Bon Natal 2019!

Pictura per Yelling Rosa. Clicca pro aggrandir lo.

Natal Bon,

con cibo gustose,

celebration

in modo spirituose!

Bon Natal,

con multo de nive,

vita familial,

joia intensive!

Rotas dentate

Nos es rotas dentate

Nos circula, repete,

circula, repete

Nos sempre guarda le mesura

e audi le tictacar

Mi movimento es antihorologic

e le tue horologic

Nostre interaction es sempre logic

Nos nunquam deveni fatigate

Sempre nos circula

totalmente inebriate del vento vorticose

del tempore

Que le horologio sia functional

ancora multe annos

proque tote le rotas dentate

vole viver e mover se!

Le resorto es le corde

que sempre pulsa

Cata die illo es remontate

del mano del Deo

Le tictacante musica minimalistic

me duce al trance,

me anesthesia a in tranquillitate

ma io sape que illo te irrita

usque al limite de insanitate

Nos es rotas dentate

in un horologio mechanic

Nos ha contate cata secunda

de nostre vita

Nos ha luctate con le horas

e meditate presso le dies

sempre repetente nostre mantra

Tu rota rapido

e io rota lento

ma un die nos nos arrestara al mesme tempore

Le resorto pulsara de plus in plus debilemente

Le tempore stoppara

e nos nos dissolvera

Ma ancora curre le tempore,

ancora tictaca le horologio

e ancora nos rota

Tu rapido,

io lento


Version instrumental:

Tu basia mi aures

Audi con auriculares (casco audio) 

Tu es tanto proxime,

respira in mi aures e los basia

Io senti tu calor,

tu manos a mi capite

Tu es distante

ma nonobstante tanto vicin

Tu me da teneressa

e me face e calme

e excitate

Quando io claude mi oculos

tu sembla esser mesmo plus proxime

Quando io me pone al lecto

io senti tu peso

quando tu jace super me

Le sonos del amor

flue trans tempore e spatio

e nos uni

de novo e de novo,

nam amor non cognosce distantias:

illo es hic e nunc,

presente, tenere, caressante,

calme e calide

Tu face le amor con mi aures

e le spirito se delecta

Io me addormi e plana in alto

verso le stellate firmamento

e ibi es tu,

volante verso me

Tu basia mi aures in realitate

e caressa mi facie con tu capillos

Io te imbracia fortemente

usque le fin del sonio

Le silente aeroporto

micro-novella

3 de novembre 2059, 8:48 in le matino

Io vade lentemente trans grande, vacue salas. Il es tanto silentemente. Io solmente audi mi proprie passos, le vento que mugi in rumpite fenestras e critante laros in distantia.

Io vide longe rangos de sedias e sofas. Lor stoffas ha devenite maculate e discolorate del humiditate.

In le automatos io vide bottilias con biberages refrescante. Le etiquettas ha devenite pallide ma le contento ancora ha le colores original brun obscur, jalne e rubie. Un tenue strato de musco partialmente coperi le pavimento.

Un televisor ha cadite al solo. Illo jace con le schermo in basso. Presso illo, il ha fragmentos de vitro.

Io me approxima a un grande fenestra. Un mus curre via al longe del pariete.

Foras io vide le pistas de volo, coperite de herba, arbustos e sporadic arbores.

Presso le gates sta ferruginose aeroplanos. A un de illos, le alas se ha inclinate in basso, usque le solo.

Le homines ha disparite. Le ruito, parlar, rider e plorar ha disparite. De novo io audi le vento sibilante in le fenestras rumpite e le aves lontan. Io surride e un lacrima lassa mi oculo. Io me perde in memorias, cessa camminar e claude mi oculos.

Illos sembla tanto remote. Le annos quando toto se cambiava. Le annos quando le mundo se arrestava. Quando ruito deveniva silentio. Le turbas al stratas se cambiava a rar incontros.

