Jan 22, 2021

Stella scintillante

 

Stella belle scintillante,

sempre tu es coruscante,

perla in le vaste celo

detra nubilose velo

Stella belle scintillante,

sempre tu es coruscante


Mozart crea melodias

plen de dulce phantasia

Ingeniose variationes

con diverse emotiones

Mozart crea melodias

plen de dulce phantasia


Veni vesper’, sol non brilla,

tunc de novo tu scintilla

Tote nocte tu produce

incantante, suave luce

Veni vesper’, sol non brilla,

tunc de novo tu scintilla


Ora Wolfgang ha finite,

omne notas es scribite,

a Josepha, su alumno

dedicate in autumno

Ora Wolfgang ha finite,

omne notas es scribite


Quando yo in nocte viagia

luce tue incoragia

me e mi car companiones

que viagia trans nationes

Quando yo in nocte viagia

sempre tu me incoragia


Anque juven’ damisella

in le celo vide stella,

specta al compositor,

in su corde es amor

Anque juven’ damisella

in le celo vide stella


Quando yo in lecto jace,

tu mi oculos jam place

In mi auros cantilena,

Amadeus aere plena

Quando yo in lecto jace,

tu mi oculos jam place

 

Jan 11, 2021

Sol de flammiferos

Le sol de flammiferos
brilla in le pais del ligno
Le anellos annual
se accumula al horizonte  

Nubes ramettos
es trappate in le celo
Io sta firmemente
in un brun paisage  

Io time le scintilla
que inflamma le grande igne
le qual mesmo deos de ligno
non pote extinguer

Lacrimante io ora,
desirante pluvia
Le folios del autumno
jam es oblidate

Le foco de transformation es devastante
a ille que remane immobile
Ma si io eradica mi radices,
que de valor remane a me?

Le sol de flammiferos
incontra le horizonte,
deveni ancora un anello annual
Al arbores, un anno es como un die
e deman
- le spero, que se perdeva in le nocte

Jan 10, 2021

Spero celate

 

In le profunditate de mi corde
io ha celate mi suspiro
In le fonte del anima
io ha conservate le amor immemorial

In sonios secrete
io ha sigillate le spero del vita eterne
Durante le nocte
le facie del Deo luce in le lontanantia

Le prime amor
es tamben le ultime,
nam illo circumfere toto

Le fonte pur
es coperite de solo
e oblidate del majoritate

Sperantiose guttas de pluvia
frigida mi visage
Le beltate celeste
benedice mi oculos

Le prime radios solar
es cordas de un harpa
que calmemente sona
un psalmo insolite

Le aurora
conta del die nove
ubi toto lo que esseva
celate e oblidate
de novo videra le luce


Jan 4, 2021

Animation graphic de musica

 Chronica publicate in Panorama in interlingua, no.5, 2018

In YouTube il ha un interessante categoria de videos a discoperir: le partituras graphic.
Un eminente creator de tal videos es Stephen Malinowski. Ille ha producite avantiate partituras graphic, ubi le tonos es reproducite con separate colores e formas, pro symbolisar le differente tonos e instrumentos.
Il es intertenente spectar iste videos, ma anque educative. Io ha obtenite un comprension plus profunde de certe pecias de musica, gratias a illos.

Un exemplo es "Le Sacre du printemps" de Igor Stravinskij, le qual io antea ha trovate chaotic et enigmatic. Le animation de Sr. Malinowski de iste obra me ha date un melior comprension de su structura e instrumentation.
On pote vider un poco in avantia como le musica se evolvera: le interaction del lineas melodic, del irregular rhythmos, e le combination de differente instrumentos in le textura musical. Isto da un melior supervista del continuitate del pecia.

Ille anque ha facite partituras graphic que es multo belle, per exemplo del prime Arabesque de Claude Debussy, ubi le undulante tonos es materialisate in le forma de cordes e papiliones stilisate.

In le animation del famose canone de Pachelbel, ille lassa le partes melodic revolver in un rota, ubi on pote vider como illos es repetite e variate.

Como le ultime exemplo del arte musical graphic de Sr. Malinowski io vole mentionar le animation del tertie parte del Concerto Hibernal de Antonio Vivaldi, del "Quatro stationes".

Hic anque le oculos pote disfructar se del stilo plen de contrastos del "prestre rubie", nunc contemplative e lyric, nunc plen de temperamento e fortia.

Le partes melodic meandra in alto como parve serpentes que devora le tonos globular, super un fundo de extendite burdones.

Longemente le serpentes repe in avante, hesita, cerca lor via, ante que illos al fin attacca su victima con phrenetic staccato-morsuras.
 

Sr. Malinowski non es le sol talento in YouTube in le campo de animationes graphic de musica.
Io vole mentionar un de plus ante de finir iste chronica:
Andy Fillebrown ha publicate un serie de animationes ubi le tonos vola in avante ex un grande distantia in lo que poterea esser describite como un tunnel trans le spatio, brodate con radios tonal ex galaxias lontan.
Naturalmente iste typo de animation es particularmente apte pro pecias musical de character epic.

Io pote recommendar le animation de "La Cathédrale engloutie" (Le cathedral affundate) de Debussy e anque le celebre Toccata e Fuga in Re Minor de J.S. Bach, le qual obtene un funeste, martial character, quando le tonos arriva como missiles interplanetari in un guerra stellar, contra le indefense spectator de YouTube.