Apr 30, 2013

Reveni al presente

Respira profundemente
reveni al presente
Lassa le pensatas
reposar alcun minutas

Apr 29, 2013

Communication sin frontieras

Canto in interlingua



Interlingua,
le lingua inter nos
idioma le qual
comprende vos

Le lingua de scientia
e de cultura
chat, conversation
e litteratura

Communication sin frontieras
isto es le nove era
Multe gente me comprende
esque isto te surprende?
No!

Su grammatica es
minimal
facile ma non simple,
totalmente natural

Illo es
le clave cultural
a tote le mundo
occidental

Communication sin frontieras
isto es le nove era
Multe gente me comprende
esque isto te surprende?
No!

Interlingua
facilita studiar
le linguas romanic e
rapidemente progressar

in studios etymologic
del moderne idiomas
e lor radices classic:
sempiterne parolas

Communication sin frontieras
isto es le nove era
Multe gente me comprende
esque isto te surprende?
No!

Apr 26, 2013

Un curte pausa durante le labor

Tu reguardava
per fenestra octo
e videva un androide
qui mangiava un pomo
ma tosto reveniva
al pinguin
qui attendeva
al scriptorio

Apr 25, 2013

Le sagio

Le sagio diceva:

Seque me e io vos monstrara 
como amar non solmente con le corde 
ma anque con le spirito
e vider como Amor 
sempre es plus grande que on expecta

Seque me e io vos cantara
cantos que vos nunquam ha audite
e cuje melodias
va caressar vostre facies
assi que finalmente 
venira le lacrimas de joia

Seque me e io vos inseniara
le lingua que nemo parla 
ma omnes comprende
Io inseniara a vos 
le grammatica de facilitate
e le vocabulario de abundantia

Seque me in le dansa sacre
que libera le pedes e le gambas
relaxa le bracios e lassa le capite
levar se in humile orgolio

Seque me e io vos monstrara 
como vos pote conducer alteres
al bifurcation del cammino 
ubi cata un pote seliger 
su proprie via
nam le rolo del maestro 
non es solo transmitter
su proprie cognoscentias e opiniones
ma ante toto arar le terra
ubi sagessa un die germinara

Seque me in un viage al montanias
e quando vos lentemente ascendera
sempre plus proxime al summitate
al mesme tempore vos vos approximara
a lo que es le plus elevate in vos mesme
pois que le viage exterior es sempre
anque un viage interior
e toto es interconnectite
in manieras le qual nos a vices 
non comprende
ma totevia pote sensar 
quando nos cammina
al via del sagio
que es aperte pro omnes

Apr 24, 2013

Post omne guerras

Io non vole scriber 
poemas de guerra
nam io jam ha morite
troppo vices

Quando le lacrimas deveniva sic
io vadeva a in le fluvio
pro mundar me del vita passate
e preparar me pro le sequente

Gladios non plus pote trovar me
nam quando io habeva 
rumpite le mie
mi tracias dispareva

Apr 23, 2013

Lactomeda



Le Via Lactee e Andromeda
Le colosso e le gigante
L'un con 400 milliardos stellas
l'altere con quasi un billion

Post plus de quatro milliardos annos
quando nostre mundo ja sera
un sterile deserte ardite del inflate sol
illos va collider

Stellas incognite
va incontrar nostre sol
e jectar lo a in un nove orbita
Le hydrogeno del nebulosas
sera miscite, ma ante toto
le vacuos se incontrara
insensibilemente nihil e nihil
va fusionar se a nihil

Silentemente le galaxias
va luctar durante 500 milliones annos
pro finalmente amalgamar se
e quando le enorme foramines nigre
in lor centros
al fin violentemente se unira
un nove galaxia nascera:
Lactomeda

Apr 22, 2013

Le hora de reposo

Es tarde
le sol se ha ponite
ma le parve lampas del celo
orna le obscuritate
lo innobili, sublima,
imbelli, adorna
e lo face contar a nos
de mundos lontan
que nos nunquam toccara
ma forsan nostre filios

