Nove pecunia in Svedia

Chronica publicate in Panorama in interlingua no. 3/2016. Le cambiamento de notas bancari e de monetas jam es complite.

Durante 2015 e 2016 in Svedia son cambiate tote le notas bancari e monetas excepte le moneta de dece coronas. Isto es le plus extense cambio usque nunc in iste pais. Le nove notas bancari son plus difficile a falsificar e le nove monetas sera plus legier e sin nickel, lo que certo allegrara multe allergicos contra nickel.

Nove facies orna le nove notas bancari: Astrid Lindgren, le autor del libros successose de Pippi Calcea-longe, reimplacia le laureata del precio Nobel de litteratura Selma Lagerlöf (20 coronas). Le trobador e compositor de cantos Evert Taube reimplacia le legendari soprano del dece-none seculo Jenny Lind (50 coronas). Le stella del films Greta Garbo substitue le botanico Carl von Linné, le creator del systema de classification botanic (100 coronas). 

Le nove nota de 200 coronas monstra le director scenic Ingmar Bergman. Al notas de 500 e 1000 coronas le vetere reges Karl XI e Gustav Vasa debe renunciar lor placias al cantatrice de opera Birgit Nilsson e le previe secretario general de ONU Dag Hammarskjöld. 

Le moneta de un corona, olim in un color metallic, ora habera un color de cupro. Le moneta con le nove valor de duo coronas habera le mesme color. Le moneta de cinque coronas es transformate del color metallic al aurate, alora similante le moneta de dece, le sol moneta que non es toccate del grande excambiamento. Le monetas monstra le rege Carl XVI Gustaf e su sigillo.

Simultaneemente con iste grande excambiamento le uso de moneta contante in Svedia cade constantemente. De plus in plus de personas paga con carta e le ultime annos il ha occurrite plure alternativas pro pagamento con telephonos intelligente, le quales nunc quasi omnes possede. Hodie solmente duo percentos de tote pagamentos son facite con moneta e intra cinque annos isto es estimate cader a un medie percento.

Si le Banca Svedese habeva sapite isto ante cinque annos, quando le decision del excambiamento era prendite, an illes haberea decidite alteremente? 
Nos vive in un tempore de cambiamentos rapide. Monetas e notas bancari, iste ancian medios de pagamento, hodie son marginalisate. Le pecunia es in le processo de transformar se de objectos concrete a cifras binari in le cryptate systemas computatorial del bancas. Illo ha movite de cistas protegite de muros a servitores protegite de firewalls.

Nunc le sparniatores de moneta in matrases ha le carga urgente de excambiar su vetere notas e monetas. Multe notas de 500 e 1000 va, post de haber essite celate durante multe annos, de novo vider le luce del jorno. Le vetere pecunia refusa ceder, nonobstante le furiose avantiamentos del technica.
Ma su lucta es van. Alcunos previde le disparition total del moneta contante in Svedia jam intra trenta annos. Forsan le nove notas e monetas son le ultime manifestationes physic del corona svedese. Ma in multe altere paises le contantes probabilemente remanera durante un tempore bastantemente plus longe.