Approfundamento

Nubes se reflecte in aqua

Aqua se reflecte in celo

Petras seca nude,

frigide pedes

Si illos se approfundara

in abysso invisibile

frigor devenira calor

e aqua se mutara a nubes

e le tremule, perdite

homine errante

sera imbraciate del sol

que ante longe tempore

abandonava le terra

Mundification imminente

Le cupa de banio se plena

Grande expectationes

Le aqua es calide

Al bordo

Io sta al bordo
del oceano
Debe io tardar
o immerger me
in le aqua?

Le undas agita
seductivemente
ma que attende
in le profundo?

Ci in alto
es difficile respirar
ma io non sape
si de novo devenir
un pisce es possibile

Io es lasse
del spectar le arbores
e le frigor me tormenta
ma forsan le aqua
es ancora plus frigide?

Le memoria del aqua

Le memoria del aqua

sanante, curante

ancora es un mysterio

Bebe un gutta

del inconcipibilitate

e senti le miraculo

Si tu vole comprender

tu deveni confundite

Si tu vole creder

tu attinge pace

Si tu vole ser sanate

tu deveni curate

Lassa le liquido

circumferer te

descende al mar vivente

e lassa lo baptisar te

in le nomine del Presentia Incognite

que es preservate in le memoria

del aqua sanante

Undulationes

Undulationes al aqua

le petra que los causava

jace al fundo

Aqua oceanic

Que dice le aqua oceanic

que unda post unda

lava nostre litores

...del animales marin

le quales illo ha sustenite e caressate

durante milliones de annos?

...del forte ventos

que sempre agita le superficie

ma nunquam disturba

le profundos pacific?

...de su evaporation,

migration trans le celo,

cadita sur montanias

e finalmente le retorno con fluvios

a su origine?

Descende al aqua

e nata via

lassa le sagessa del oceano cunar te

usque a tu te uni con illo

e postea,

transformate,

reveni al terra firme

Molle undas

Sempre le mar ha lavate

le plagias con molle undas

e sempre io sera

plenate con gaudio seren

audiente aqua fluente