Le hora de reposo ha venite
le pensatas deveni allongate
illos imbracia le vespere
con su folios molle
lassante le oblidate
guttas del rore
cautemente preparar
su renascentia
e unir se con
le sonios invisibile
que ja ha comenciate
entrar in le camera

Deman
quando le sol revenira
nos trovara
un mundo transformate
per un modo recognoscibile,
per un altere neonate  

Apr 21, 2013

Marcescentia

Le arbore ja habeva 
germinate buttones 
iste primavera

ma era frangite 
del tempesta 
e cadeva al terra
pro ibi attender 
le marcescentia:

deperite buttones
in le medio del estive 
florimento

Apr 19, 2013

Como le natura

Quando tu parla
-parla como le vento

Quando tu canta
-canta como le rivo

Quando tu vade
vade como le nubes

Quando tu plora
-plora como le pluvia

Quando tu ride
-ride como le folios

Apr 18, 2013

Estranie somno magnetic


Estranie somno magnetic
desira lassar frigide sol
e trovar melle hibernal sin nive

se delecta in placer et angustia
felice, intoxicate, unite con le susurro

vole entrar in pluvia de lacte
trovar cognoscentia del forma,
celo, sentimento e natura
e le prime amor del mundo

rumina: es illusion real?

se evelia un matino ordinari
inter umbra et eternitate
ma trova nemo
qui pensa o cogita

ama aqua e foco blau

reposa presso attendentia obliviose
et audi sufflos
in delicate coton de vitro

es brave e triste
basia dies vetule

plora sempre
lege longemente del vita

es amene energia lucente
molle, dulce, quasi belle

porta elementos forte
de meravilias nigre e blanc

hesita, tremula
es un anima aperte e belle
trova aventuras in povressa

selige pauc optiones
prefere colliger verbos luminar

cerca su matre
apud refugios secrete

suffreva nude
ma le oculo del spero es tenace

ha silentio potente
per medio del veritate

insenia un poesia unic

cura nostre credentia

 (Le poema es create usante magnetos 
con parolas e litteras combinate in phrases.
Traducite del original svedese.) 

Apr 17, 2013

Le disputa

(Un fabula)

Olim, quando le novem species de parola sedeva al tabula 
e mangiava le dense suppa textual de Matre Grammatica 
illos comenciava comparar se le un al altere. Cata un de illos 
voleva monstrar su superioritate.

Le Substantivo diceva con confidentia:
-Io es le specie de parola le plus importante. Solo io ha ver 

substantia. Toto lo que gente dice refere a me. Si io non 
nominarea omne le cosas, nulle historias poterea esser contate.

Ma Le Verbo rapidemente respondeva:
-No, io es le plus importante. Io face omne le cosas mover se. 

Sin me toto serea static. Vita es movimento, e io es le creator 
de iste impulso vital.

Pois Le Adverbio interponeva:
-Io perfectiona le lingua: habilemente, capabilemente, 

expertemente e con senso pro detalios. Passionatemente, 
distinguitemente, con assonantias poetic, io lo dona su aromas 
e fragrantias. Io da le lingua su anima e character.

Le Adjectivo se opponeva contra lo que Le Adverbio habeva 

exprimite:
-Tu solo dice in qual maniera cosas son facite, ma io informa 

de lor characteristicas. Es io qui talia le vestimentos que 
Le Substantivo porta: grandiose cappellos, mantellos multicolor, 
camisas ornate e confortabile pantalones. Io es le plus importante 
proque io describe le apparentia del mundo.   

Le Numeral interveniva:
-Es io qui pesa e mesura. Gratias a me on pote vider distantias, 

etate e proportiones. Io pote contar usque a multe milliones 
milliardos trilliones e io non ancora serea preste quando omne 
le galaxias sera extinguite. Io es le fundamento del scientia.

Le Pronomine grunniva:
-Que vos vole attinger? Qui vos vole impressionar? Ille qui vole 

saper lo que duce a ibi o hic debe demandar ille qui sape lo que 
es necessari. E ille persona es io!

