Chronica publicate in Panorama in interlingua, no. 2-2018
Sovente io lege
libros pro infantes con mi filia de quatro annos. Multe de iste
libros tracta de animales le quales joca, apprende cosas e
experientia diverse aventuras. Le infantes ama animales! Illos ha
distincte formas e colores e face sonos amusante e excitante. Illos
monta arbores, cammina trans le savanna, nata sub le superficie del
aqua e vola inter nubes.
Le infantes incontra
certe de iste animales in lor vita quotidian. Canes, cattos e aves on
trova in multe locos. Ma in le libros del infantes il anque ha multe
animales exotic, como simias, girafas et elephantes, le quales nostre
infantes urban rarmente vide. Isto solo occurre durante visitas al
zoo.
Proque son le libros
pro infantes populate de animales rar, que a pena son relevante in
lor vita? Esque il non serea melior concentrar se a homines, autos e
apparatos technic, le quales hodie plena le vita del homine moderne?
Forsan non. Il pote
esser bon que nos rememora le contexto que ha formate nostre
disveloppamento human: le natura salvage. Nos ancora es un parte del
natura, nonobstante le facto que nos face toto lo que es possibile
pro alienar nos de illo.
Hodie plure del
amate animales del infantes son menaciate per extinction. Il solmente
remane alcun milles tigres salvage. Le chassa furtive quasi ha radite
le population del rhinocerotes, e le numero de elephantes se diminue
drasticamente, del mesme causa.
Il ha multe causas
pro proteger e conservar animales menaciate de extinction, e hic es
ancora un: le infantes los ama! Ergo, que nos lucta pro preservar
los, assi que omne le infantes in le futuro tamben potera vider con
su proprie oculos le apparentia real del protagonistas del libros pro
infantes!
Forsan le melior
dono que nos pote dar a nostre infantes es un donation a un
organisation que labora pro guardar e preservar animales menaciate de
extinction.
Fonte del photos: Wikipedia