E quando le rotas se arrestava le pedes comenciava camminar.

Quando le schermos se extingueva io in vice spectava le arbores, le domos abandonate, le mar e le insulas. Ma le majoritate del tempore io cercava mangiar.

Quando le citates cessava lucer, le celo stellate appareva durante noctes. Constellationes celate de novo se monstrava. Io los observava durante noctes solitari.

Io me torna e vade retro, verso le sol entrata que io cognosce: trans le fracassate fenestra a tote pariete. Io exi e senti le vento. Le sol matutin caleface mi frigide genas. Al grande parcamento sta large filas de autos rubiginose.

Io specta retro al aeroporto.

“Reposa in pace, edificio majestose” io dice con voce grave. “Reposa in pace, vetere mundo. A vices tu me manca, a vices non.”

Ora io vide mi navetta. Nos lo fixava a un vetere palo. Ellen remaneva in illo tote le tempore.

Io me imbarca cautemente e me sede con difficultate. Io es vetere e promenadas me fatiga multo.

Ellen surride. Le batteria con cellulas solar habeva cargate sufficientemente, alora illa pone le motor electric in marcha e duce le navetta al grande mar. Illa dirige le proa verso un parve puncto al horizonte. Isto es le insula ubi io ora vive. Ibi il ha juvene homines gentil que me adjuta ora, quando mi fortias se debilita.

Quando io observa le micre undas, io remarca alcun pinnaculos de grattacelos que emerge super le superficie.

“Esque tu videva alique interessante?” Ellen demanda.

“Io diceva adeo a un vetere amico” io responde. “Alora io al fin senti pace”. 

Bullas de color

Nos plana in un nebula

de scintillante, alterante colores

Illo es como un mar de pensatas

dansante, pulsante e torneante

Que tu prende mi mano!
Lassa me basiar tu digitos

Lassa me ducer te al brumas del sonios

Nos soniara insimul

in rubie, blau, rosee e verde

Nostre pensatas quita le corpores

Illos deveni micre bullas colorate

que scintilla, dispare

e renasce

Le pensatas balla dansas del corte

coram le rege del arco del celo

Illos flue le un al altere,

explora lo que es differente,

imbracia lo que es calide

e suffla lento a lo que es frigide

Le citates del colores es transversate

del fluvios de suspiro

Le homines es scintillas que accende le focos

que son visibile del luna

Tu es libere e io es libere

Nos pote volar a ubi nos vole

Io es verde e tu es blau

ma nostre amor es rubide

Nos lo glutina al parietes transparente

de nostre domo, le qual levita

un millia super le lampas del urbe

Io degusta omne le colores:

Le blanc gusta de gelato con vanilla

Le rubide es dulce como fragas

Le blau es fresc como mentha

Le verde es aromatic e inebriante

Nos escappa con le vapor

Omne directiones dispare

Omne vias duce in alto

Joia! Joia!

