Le canto vetere

Audi le canto vetere

que nasceva ante le duo grande guerras

le cantator es morte

ma le canto ancora vive

Le anima ha disparite

ma su opera ha remanite

Nos son invitate a sequer

le tracias del passate

amor, dolo, joia e spero,

tracias que ha supervivite

le pedes que los ha create

Qui sequera nostre tracias?

Partita

Finalmente le tempore veniva:

io lassa iste domo

e nunquam revenira

Io specta al parietes del memorias

al tectos del risadas e al solos del lacrimas

admira le vista le ultime vice

specta le arbores familiar

Io lassa detra me vinti-novem annos

un capitulo del vita es claudite

e nove cameras me attende

Le cascada

Le cascada canta

su melodia murmurante

e die e nocte

ab crepusculo ad alba

e ab alba ad crepusculo

In primavera, estate e autumno

su aqua flue liberemente

ma in le hiberno su sonos deveni assurdate

per un copertura de glacie

con ornamentos abundante

Durante periodos pluvial

e le disgelamento

illo jecta al basso aqua furiose

que strepita e spuma

ma durante periodos de siccitate

le aqua flue scarsemente

e quietemente

Le vita dualistic

Cata momento

nos mori e nasce

cambiamento

le vita se misce

con destinos amate

odiate, expectate

le ultime passo

e anque le prime

perdita e successo

io me gaude e time

le vita dualistic

del pessimista optimistic

Duello del amor

Cute a cute

labios a labios

Io explora tu formas

con mi manos calide

Io ascolta tu respiration

que deveni sempre plus celere

Tu te torque in delecto

disordinante le lecto

Lento le linguas balla

lor molle dansa passionate

Schermi in le duello del amor

ubi ambes deveni ganiatores

Io caressa tu capillos al latere

pro poter admirar tu visage

Tu surriso evelia le mie

e le duello amorose recomencia

Tosto io entrara

in le plus sacre templo

Le templo del vita e del joia

ubi mi suspiro sera satiate

e ubi le miraculo es create

Le prime die

Instinctivemente 

le infante neonate

cerca le sino del matre

recognoscente su voce e fragrantia

Le funiculo es secate

e le nutrimento debe trovar 

un nove via

Le vita interior ha finite

e le vaste mundo attende

Neonate

Un infante neonate

es plus que solo

le summa de su genitores

Illo es un nove voce

in le choro del humanitate

un nove stella

in le firmamento del vita

un individuo unic

qui attende a camminar

su proprie via

Matre e infante

Lacte e teneressa

flue del matre al infante

creante le plus forte

ligamine del amor

E corpore e spirito

son nutrite

Le bracios del matre

son le loco del plus profunde 

securitate

Le matre ha generate

un nove existentia

e facite le mundo

sempre plus vivente

Le cubo de Rubik

Le cubo de Rubik:

sex lateres

sex colores

octo angulos

octo alternativas in cata movimento

duo-dece bordos

40.320 modos de arrangiar le angulos

239.500.800 modos de arrangiar le bordos

43.252.003.274.489.856.000 combinationes in toto

Le puera de octo annos demandava su patre:

"Papa, esque on pote solver iste cubo?"

"Si, isto es possibile,

ma io non sape como facer."

Le puera se sedeva con le cubo

e lo tornava e tornava

tornava e tornava

tornava e tornava

tornava e tornava

trovava un methodo

e finalmente succedeva

Le cubo de Rubik es un parve miraculo

ma infantes son mesmo plus grande, parve miraculos

Como on pote creder?

Como on pote creder
sin saper?
Forsan le sentimentos
son plus intense del pensatas

Como on pote creder
sin vider?
Forsan le visiones
son plus real que le vista

Como on pote creder
sin probar?
Forsan le fidantia
es lo plus forte de toto

Mundification primaveral

Io netta con aspirator
e omne floccos de pulvere
e vetere preoccupationes dispare

Io essuga con un scopa a frangias
omne le maculas e peccatos prescribite

Io lava le plattos, le casserolas
e mi confidentia
assi que illos deveni lustrose, brillante
e sembla esser toto nove

Io jecta in le lavator
mi camisas immunde
e mi neuroses odorante de sudor
-illos debe ser lavate durante un hora a 40 grados

Io netta le fenestras
que ha colligite tracias de pluvia polluite
e de adhesive prejudicios

Io furbi mi bottas et exi
-le vetere sordidessa sera replaciate per le nove

Humorismo

-Qual es tu credentia?

Christianismo? Judaismo? Buddhismo?

O es tu atheista?

-No, io es humorista!

Le senso del vita es rider!

Le clowns son sanctos

e le comicos prophetas

Que nos finira omne le guerras con risadas disarmante!

Le deos deride nos, ergo que nos deride les

Multe tragedias son comedias disguisate
e quando le philosophos ha plorate via omne lor lacrimas,

illes ride

Sonios de beton

Video e musica per Jari Ylamaki

Milliones de homines
milles de edificios
yo vade in le labyrintho
labyrintho de beton
beton e ferro
asphalto e vitro

Impressiones kaleidoscopic
satura mi vacue mente
crea memorias vital
e pensatas ardente

Yo passa Chinatown
e admira le belle signos
que yo ancora non comprende
Le Batmobile passa
duo pueras ride in le pluvia
un viro costumate como Le Joker
se sede in un auto
Un statua vivente
reposa sur un banco
e duo statuas del libertate
parla con touristas
post dece-un secundas
illes potera passar le strata

Le citate sempre luce
lampas replacia le sol
su panorama ornamenta
le profunde horizonte
Trans le nocte brilla
le fenestras del gigantes
a lor pedes cammina gente
inter neones multicolor

Aves de metallo
veni e vade
livra e prende
gente  e merces
dispare e reappare
detra le symmetric
montes artificial

Le citate se move
autos flue in su venas
viros e feminas
plena su corpore
Toto es connecte
in le urbe pulsante

Un barca me prende
a un excursion
yo mira le citate
diminuer se in le distantia
Le vegetation
e le aqua murmurante
calma mi mente ardente
Un aerogenerator rota
detra le arbores

Matino celeste

Io sapora mi somno nebular
inter surridente angelettos
inveloppate in albe molle conforto
Ventos suspirante cuna nos omnes
e nos plena con le virtute pur

Le luce me evelia
io saluta le die nove
e pois accompania un radio solar
a basso al justo eveliate mundo