Le domo symphonic

Le domo es un symphonia

Illo ha quatro etages

Io aperi le porta

e entra al cavia de scalas

Io ascende le scala

Do-re-mi-fa-so-la-si-do

Al prime etage

habita le familia Lignos

Detra le porta on audi

un polyphonia de voces agitate

Flautas e oboes sona ”Allegro con fuoco”

-Il ha un incendio!

Fratre Fagotto trova le extinctor

e extingue le foco

Io ascende le scala

Do-re-mi-fa-so-la-si-do

Al secunde etage

habita le familia Chordas

Detra le porta on audi

musica suave – ”Andante cullante”

Le familia ha siesta post le prandio

e le minores se ha addormite

Mamma Viola cuna le bebe

Io ascende le scala

Do-re-mi-fa-so-la-si-do

Al tertie etage

habita le familia Percussion

Papa Tympano conta un scherzo

e le cymbalos ride in alte voce

Io ascende le scala

Do-re-mi-fa-so-la-si-do

Al quarte etage

habita le familia Corno de Chassa

Illes ha le melior vista

al silva adjacente

e sona un forte fanfar

in honor de illo – ”Rondo-Finale”

Io batte lor porta

e illes me lassa entrar

Io toasta con mi amicos

Cata un ingluti su Jägermeister

durante que le melodias del cornos

echoa trans le foreste

Le fin es sempre le mesme

Quanto longe tu battalia

tanto longe tu vive

Quanto longe tu ha un scopo,

tanto longe le gambas pote marchar

Quanto longe tu pote tener le scuto

tanto longe tu pote repeller le gladios

Quanto longe tu pote critar

tanto longe tu terre tu inimicos

Quanto longe tu senti rage

tanto longe tu ha fortia

Ma le fin es sempre le mesme

Le terra te attende pacificamente

Alcunos dice que le tempore va

Alcunos dice que le tempore va,

ma certe dies illo sembla ballar

con horologic rhythmo tictacante,

faciente pirouettes elegante,

assi como rapide agulias

in le manos de un infante

que con enthusiasmo torna le vite

e con haste cambia

matino a antemeridie,

antemeridie a postmeridie,

postmeridie a vespere

e vespere a nocte

Alcunos dice que le tempore va

ma certe dies illo sembla reper

como un vetere, exhauste tortuca

que ha claudite su oculos

nam toto illo jam ha vidite

e nusquam vole ir

Totevia illo continua reper,

solmente per habitude,

e pro trainar su juncturas dolente

Alcunos dice que le tempore va

Alteres opina que illo vola

como un gris columba silvatic

que con energic colpos del alas

in octobre vola de Scania a Catalonia,

super urbes, agros, montes e fluvios,

sin pausa o reposo

Alcunos dice que le tempore va,

e a vices illes ha ration

Illo cammina como un currero

de porta a porta a porta

e distribue le posta importante

conscientiosemente:

litteras del autoritates,

litteras de amor,

reclamos, cartas e pacchettos,

plenante le vita del homines

con cargas e affaires

que los sempre occupa

e face le tempore

vader, dansar e reper

Bifurcation

Le historia nos pulsa in avante,

nos fortia seliger le cammino,

ma con cata passo, nonobstante,

le via bifurca, celante le destino

Picturas del vita

Colores es como emotiones,

a vices apparente in lor pur stato,

ma le plus sovente in combinationes,

al pictura del vita, in plure stratos 

Le historia duce le pincel del sorte

super iste grande pictura del vita

e pinge contos de nascentia e morte,

del successo e del cadita

Le historia capriciose

face cata pictura sin par,

modeste o majestose

o bellicose o amical 

Es tu vita un pictura de Michelangelo,

belle, luminose e spiritual,

benedicte de Deo e su angelos

e pace perpetual?

Es tu vita un pictura de Renoir,

in molle optimistic colores?

Apud Pont Neuf un large trottoir,

con insolate promenatores

Es tu vita un pictura de Goya,

dramatic e captivante?

Obscuritate plus grande que joia

ma interessante, nonobstante

Es tu vita un pictura de Dalí,

phantasmic e surrealistic?

Pingite con liquide phrenesi'

e talento equilibristic

Es tu vita un pictura de Munch,

saturate de angustia e crito?

Dies difficile tu ha tunc,

con un intense colorito

Es tu vita un pictura de Kahlo,

un portrait de un forte persona,

que trova joia malgrado dolo,

un ver regina sin corona?

Es tu vita un pictura de Cézanne,

plenate de fructos, sol e natura?

Esque tu promena al stratas de Gardanne

saporante estive aventuras?

Es tu vita un pictura de Picasso,

occupate de formas inexpectate?

A vices silentio, a vices fracasso,

un vita ric, plen de audacitate

Tu proprie pincel forsan tu prende

e pinge le pictura de tu existentia

Tunc le fortuna al fin tu comprende

Super tu proprie vita tu ha potentia

Mi desiro a te

 