Nos renasce con cata halito

Nos vide cosas que nos nunquam habeva vidite

Le bullas de color susurra lor secretos in nostre aures

Le planetas face ruito

quando illos majestosemente passa

Jupiter sona como mille tubas e bombardones

e Saturno como un organo gigantic

que sona toccatas cosmic

Mercurio nos lassa audir flautas e xylophonos

que sona in contrapuncto minimalistic

in 32 partes

Nos vide nostre reflexiones

in mille rotunde speculos colorate

Nos es belle, ma in un altere maniera que nos habeva pensate

Le anatomia de nostre sentimentos profunde

se revela con simple beltate

Le vita es tanto simplice

Toto es colores, toto es amor

Le obscuritate ha disparite proque le soles es innumerabile

Le colores se misce

e crea sempre nove nuances

Nos nunquam deveni fatigate proque nos sempre vide alique nove

Nos nos teleporta de galaxia a galaxia

Nos es jectate del spatio rubide a nebulosas verde e blanc

Le stellas nos caressa

con radios que se forma in manos

Nos caressa le un le altere

e nos caressa fumante cometas passante

Le sentimentos caressa le pensatas

Joia nasce ex nihil

e balla ancian dansas

accompaniate de un extraterrestre orchestra symphonic

Le organo sona sin organista

Illo es programmate per le compositor immortal

le qual cognosce le frequentia de omne le stellas

Nostre cammino nunquam fini

Lo que sembla esser circulos in realitate son spirales

Lo que sembla esser repetitiones

in realitate es un variation elevate

Nos renasce con cata halito

Cata die es un palpebration

Cata anno es un ballo,

alora, que nos balla

suave- e dignemente,

jocose- e liberemente

Tene mi manos quando nos torna e gira

Que nos ascende de nostre domo

con un vortice usque le firmamento

ubi le bullas de color nos attende

Nos devenira como illos:

in extasis seren nos creara formas

que se unira e separara

Nos cantara longe tonos

que confluera in accordos dur e molle

e echoara inter le bullas de color

mulgente colores de lor interior

durante que le bullas anhelara con delecto

Le poema fini ma le musica continua

Le musicos del orchestra nunquam dormi

Le ballo del bullas de color perpetua

Le planetas proseque lor viage

Le pensatas e le emotiones approfunda lor dialogo

et emitte guttas de inspiration

que cade super le citates ubi le homines

accende lampas e candelas

Le rege del arco del celo es contente

Ille sede sur su throno in le plus alte domo

e claude le oculos pro poter vider le colores

Illa da bon saper

Illa da bon saper

Su bontate emana sapientia

Su bon sapientia es liberate

Le donar de sapientia la sana

Le bontate cognosce le dono de illa

Le saper donate de illa es bon

Su dono es sage bontate

Illa sana le cognoscentia de donar 

ona li pana e sona pona

pona ona li pana e sona

sona pona ona li pana

pana sona li pona e ona

pona li sona e pana ona

sona pana ona li pona

pana ona li pona sona

ona li pona e sona pi pana

Isto es un minimalistic poema in Toki Pona. Illo solmente usa septe parolas in differente combinationes. Le resultato es simple e naivistic ma anque enigmatic e profunde.

Le parolas de Toki Pona non es declinate e pote functionar in plure classes de parolas, dependente de lor position.

Hic es un explication del signification del parolas in le poema:

ona – (pronomine) illa (anque ille, illo, illos e illes)

pana – (verbo) dar, donar, emanar, liberar

sona – (subst.) saper, sapientia, sagessa, cognoscentia

(verbo) cognoscer

pona – (adjectivo) bon

(substantivo) bontate

(verbo) sanar

li – particula que monstra que le parola sequente es un verbo

e – particula que monstra que le parola sequente es un objecto directe (accusativo)

Le video es in Toki Pona e anglese proque le majoritate del tokiponianos usa anglese e probabilemente lo comprende  melior que Interlingua. 

Correction: "pana pi sona" debe esser "pana sona"

Domo calde

Io ha facite un video con iste poema in Toki Pona, usante quatro differente
systemas de scriptura: latin, sitelen pona (scriptura ideographic
inventate de Sonja Lang pro Toki Pona), kanji e hiragana (Japon) e cyrillic.

 

moku lon supa

tenpo suno li pini

tomo seli kin

Hic nos vide similaritates lexical inter Toki Pona e Interlingua:

tenpo=tempore, suno=sol, pini=fini, tomo=domo

(Le fonte del parolas latinesc in Toki Pona es Esperanto.)

Al ponte

Al ponte, in le luce del lampas

quietemente io audi

le delicate susurros del fluvio

Le celo lento perde su lustro

e le lumine del lanternas 

deveni plus forte

e lava le ponte 

con radios jalne e rubie

Le nubes passa, 

le aqua passa,

le homines passa,

ma io remane:

-proque io attende te

Io ha apprendite Toki Pona

Io ha apprendite le lingua Toki Pona.

https://ia.wikipedia.org/wiki/Toki_Pona

Con un vocabulario de 123 parolas e un facile grammatica e phonetica

illo es un del plus facile linguas del mundo a apprender.

