Le viage del sol hibernal

In le matino,

le sol prende un promenada hibernal

Illo tocca le tenue ramettos

coperite de pesante nive,

cautemente trovante su via

preter le fumante casa de banio

Illo cerca homines

ma le camminos es vacue

Solmente remane tracias

del copiose camminatores de heri

Curte es le viage

del sol hibernal

super le frigide terra boreal

ma post su retorno

al somno hyemal,

rigide corpores fatigate

ancora se caleface in le ardente

sauna vaporisante

 

Esseres del pais hibernal

Io es tanto fatigate

como le arbores

Illos dormi tote le hiberno

Nigre folios al solo

se misce con le gravella

Le vita prende un pausa

le spisse copertura

del obscuritate

inveloppa le esseres

del pais hibernal

Tosto hiberno

Tosto hiberno

-frigide inferno

o un saison

de activation?

Skiar, patinar,

divertente se ben,

natal celebrar

e Silvestre tamben,

le hiberno rende

bastante placente

Qui le chance prende

se amusa, vermente!

Congelate bullas de sapon

Un matino hibernal

io suffla bullas de sapon

Illos cade al nive fresc

e se rigidifica

Micre crystallos de glacie

rapido comencia crescer

Stellas e filices toto blanc

tosto plena le integre sphera

Un mundo unic es create

con su proprie formas e figuras

Un momento deveniva solidificate

e postea attende su dissolution

per le radios solar vaporisante

o per leve sufflos de aere

Pensatas blanc

Frigor titilla l'interior del naso

Gelate cerebro trova pace

Nive oblida hiberno

sed ancora pensatas son blanc

Que frigor congela l'armas

Que glacie extingue focares del ira

e quando l'estate finalmente veni:

que columba blanc como nive

face su nido vicin nostre domo 

Svedia hibernal

Obscuritate ha devorate

le Svedia hibernal

e le nive ancora tarda

Io vade somnolente

trans stratas durante crepusculo

Quando le sol ha disparite

le lumine distante del stellas

face le spero superviver