cambios, ille deveniva
paralysate. Ante ille solo esseva un schermo con textos animate in colores forte.
Un molle, ma mechanic, voce feminin parlava ex un altoparlator:
"Benvenite al Taxi Autopilota S.A. Insere tu carta bancari in le apertura sub
le schermo e postea dice tu destination."

"Diabolo! Es un de ille damnate taxis!" le brunette blasphemava. "Merda,
in le passat' era plu' facil' ser un robator. On potev' negotiar con ver homines,
qui comprendev' le fort' argument' del pistol'!"
Illes ambes curreva ex le auto. Duo autos policiari jam esseva la.
Quatro policieros exiva de illos e se positionava detra le portas del autos
con armas levate:

"Quita vostre armas e leva le manos super vostre capites!" un de illes critava.
Le viro blonde reageva rapidissime. Ille celeremente hastava a un passante
femina, sasiva su collo e poneva le pistola contra su capite:
"Dispare vos d'aqui, policieros, o yo tirara le capite d'iste donna in pecias!"
Le donna respondeva a un voce basse e molle:
"Io es le androide de menage LY2314. Si tu damnifica me, tu debe reimbursar
mi proprietario con un unitate equivalente."

"Diabolo! Ancor' un de ille pupas! Illos son ubique iste dies!”
In desperation ille tirava contra un del policieros. Le balla colpava su capite.
Illo ricochetava creante un sono metallic. Le policiero androide diceva a
un alte voce autoritari:
"Tu ha usate fortia violente contra un functionario statal. Tu es un unitate
defective. Tu essera reprogrammate a un unitate de servicio del tertie rango.

Le policiero esturdiva le blonde homine con un radio laser de su arma,
e ille cadeva al solo. Ora le homine brunette jectava su pistola al strata
e gemeva anxiosemente:
"Io capitula! Lassa me devenir un unitate de servicio del secunde rango,
ma io demanda vos: non me reprogramma!!!"

Le silente radio

Le viro sedeva ante le radio

ascoltante musica silente

su parve camera

mancava electricitate

Le radio calmemente

jaceva al tabula basse

die post die post die

et era nettate cata septimana

Duo viagiatores

Voyager Uno e Voyager Duo

lassava le terra in '77

lor mission esseva examinar

le grande planetas del systema solar

Anno post anno

imagines phantastic illos nos dava:

le tempestas phrenetic de Jupiter

le vulcanos furiose de Io, su luna

Le anellos magnific de Saturno

le lisie et enigmatic superficie de Urano

e le profunde blau lucentia de Neptuno

que quasi resimila lo del Terra

Quando illos le corpores celeste passava

lor fortia de attraction los lanceava

in ultra al stellate profunditate

con sempre plus grande velocitate

 

Ora Voyager Uno es dece-octo

milliardos kilometros del Terra

nos recipe su signal debile

solo post dece-septe horas

Voyager Duo avantia tres milliardos

kilometros post su gemine

Illos porta al longe viage

al spatio inter stellas

cata uno un disco auree

con information, imagines e sonos

Quante milliones annos volara

le sondas trans le vacue spatio

ante que illos con un stella collidera

o sera trovate de esseres intelligente?

Spatio e tempore sin limite

Luce distante del stellas remote
caressa nostre facies nocturne
con su lumine ancian

Nostre oculos specta
le passato del fundos cosmic
e al mesme tempore
le lustro del futuro
del planeta Marte

Que nos cogita
le spatio e le tempore sin limite
iste nocte
in frigide silentio

Que nos attende al matino
durante que le constellationes
uni le futuro e le passato
ante nostre oculos

Le bestia

Yo non es morte

solo dormiente

attendente

al luna que evelia

l'umbrose fortias

del nocte veniente

Yo tosto sera

libere del luce

ma de novo incatenate

del obscuritate

que dona placer

miscite con dolor

Vesperal figuras

lentemente se transforma

al nocturne umbras

e quando nemo 

pote penetrar l'obscuritate

al fin yo vade foras

Yo non vole que alicuno

videra que yo face

yo non vole spectar

lor aversion e repugnantia

yo es sempre celate

assi como mi opera

Yo non es morte

solo dormiente

attendente

que mi tempore venira

tunc yo potera satiar

mi fame abysmal