On dice que on lo pote maestrar post circa 70 horas de studio.

Evalutante mi proprie experientia, io debe constatar que isto sembla esser ver.

Proque le parolas ha plure significationes dependente del contexto e pote esser combinate pro crear nove conceptos, on in practica ha un vocabulario de plure milles parolas.

Per exemplo "tomo tawa" ("domo movimento") significa "automobile".

"tomo tawa telo" ("domo movimento aqua") es un nave.

"jan pona" ("persona bon") significa "amico". Assi on non pote distinguer

inter un bon persona e un amico.

Un altere composite parola ambigue es "toki musi" ("parlar de arte") que pote significar e un canto e un poema.

"musi" pote significar e arte e amusamento.

Un grande restriction es le nomines de animales. Per exemplo "soweli" significa ulle mammal. Alora como distinguer inter un catto e un can?

Certe animales es plus facile a distinguer. Io lo realisava quando

io legeva un articulo super le "soweli pi lawa sewi" ("mammal de capite alte"). Pote vos divinar qual animal es isto?

https://tokipona.fandom.com/wiki/soweli_pi_lawa_sewi

Plure parolas functiona e como substantivos, e como verbos, e como

adjectivos. Alcun exemplos con "pona":

mi pona = io sta ben (adjectivo)

mi pona e tomo tawa = io repara le auto (verbo)

pona li pona e mi = positivitate cura me (substantivo e verbo)

pona! = ben! (interjection)

Isto es facile a comprender in phrases breve, ma in plus longe phrases con multe conceptos composite, on debe concentrar se pro poter deschifrar le message.

Ma le plus bon Toki Pona es le simple Toki Pona.

Le scopo del lingua non es devenir un idioma complete e avantiate.

Le scopo es simplicitate.

Le creator del lingua, Sonja Lang, lo usava pro decelerar su pensatas, viver in le momento e pensar positivemente.

Quando on debe simplificar su pensar, on pote discoperir su structuras fundamental e filtrar via omne le cosas non importante. On debe esser sincer. On non pote celar le veritate detra elaborate formulationes sin substantia.

In mi caso, io voleva probar le lingua como un instrumento de creativitate.

Potera io scriber poemas in iste lingua? - io demandava me mesme.

Le responsa es: si! Io poteva scriber poemas. Ma illos deveniva differente

que si io los scriberea in Interlingua o un altere lingua.

Quando restringite, le creativitate trova nove vias. Le nove parolas crea connexiones inter se e per isto nove pensatas. Le simplicitate es belle.

In basso vos pote leger duo poemas, le quales io presenta e in Toki Pona e in Interlingua.

Al photographias accompaniante io ha usate le scriptura hieroglyphic "sitelen pona", create per Sonja Lang. Cata symbolo representa un parola.

Io anque ha create explicationes ubi on pote vider le texto in toki pona (scriptura latin e sitelen pona) e in Interlingua, parola post parola.

Io ha scribite plure poemas in Toki Pona, le quales io potera presentar a vos durante le menses veniente, si vos lo vole.

Le sono del aqua

Interlingua:

Le sono del aqua
sana mi anima
Le tepide aqua
flue al foreste
Mi suave sentimentos
simila le sono del aqua
Le spirito del aqua
es in me

Toki Pona:

kalama telo
li pona e kon mi
telo lete lili
li tawa ma kasi
pilin suwi mi
li sama kalama telo
kon pi telo
lon insa mi 

Clicca al imagines pro aggrandir los.

