Le multi-instrumentalista

Mi bon amico Giovanni Battista

es un multi-instrumentalista

Cata instrumento ille pote sonar

e sempre le publico multo amusar

Mi bon amico Giovanni Battista

es un excellente pianista

Sempre quando ille sona un sonata

plora amarmente su car amata

Tote le nocte ille sona le harpa

battente in rhythmo con su scarpa,

ma ille lo tocca tanto fortemente

que le cordas se rumpe, guai! Sovente...

Mi bon amico Giovanni Battista

es un multo brillante violinista

Quando ille sona Paganini

malgrado protestas ille non fini

Le guitarra classic ille anque tracta,

con accordos barré e scalas lucta

Le digitos se perde sovente al manico,

le movimentos es los de un spastico

Mi bon amico Giovanni Battista

es un experte organista

In dominica durante le missa

ille sona cantos de Suissa

Mi bon amico Giovanni Battista

Es un passionate mandolinista

Ma sempre ille perde le plectro

e dice: "Lo furava un horrende spectro!"

Ille anque sona le kalimba

con su camerada Simba

Ma illes sona melodias differente

assi imbrutiente tote le ambiente

Le sousaphono es su favorito

ille lo sona in su jardin

non audiente le horrende critos

del tormentate residentes vicin

Le tunnel

Que es lo que me attende

al fin del tunnel?

Quando io lo attingera?

Esque le lumine

disgelara mi congelate membros

o comburera mi oculos?

Il es difficile a respirar

Le apertura se diminue

Toto deveni nigre

Toto deveni blanc

Lo que seque

es un secreto

Quarantena

Io specta trans le fenestra:

Deserte stratas
Le celo es vacue
Nulle aviones,
solmente aves in arbores

Le aere es pur
ma sembla esser frigide
Le radios del sol ponente
consola le mundo timorose

Al ponte, nulle automobiles
Illos es in garages, a parcamentos
Le ponte reposa
post un longe tempore

Le trottoirs desira bottas
que se move
Le cardines del portas se rigidi

Le tragedia silente
levita como un spirito
super le citate dormiente
et exhala su sufflo al domos

***

Io sede in mi camera
Le parietes me specta
e io specta al schermo

Le computator es connectite
al systema nervose del mundo
Illo senti toto e me dice toto

Le aere es suffocante 

Io aperi le porta al balcon
Multes ha facite lo mesme
Le homines es insulas
e insimul nos es un archipelago:
isolate ma non sol

Un die le aqua que nos separa
se vaporisara e creara nubes
que longemente flottara super nos
admonente nos de iste dies

Dansa cosmic

Le musica me jecta a dextre, a sinistre

Io face le prime passos del circulo

Le movimento nasce ex immobilitate

Silentio demora in motion

Le molle veste

caressa mi corpore

Le arbores me specta

Io senti lor fragrantia

Io crea nove mundos in le sablo

Cata grano es un universo

Mi pedes es pinceles

que pinge un mandala

Le musica nunquam fini

Le tempore es immortal

Le integre historia es ora

Solmente existe variation e repetition

Le dansa existeva ante nostre mundo,

ante le nascentia del sol e del stellas

Le cosmo sempre ballava, respirava

Su molle movimento vive in me

Tu vide como io gira a dextre, a sinistre

ma io vide como io es toto immobile

e le mundo circula circum me

caressante e battente mi corpore

Io es in trance, sasite del eterne melodia

Illo pulsa intra me, dante me fortia

Io senti le joia e le dolor del mundos

e como illos glissa inter agitation e calma

Io es un galaxia e le cellulas de mi corpore

es soles e planetas que nasce e mori

Io es e unic e multiple:

Unitate e fragmentation in interaction

Io tocca le vento quando io balla

Le aere me frigida e le sol me caleface

Mi halitos ardente se disperge inter arbores

e pois dispare ad grande distantia

Io dansa al bordo de exhaustion

Un extasis pungente batte in me

Le musica pausa e io me arresta

subito retenente mi respiration