Mi desiro a te

es un parte de me

Nos vade insimul

malgrado le distantia

Io ride con te,

plora con te,

parla con te,

ma nulle responsa

Io sonia que io te tene

in mi brachios

ma pois me evelia

solitari in lecto

Forsan in un universo parallel

nos es insimul

vadente trans vita,

mano in mano,

compartiente nostre calor

durante frigide hibernos

Nos nos bania in le laco de amor

Caressa con aqua le un le altere

Satisface nostre sed

con multe suave guttas

Satisface nostre fame

con basios profunde

Tu pone dulce uvas in mi bucca

e io basia tu digitos

Pois io te lassa gustar

mi plus sapide succo

Tu voga apud me

levemente, in le tepide aqua

e lassa le sol descendente

donar te su ultime calor

e quando le nocte finalmente perveni

nos ancora es insimul

in un altere mundo

Mi desiro a te

es un parte de me

e quando io sonia

io senti tu calor

Un viage naval

Io viagia in un nave

trans dies e noctes,

inter nubes e stellas,

sub sol e luna

Le celo es un pictura artistic

con arte abstracte in intense colores,

sempre in movimento, sempre unic,

a vices frigide, a vices ardente

Luce artificial crea un linea

al longe del distante horizonte

Nos nos approxima al urbe costal

Grues colossal nos da le benvenita

Reposo in porto, le carga es prendite

Le grues labora febrilmente

Le celo se move ma le nave es immobile

Le timonero dormi in su cabina

In nocte es le tempore pro partir

Le luces del porto illumina le nubes

Al alte mar, un tempesta de tonitro,

tosto replaciate per le celo nocturne

In nocte le vascello es un nave spatial

Le vaste mar es le cosmic vacuo

e le firmamento circumferente

monstra constellationes in tote splendor

Crasse nubes lassa pluvia cader

Celo e mar se vesti in gris

Vento, aere e aqua spumante

sempre dansa su violente ballet

Le proxime nocte, le luna es plen

Illo torna le nocte in un die spectral

Pallide nubes sub pallide astros

Jalne luce de barcas in lontanantia

Isto es barcas piscatori,

que plena le Mar Chinese Meridional

Illos brilla como soles crepuscular in fila

attrahente sepias con le luce intense

Le ample oceano me da un sentimento

de libertate total e unitate con toto,

malgrado servicio naval durante menses

Le corpore captive, le mense libere

Nos entra un archipelago

Al insulas, multe domos

Nos vade sub le ponte, inter barcas

Le porto de matricula se approxima

Le SAOB

Chronica publicate in Panorama in interlingua, no.1, 2022

Le scriber de dictionarios es un travalio minutiose, que require multo de methodic labor e patientia. 

Le integre processo sovente require plure annos.

Le interlinguistas que diligentemente labora con lor dictionarios, e a vices senti frustration proque le dictionarios require tante tempore pro devenir complite, io pote consolar per contar de un dictionario que ha prendite multissime tempore a elaborar per un integre equipa de expertos.

Il se tracta del SAOB, Svenska Akademiens Ordbok, Le dictionario del Academia Svedese.

Le Academia esseva fundate jam in 1786 per le rege Gustav III. In le statuto del Academia il esseva establite que on debeva crear un dictionario del lingua svedese.

Le ver labor con le dictionario solmente comenciava in 1883. On documenta le lingua del comencio del dece-sexte seculo, usque le tempore de scriber. On explica le parolas, da exemplos, citationes, e le etymologia.

Le ambition esseva que on potera finir le dictionario post circa 20 annos. Ma quando quasi 40 annos habeva passate, in 1920, on solmente habeva attingite le littera D. Le entratas esseva extrememente detaliate e exhaustive.

Le Academia Svedese non esseva contente con le tempo de labor. Certes voleva que le labor cessarea. Ma al fin on lassava le labor continuar. Post isto, le lexicographos laborava plus rapidemente. In 1960 on habeva attingite le littera R.

Le littera sequente, S, es le plus frequente littera initial de parolas svedese. Al mesme tempore veniva un nove director del equipa de lexicographos. Ille voleva retornar a un plus detaliate modo de laborar. On laborava 40 annos con le littera S. 

Hodie, in 2021, un equipa de circa 22 linguistas labora con le dictionario. On dice que il ha un bon balancia in le labor, inter meticulositate e effectivitate. Le publication ha attingite le littera Å. (Post Z, le alphabeto svedese ha le litteras Å, Ä e Ö). On dice que on spera finir le labor in circa 2024. Nos videra…

Le SAOB existe in le rete al adresse saob.se. Illo es un popular dictionario inter academicos e homines interessate del lingua svedese.

On dice que Roma non esseva edificate in un singule die. Le facto es que on nunquam finiva edificar Roma. Le citate se sempre cambia, ma solmente poco a poco, e multe ruinas e domos historic remane durante le seculos. Ma le facto es que cata vivente citate, e cata vivente lingua se cambia. 

Le domos es como parolas. Certes remane durante longe tempore, alteres es destruite o non plus usate. Illos remane solmente in photographias e in dictionarios historic como SAOB.

Le prime litteras de SAOB esseva scribite plus que 140 annos retro. Quando le dictionario sera complite, on debera comenciar le labor de novo, de A. On debera scriber supplementos, o rediger le parolas de novo.

Assi un tanto grande projecto lingual nunquam finira. Quando on post 140 annos attinge le fin del alphabeto, le lingua se ha cambiate, e le labor comencia de novo. Forsan in le futuro, on habera un plus dynamic modo de laborar con le dictionario, per exemplo per actualisar tote le contento, dependente de qual neologismos e cambiamentos de significationes il habera.

Addendum, septembre 2024.

Le dictionario esseva complite in 2023. On ha assecurate financiamento pro actualisationes de illo durante 2024-2034. Le actualisationes sera publicate solmente in forma digital.

Radios lunar

Radios lunar cade

al frigide cimas del arbores

Non omnes dormi

Le gaudiose perditor

Si on sempre gania,

le joco deveni tediose,

alora io me gaude

quando a vices io perde

Choro unisone

Nunc crepusculo

Silentio in le jardin

Monachos canta

Volar e camminar

Ante de volar,

apprende camminar

Ante de parlar,

apprende ascoltar