Le chassator de dragones

Interlingua:

Le chassator de dragones

se approximava al grotta

Le dragon esseva al interior

Le chassator entrava al grotta

Illes combatteva durante un longe tempore

Quando finiva le combatto, le dragon exiva

ma su capite esseva lo del chassator

e le corpore lo del dragon

Le capite diceva: io vinceva super toto mal

Toki Pona: 

jan alasa pi akesi seli

li tawa tomo kiwen

akesi seli li insa

jan tawa insa tomo kiwen

tenpo mute la ona tu li utala

utala li pini la kama akesi seli

taso lawa ona li lawa pi jan alasa

sijelo ona pi akesi seli

lawa li toki ni: mi anpa e ike ale 

Clicca al imagines pro aggrandir los.

Stellas de amor e spero

Le universo es obscuritate
ma le stellas,
le micre punctos de luce
diffuse in spatio immense,
illumina le infinitate
e lo face belle, splendide

Non time le obscuritate
intra te mesme, intra alteres
tanto longe quanto scintilla
le stellas de amor e spero
in tu auguste spirito seren

Sonata lunar

In luce lunar

digitos cerca lor via inter claves

Le diurne dolos

in nocte trova reposo

Molle melodias consola le compositor

Tonos diffuse

son necate in sibilante susurro

ma illos son belle e perfecte

in le mundo de ideas

Notas crea parve undas al papiro

Trioles luctante vade in alto

con fortias deperiente del spero

Le gaudiose dies ha finite

e l'obscuritate es inclemente

Jam le sol se ha ponite

e le luna fugi trans le firmamento

Ma le musica continua sonar

cantar e consolar

Tonos plena le nocturne vacuitate

con obras de un homine solitari

Illos crea vibrante sculpturas aeree

que plana via ad assetante cordes,

de homines distante,

in quales illos sonara

tanto longe quanto remane

spiritos compassionate

sub le lugubre

pallide, languide

luna

Un poco de amor

Car amico,

Le amor nos circumfere cata die

Plus sovente illo non es forte e grandiose

ma veni in moderate morsellos

e nos da un poco de quotidian felicitate

Le amor es su proprie gratification

Illo nos da placer, gaudio,

suspiro e dolor

Illo da le vita color

Illo crea le contrastos

que es le condition pro ver experientia del vita

Illo nos da le sensation de unitate e fusion

que reflecte le fortia

que tene cosmos in su manos

Ma nos vive in un mundo

ubi le amor es complicate

Illo es miscite

con multe negative sentimentos

como timor e jelosia

Le amor pur es un sonio

que vive in mi spirito

e in le tue

Cordialmente,

Marcus

Spatio ultra parolas

Si tu experientia

lo que te circumfere

como ver e vivente poesia

toto deveni

immensemente significante

Le poeta experientia le vita

directemente

e solmente post isto

veni le parolas

Le magia es ibi

ante que nasce le verbos

ma le verbos

pote revocar le lector al magia

Le parolas non es le scopo,

illos solo son flechas

que indica le cosas importante

Quando on entra le experientia

del consciente presentia

on debe disvestir se del parolas

e lassar los ante le porta

Io crede que nos ambes ha essite

in iste spatio ultra le parolas

Ibi il ha pace e beatitude

Io la ha essite

solmente curte momentos,

toccate lo

con mi tremulante manos,

ma forsan un die io osara entrar

con tote mi corpore e anima

e postea retornar...