Le Preposition essayava argumentar secundo le principios 

del etymologia:
-Mi nomine es componite del parolas latin 'prae' e 'positio'. 

Isto significa que mi position es le prime. Io sempre sape ubi 
omnes son e a ubi illes vade. Io vos omnes tene in ordine.

Alora Le Conjunction se infuriava:
-No, es io qui vos omnes tene in ordine e vos connecte in belle 

phrases, ben que vos non vole admitter isto, e sin mi adjuta vos 
omnes se perderea, vos serea como un grege de oves dispersate 
sur pratos sic!

Toto isto era troppo pro Le Interjection:
Damno! Io non plus pote ascoltar vos. Guai! Vostre argumentos 

son debilissime. Ay! Io ha dolor del capite a causa de vostre 
garrulada. Ascolta hic le factos: io es le plus vetere specie de parola. 
Le plus simple communication que proveni spontaneemente 
ex le emotiones. Quando le humanos ancora non poteva parlar illos 
totevia poteva critar, assi como le animales, pro exprimer gaudio, 
pavor o ira. E que es isto, si non interjectiones? Io era le prime 
e vos omnes proveni de me.

Alora Matre Grammatica reveniva del cocina e omne le species 

de parola se immediatemente calmava e obedientemente continuava 
mangiar le suppa textual.
-Esque le mangiar gusta a vos hodie? illa demandava con mollessa.
Omne le species de parola contentemente nutava lor capites 

e Le Verbo replicava:
-Le litteras son ben cocite e mollissime. Particularmente le "s" crea 

agradabile sensationes sub le palato.
-Ex le cocina io audiva alte e inquiete voces. Que vos discuteva?
Durante un momento le partes de parola taceva con vergonia. 

Finalmente Le Adjectivo embarassate respondeva:
-Nos discuteva qui de nos es le melior.
Matre Grammatica rideva con benevolentia:
-Pro me vos omnes son irreimplaciabile. Io ama cata un de vos 

profundemente. Vos omnes son melior, quando vos face lo que es 
vostre carga special. Insimul vos crea Le Lingua de plen valor. 
Quando Le Scriptor crea su libro ille vole que vos omnes participarea. 
E solo quando vos labora insimul cata un de vos attinge perfection 
individual e al mesme tempore perfection commun.

Apr 14, 2013

Viage trans continentes imaginari

Io vadeva 
ab Eurasia ad Afropa
bicyclava
ab Ameralia ad Aserica
prendeva le auto 
ab Austrica ad Ameropa
volava 
ab Asiopa ad Afralia
iva con nave 
ab Eurerica ad Asialia
pro postea natar 
ab Austropa ad Austrasia
e hastar con motocyclo 
ab Euralia ad Europica
continuar equitante 
trans Afria e Austrerica
e finalmente un helicoptero me portava
ad Afrerica et Amerasia
que resultava in le facto que post un mense
io poteva passar a pede le frontiera
inter Amerasia et Eurasia
e finalmente revenir al domo

Apr 13, 2013

Mi prime amor

Yo nunquam oblidara
mi prime, belle amor
yo memora su blonde capillos
su pelle, su sapor

Iste nocte in sonios
yo de novo la videva
illa diceva molle verbos
ballava e surrideva

L'affection verso illa
esseva le plus intense
solo tunc yo baniava
in mares d'amor immense

Ma tosto le sonio finiva
e mi oculos aperiente
yo videva un altere femina
qui ancora era dormiente

Apr 12, 2013

Aeres evade radar, Ed ave serea


"Aeres evade radar, Ed ave serea."

Aer in forma plural? Si! Il ha multe differente typos de aeres:
aer fresc, aer calide, aer frigide, aer fragrante o odorante.
Illos omnes evade radares, le quales solo pote detectar objectos solide.

 
Que significa iste palindromo?
Mi proprie interpretation es:
"Si aeres evade radares, Ed es un ave."
Proque aeres ya evade radares, ergo Ed 
(forma curte del nomine Edward)
es un ave. Ma nos non sape qual specie de ave es Ed...


