Apr 21, 2025

Le valor de Interlingua


Chronica publicate in Panorama in interlingua, no.4, 2022

Si gente realisarea como unic e valorose es Interlingua, illes se interessarea plus pro le lingua, e lo dispersarea a tote lor familia e omne lor amicos.

Interlingua sovente es mentionate in le mesme contexto que linguas construite, como Esperanto, Ido, Klingon et alteres. Le comparation non es toto juste. Interlingua non es construite, ma toto naturalistic, e in le vocabulario, e in le grammatica.

Quanto al vocabulario, Interlingua es le opposito de un dialecto. Solmente le plus international parolas es usate. Le grammatica non es artificial, solmente un simplificate forma del grammatica romanic commun. 

Le parolas retene lor forma e orthographia original. Isto es un enorme avantage in duo manieras:

a. Ille qui apprende Interlingua, al mesme tempore apprende le fundamentos de omne le linguas romanic. 

b. Isto face Interlingua facilemente comprensibile pro multe personas.

Io vide tres functiones principal pro Interlingua:

1. Le obvie e fundamental function es como un lingua pro communication international. Ma in iste campo, le lingua usque nunc ha habite un modeste successo. Isto es in grande parte causate de mal selection de momento ("timing"). Quando Interlingua nasceva in le cinquantas, anglese justo habeva comenciate attinger le stato de (quasi) lingua mundial. SUA deveniva le dominante stato superpotente del west, e le domination militar et economic tosto expandeva al campo de cultura popular. Al mesme tempore Interlingua debeva concurrer con Esperanto, como le alternativa neutral de un lingua mundial. Esperanto habeva un grande avantage proque illo jam habeva habite plus que 60 annos pro establir se. Interlingua nunquam habeva un ver opportunitate de monstrar su potential.

2. Le secunde function es como un clave al vocabulario international de origine greco-latin, o como parte de studios romanistic. Interlingua ha essite usate in iste modo in le schola svedese, principalmente per Ingvar Stenström, ma iste uso non esseva continuate e non se dispersava ad altere paises.

3. Le tertie function es artistic. Indisputabilemente, Interlingua es un lingua belle, que es apte pro litteratura e cantos. Iste dominio lingual ancora es assatis virginal pro Interlingua. Il existe un manata de romanes e novellas original. Il ha un cantario con cantos traducite de multe linguas, ma ubi es le registrationes?

Si alcun interlinguista succede crear un hit-melodia o un roman revolutionari, isto poterea esser un modo de eveliar interesse pro le lingua. 

Un lingua sin cultura es morte. Si nos vole attraher juvenes a Interlingua, nos debe crear cultura pro juvenes.

Un exemplo de que isto functiona es le cultura popular japonese e coreano. Multe juvenes se inamora in iste culturas quando illes ascolta K-pop, lege manga e specta anime. Isto los inspira ad apprender iste linguas que es difficile pro occidentales. Interlingua serea multo plus facile pro illes, ma ubi es le cultura excitante?

Nos ha creatores de cultura original, ma nos besonia multes plus. Con le tempore illes venira, le cultura de interlingua crescera, e al mesme tempore le interesse pro le lingua.

Le jardin del extasis


Prende mi mano

Nos va a tu jardin

nam ibi io nunquam esseva

Isto es le jardin del amor

que plenate es de cosas mirific

 

Lassa me sentir le fragrantias seductive

que titilla le naso et evelia

le desiro del corde e del labios



Lassa me sentir

le molle e tenere herba

sub mi nude pedes



Lassa me sentir le sol sur mi cute,

assi que io deveni febril,

assi que le sanguine bulli

e le sete me subjunge



Lassa me devenir un ape

que va furtivemente inter dense petalos

pro satiar su sete

con le plus dulce nectare



Lassa nostre labios e linguas incontrar se

e jocar un longe tempore

usque que veni le extasis

e le vita attinge su culmine


Que nos vade lentemente

inter arbores e arbustos

assi que illos caressa

e gratta nostre cute



Que nos nos immerge in le piscina

pro refrescar nos in le aqua tepide

Io vole caressar tu molle capillos



Nos es vestite in le habitos del paradiso

Nos ride e ambe vole revenir

al herba molle sub le sol

Tu es mi dea e io es tu deo



Perla nigre


Perla nigre,

quando io te trovava?

Ante le alba,

camminante sol

verso nusquam


Io te trovava,

teneva in mi bracios,

lassava tu ardor passionate

revivificar mi corde congelate


Omne iste annos

io te non poteva trovar

nam tu esseva sepelite

in le fundo del sablo

in un costa distante


Sed tunc le terra tremeva

e le mar se levava

Toto cambiava

Litores se submergeva

e roccas emergeva


Nove lumines nasceva

et edificios con multe fenestras

cresceva como fungos

Le vita evolveva


E ibi io era

Un vetere spirito in un nove terra

Sol camminante verso nusquam

Sur vias nunquam vadite


E io te trovava,

in mi bracios te prendeva

Demandava: ”De ubi es tu?

E ubi tu va?”


Nos parlava tote le nocte

del terra e del aquas

del ira e del chaos

e como sanar le mundo


Nostre spiritos trovava synergia

Nos sentiva le commun ascendentia

Nos ambes nasceva in le mesme stella

e cresceva al mesme terra


Amor solmente pote exister

inter duo spiritos

e amor es le nutrimento

que cata spirito besonia


Alora, quando io vadeva

al via incognite,

camminante sol verso nusquam

io era affamate e quasi morte

usque io te trovava


Tene me, non me quita!

Si ora io te perde,

tu sera disparite

durante milliones annos


Que nos nutri le un le altere

con le amor pur del anima

Que nos edifica un oasis

in le deserto de odio


Que nostre cordes se fundera

deveniente un astro luminose

que illuminara le mundo obscur

e sanara su vulneres


Nos nasceva in un stella

e de novo devenira stellas

Nos es hic al terra

pro apprender como brillar


E cata incontro es un scintilla

Cata surriso es un fanal

Cata imbracio es un focar

e cata basio - pyrotechnica


Perla nigre,

ubi io te trovava?

Justo ibi fortuna te poneva,

al via nunquam vadite


Transformar le mundo con odio


Certe personas potente

transforma le mundo con odio,

lor spiritos sepelite

in le fundo del inflate egos


Illes es cec

e destrue bon cosas,

edificate durante generationes

e nutriente prosperitate


Le historia se repete

Suffrimento nos attende

Esque tu pote sentir mi timor,

mi belle perla nigre?