...transformate

Le palmas de Las Palmas

Isto es un chronica publicate in Panorama in interlingua, no.6, 2017. Illo reflecte mi impressiones del 22e Conferentia de Interlingua del UMI in Las Palmas in 2017.
Tosto comenciara le 23e Conferentia de Interlingua in Praga. Forsan illo anque inspirara un nove chronica de mi parte. 
(Fonte del photographia: Wikipedia, https://commons.wikimedia.org/wiki/File:Las_palmas_gran_canaria_parque_san_telmo_2005.jpg)

Le palmas de Las Palmas vacilla in le calorose vento oceanic. Undas sensual caressa roccas, plagias e homines natante. Le citate pulsa de vita: parla, crita, klaxona e ride.
Inter casas nove e vetere, domos ric e povre, desde centenas le lingua espaniol echoa, plus recentemente miscite con un plethora de linguas del touristas.
Ma recentemente un nove lingua appareva al stratas, hotels, restaurantes e plagias de Las Palmas: Interlingua, le soror de espaniol, se faceva audite, et occurreva de novo le magia de communication interlingual. Interlinguistas e canarios parlava e comprendeva le un le altere.

Conversationes, discussiones, camminatas, excursiones. Septe dies de Interlingua del matino al nocte: un extendite curso de conversation. Labor e amusamento in un felice maritage.

Scientistas ha constatate que Las Palmas ha le melior climato del citates del mundo. Esseva nos in le paradiso? Saporante le suave fructos local, sentiente le sablo del plagia sub nostre pedes, gustante vino, smoothies e aqua de Firgas (con gas o sin gas, secundo le gusto diverse del gruppo), nos divideva experientias, transformante a Interlingua nostre sentimentos e pensatas.

Interlingua debe esser un lingua quotidian, non solmente theoretic. Assi nos sempre trovava nove parolas a traducer quando nos explorava le ricchessa natural, cultural e culinari de Gran Canaria. Como traducer isto? Como traducer illo? Existe iste parola in le dictionario?

Duo autos blanc gira al longe del stricte camminos serpentin del montanias. Riscante nostre vitas, celante nostre horror, nos vade a Teror. Le parking in Teror evelia pavor. Il es quasi impossibile entrar, sin grattar le lacca. Ma al fin isto succede e nos pote regratiar le fortias divin pro lor clementia, in le Basílica de Nuestra Señora del Pino.
Le seniora del Pino vigila super nos, assi sin accidentes nos reveni al hotel.

Inexpectatemente veni le crepusculo. Le sol se pone in hasta.
In le vespere le citate luce in le mar. Le pharo se torna, disseminante su lumine al abysso oceanic. Le undas sempre murmura, grillos discrete sona continuemente. Le tepide nocte da relevamento al corpores que tote le die baniava in sol.

Troppo rapidemente fugi le tempore quando nos nos approfunda in discussiones interessante. Inevitabilemente se approxima le medienocte, lento nos linguistas ambula al hotel. Bon nocte! Dormi ben!

Le somnolente luna guardava le reposante citate durante le horas nocturne. Nos dormiva, e soniava in Interlingua. Se approximava un nove die, portante nove ideas, nove possibilitates, nove incontros e renascite fortias creative a nostre lingua international, que sempre vive e trova nove vias.

Lacrimas in le rivo

Io sta apud le murmurante

rivo montaniose

Dolo e suspiro comprime le corde

Amar e dulce lacrimas

flue a basso del genas

e cade in le rivo

Prestemente le lacrimas flue via

con le torrente aquatic

Illos es battite contra petras,

caressate del herba

e jectate a basso de cascadas

Illos hasta preter villages e plagias

ubi infantes joca, curre e ride

Illos es tirate de vortices

preter quacante anates

e cygnos tacente

Quando le vespere se approxima,

le lacrimas flue a in le citate

al qual illos ha suspirate nocte e die

Illos reflecte le lumine de omne le fenestras,

le lustro del lanternas e le splendor lunar

Le calor del citate evapora le lacrimas

e le vento los porta retro al montanias

Illos reveni con spero e consolation

Io ancora sta apud le rivo montaniose

e subito senti lor fragrantia distante

Io claude mi oculos e dice un oration

Post un momento io aperi mi oculos

e reveni a mi parve cabana 

Pecunia e tempore

Alcunos dice

que tempore es pecunia

Tempore pote crear pecunia

ma pecunia non pote comprar

plus de tempore

Le homine povre travalia tote le die

pro un magre salario

Le dies es plenate de fatiga

e le noctes de inquietude

Le homine ric vide

como cresce e se multiplica su fortuna

Reposo, luxo e conforto le circumfere

Le melior doctores es disponibile

Ma le morte al fin

non pote esser

pagate o corrumpite

Comprension

Esque un humano
vermente totalmente
pote comprender
un altere humano?