Apr 11, 2013

Somno sin sonios

Como le pisces io dormi
con oculos aperte
le somno sin sonios
rigidemente flottante inter algas
in le laco obscur
Le pression del aqua es alte
respirar es difficile
e in alto le piscatores se move

Apr 10, 2013

Le dies

Omne le dies sembla esser simile
ma de facto cata die es unic
Ille qui vide parve detalios
sempre experientia alco nove

Certe cambiamentos require tempore
un anno retro quasi toto era como hodie
ma ante dece annos
multe cosas era differente

Duo fortias forma le vita:
repetition e variation
considerate in iste maniera
le vita ha le structura del musica

Le vita es un thema con variationes
o un capturante opera dramatic
Musica de camera ric in nuances
o un grande symphonia majestatic 

Omne le dies sembla esser simile
ma a vices inexpectate cosas eveni
quando tu te ha accostumate al vita
illo te pote dar un ver surprisa!

Apr 9, 2013

Le plus belle creatura sub le celo

Tu capillos son como le curte, sic herba
a un savanna ubi gnus ha pasturate

Tu oculos son como verde olivas
farcite con paprika rubie

Tu naso es como le becco del condor
con un curva elegante al fin

Tu labios son como justo cocite crangones
le quales largemente diffunde su aroma

Tu lingua es como un anguilla electric,
cata vice quando io te basia, scintillas salta
e postea io jace in le sofa, totalmente combustite

Tu aures son como pastatas karelic
plenate con aromatic butyro ovular

Tu pelle es como textile de polyester
quando io lo caressa illo crepita con electricitate static

Tu collo es como un valvula chromate
trans le qual aqua fresc sempre flue

Tu pectores son como mangos:
su color cambia inter jalne, verde e rubie

Tu ventre es como le montania Sinai
ma a differentia del monte, que es erodite
illo cresce continuemente e deveni de plus in plus majestose

Tu bracios son como Fusilli Lunghi Bucati
cocite durante dece minutas in aqua salin con oleo

Tu manos son como octopodes abysmal
le quales cautemente e tastante avantia

Tu digitos son como molle lumbricos
attrahite ex le humus
del tepide pluvia estive

Tu ungues son como laminas del rasorio
le quales presto et elegantemente pote aperir
conservas e con carne e con verduras

Tu gambas son como truncos de quercos
quando le vento suffla illos stabilemente sta al terra

Tu pedes son como le ungulas de un cavallo
illos clacca rhythmicamente quando tu con gratia
ambula trans le stratas del citate

Apr 8, 2013

John Barry in memoriam

John Barry Prendergast (3 November 1933 – 30 January 2011)


De ubi veni le musica suave?
Illo non nasceva in iste pais
Qui creava le melodia subtil?
Illo es como radios lunar
sculpte del delicate
cymas del arbores
Como pote le harmonias
cambiar tanto mollemente,
sin ulle resistentia?
Vader de dulcor a dulcor,
crear un collar de gemmas
in colores le plus radiante

Apr 7, 2013

Abel Jekyll

Abel e Cain 
como Dr. Jekyll e Sr. Hyde 
son le duo partes opposite 
intra nos mesme 

Le un es le resultato 
de amor e sagessa 
le altere de odio e ignorantia 

Ergo: 
que nos sia Abel Jekyll,
que nos ama 
e que nos cerca illumination 
assi inspirante alteres 
a facer lo mesmo

Apr 6, 2013

Vita longe, vita breve

Pro le infelice le vita es un tormento longe,
pro le felice un cammino troppo breve
Pro certe homines le morte es un carnifice,
pro alteres un liberator

Io vole creder que le gaudio
vince super le lucto in nostre existentia
si nos apprende trovar le ver tresores del vita:
Amor, Sagessa e Beltate
e viver nostre dies
sub le sol que face nostre sonios realisar se

E al hora quando illo se pone
incontrar le nocte sin timor,
fatigate e con pace in le mente