Forsan le prime passo
verso comprension
es comprender
que on non comprende

Positiones de dormir

Le majoritate del homines prefere un position de dormir ante alteres. Io non es un exception. Ma io ha essite fortiate a modificar mi preferentias regularmente.

Initialmente io prefereva dormir a mi stomacho, le fronte a basso. Io imbraciava le cossino e me sentiva tranquille e confortabile. Post annos io totevia de plus in plus suffreva de dolores in mi collo. Durante longe tempore io pensava que le causa esseva le diurne jocar de guitarra, ma finalmente io comprendeva le ver causa: le position de dormir. Quando io jaceva al stomacho io fortemente torqueva mi collo al sinistre in un angulo particularmente non-ergonomic.  

Io esseva fortiate a tornar me al position dorsal. Isto esseva multo inconfortabile. Le sanitate del collo tamen se ameliorava e dunque io me accostumava a iste position e finalmente io lo prefereva.

Postea un femina se installava in mi domo. Post un tempore illa comenciava planger se del facto que io roncava. Como? Io non habeva le plus remote idea de mi roncar. Que esseva le causa?
Naturalmente, le position de dormir...

Io debeva repositionar me al latere e isto effectivemente stoppava le roncar. Ma le instante que io me jaceva al dorso, io comenciava sonar como un tractor ferruginate que ara un desiccate campo de secale. Assi, le sol option esseva habituar me a dormir al latere. Isto functionava. Toto indurabile.

Le femina se installava permanentemente e nos habeva un baby. Le prime anno illo jaceva inter nos in nostre lecto. Isto presentava nove difficultates pro mi position de dormir. Le baby besoniava un certe zona tampon pro poter dormir sin interferentias. Le largor del lecto esseva 160 cm. Le resultato deveniva que io debeva dormir al latere al bordo extreme del lecto.

Si io me tornarea al sinistre io eveliarea le baby e si io me tornarea al dextere io caderea al solo. Desde antea io esseva accostumate a mover me in le lecto durante le nocte, ma ora io debeva devenir rigide e retener un position fixe. Iste defia esseva le plus difficile usque tunc. Io debeva luctar un periodo ante que io poteva habituar me. Finalmente iste situation totevia pareva assatis normal.

Post un anno nostre filia comenciava dormir in su proprie lecto. Subito mi experientia esseva que io habeva large campos super le quales io poteva extender me.

Chronica publicate in Panorama in interlingua, no.5 2017

Attendente apud le laco

Incontra me hic

iste vespere

quando le ultime luce

con su fortias final

pende sub le nubes

e pois cade

al frigide undulationes

del laco

Secretos devenira murmurate

e prudentemente occultate

in obscuritate e silentio

Illes qui se cela durante le die

se preparara

pro incumbentias nocturne

e cautemente le umbras glissara

inter rigide arbustos

Nemo debera vider o audir

nostre separation,

quando nos nos basiara

con le lumine moriente

Le scripturas stellar

nos ducera a domos remote

multo distante le un del altere

Io specta le laco al crepusculo

Le seculos ha sepelite

lor tresores e lor residuos

in le fundo, in le regno del pisces

Calme, ben que attendente

io inhala le fragrantia de humide ligno

e audi echos del risos diurne

Io pensa de tu lucente oculos

e sape que io los videra

ex longe distantia

quando tu te approximara

Incontra me hic

iste vespere

assi como ante multe annos,

inter umbras, celate del mundo,

e dice me lo

que nemo altere

debe audir