Apr 5, 2013

Grammatica elegante

Facilitate es libertate:
Le lingua facile flue liberemente
Io collige le verbos regular
e los forma in mi manos
como argilla artistic
et assi figuras se forma:
sculpturas lingual

Le grammatica nunquam
obstrue le via
ubi parolas passa
Illo nunquam distrahe
inspirate pensatas
in su fuga elegante
a destinos inexpectate

Le grammatica de Interlingua
es como un elegante
formula mathematic:
illo da le maxime functionalitate
con le minime effortio

Apr 4, 2013

Campanettas de vento



Le campanettas de vento sona
parve melodias aleatori
variate sin fin
intra le mesme accordo

Io lassa le horas passar
le tonos nunquam mutesce
e le parve movimentos del tubettos
de-celera le passada del tempore
poco a poco a poco...

Io reposa in sonios pacific
plenate de lentemente passante nubes
e flores que quasi insensibilemente
oscilla in le tepide vento

Nihil me inquieta plus
le musica del vento e del campanettas
imbracia e sana le anxietate
e lo face gradualmente evaporar

Apr 3, 2013

Sator arepo tenet opera rotas


Sator arepo tenet opera rotas
Le plantator Arepo labora con le rota

Cata die es simile al altere:

Arepo dormi
Le sol se leva
Arepo quita su lecto
Ille mangia
Ille labora al agros
Arepo reposa
Ille labora de novo
Arepo reposa
Ille labora al agros
Ille mangia
Arepo va a su lecto
Le sol se pone
Arepo dormi

 

Isto es le vita de Arepo:

Arepo non existe
Ille nasce
Su familia prende cura de ille
Arepo cresce
Ille comencia laborar
Ille trova un sposa
Su filios nasce
Ille perde su sposa
Ille fini laborar
Arepo se contrahe
Su familia prende cura de ille
Ille mori
Arepo non existe

 
Le vita es un palindromo
Le costa ascendente
e le costa descendente
es le mesme costa,
solo nostre direction
crea le differentia
Quando nos son al summitate
nos comprende iste differentia
e le inevitabilitate del direction
Nos vide tote le costa:
solo remane le descendente
Lacrimante nos relinque le costa ascendente
Le vita es un palindromo


Apr 2, 2013

Il ha mundos incognite

Il ha mundos incognite
justo al frontiera de nostre

In sonios nocturne e diurne,
suave tonos de musica dulce,
molle verbos del poesia,
cunante dansa del cannas,
arte abstracte del nubes,
nos a vices vide tracias e marcas
de umbras de fragrantias
del aroma sacre
de flores estranie

Estranie pro le pensatas
ma ben cognoscite per le intuition
que vide le affinitate de omne esseres
e que non accepta
limites inter le mundos differente

Quando nos laxa le redinas,
nos amolli e respira
e libera le mente,
illo deveni un colibri
que con un susurration suave como le villuto
vola via detra le boscage
attrahite del fragrantia del natura fresc

Illo arriva a locos
que non existe in nostre mappas
ma post un momento
illo es de retorno
contente e volente reposar

Apr 1, 2013

:-) e :-(

Un die :-) faceva un camminata
Quando ille attingeva
le collina presso le silva
ille incontrava :-(
le qual ille non cognosceva tanto ben
ma nonobstante :-)
voleva cambiar alcun parolas con :-(

"Bon die!" salutava :-)
"Mal die!" respondeva :-(
"Proque tu ha tanto mal humor?" demandava :-)
"E proque tu ha tanto bon humor?" diceva :-(
 "Le sol brilla!" explicava :-)
"Ma le vento es frigide." constatava :-(

"Hodie es dominica, le die de reposo." continuava :-)
"Ma deman recomenciara le travalio dur." gemeva :-(
:-) comenciava devenir irritate:
"Tu pessimismo es abominabile!" ille murmurava.
"E tu optimismo non del toto es fundate in le realitate." grunniva :-(

Alora :-) colpava :-(
con tal fortia que ille deveniva ..-_
e postea continuava camminar
con un gaudiose :-D