Nubes sin umbras

Beltate extra-mundan

radia ab le fundo del anima

un lumine enigmatic

tanto tangibile pro le emotiones

e tan inexplicabile pro le pensatas

Calme joia, gaudio inexpectate

plena le angulos del camera

e alora veni le visiones:

Castellos radiante, silvas magic

le celo illuminate del luna, pontes de auro

basse e forte tonos ex cornos de bronzo

echoa inter montanias

con un altitude que supera le nubes

nubes sin umbras

Le monachos recita su mantras ancian

e in le fenestras del monasterio tintinna

multe parve campanas de crystallo

Io cammina in alto del plus grande montania

mi via es circumferite de arbustos fragrante

e finalmente entra in nubes que porta le somno

que nos evelia a un realitate incognite

Menses illogic

Le nomines del menses son illogic:

Septembre non es le septe mense, ma le none

Novembre non es le none mense, ma le dece-prime

Octobre non es le octave mense, ma le decime

Decembre non es le decime mense, ma le dece-secunde

E que face le deos roman

Janus, Februus, Mars, Maiesta e Juno

e le imperatores Julius et Augustus

in nostre calendario?

Omnes anque sape que

non ubique le buttones se aperi in april

Secundo le logica le menses deberea esser:

Primembre

Secundembre

Tertiembre

Quartembre

Quintembre

Sextembre

Septembre

Octobre

Novembre

Decembre

Undecembre

Duodecembre

Ma pro nos homines illogic

isto causarea multo confusion...

Le machineria

Le rotas debe revolver

le trainos debe ir

nos omnes son parve vites

in le machineria

alcunos son mal fixate

alteres cade via

ma son tosto reimplaciate

de substitutos

Ma gradualmente

le velocitate decresce

Le grande machina es fatigate

illo habeva satis de oleo

e ha masticate troppo de carbon

Illo reguarda a retro

e vide altere machinas

le quales reduce le avantia

preste a continuar le cursa

Le cerca

Io cerca un homine

qui cerca un homine

sufficientemente perdite pro vagabundar

ma con un bussola in su mano

pro al fin trovar su domo

e in le altere mano: un libro

con multe sage parolas

anque illo un bussola, pro le spirito

Io cerca alcuno qui vole audir

quando io narra lo que alteres me contava

e assi prolongar le vita del historias

facente circulos clauder se

Io spera e ama

Credentia, spero e amor:
le nucleo del christianismo
Io ha essayate fervidemente
ma io non pote creder
Totevia io spera e ama
e meravilia super le tremende

enigma del vita

Io prefere le gaudio

Le dolor es un via trans le lucto

le lucto es un via ultra le dolor

In le oculo del tempesta es tranquillitate

In le medio del inquietude es calma

In le centro del impotentia es fortia

Io permitte me mesme a sentir joia

malgrado de mi hospite, le lucto

Io invita le benesser

quando le dolor dormi un momento

Su vita es finite ma le mie continua

Io vole prender cura de su memoria

ma al mesme tempore proceder

Inexplicate

Illo levita al longe de figuras symmetric

ma exhala asymmetric vapor

Gradualmente le structuras vicin se fragmenta

e le imponderabile volitiones del vita

fracassa le ordine glacial del morte

Illo es le inexplicate Poter Creative

que a vices es adorate e a vices ponite in dubita

mesmo in iste momento: experientiate trans

molle, calide, somnolente brumas

-iste nebula ubi quecunque pote exister

e ubi alcun parte de nos mesme remane

post le evelia involuntari

Dicer adeo

Viver sin te sera difficile

ma viver con te es impossibile

Dicer adeo es ardue

ma io debe facer lo

Pensar al momentos dulce

es dolorose, ma le facto es

que illos era troppo pauc

plus sovente nos nos noceva

Nos son de disparate planetas

e parla idiomas differente

le sonos son quasi le mesme

ma le significationes dissimilar

Io debe trovar mi proprie via

camminar in solitude alcun menses

trovar me mesme ante probar

trovar mi car medietate

Nemo pote occider un sonio

 Io volerea viver in un universo
ubi John Lennon non era occidite
ubi le pace habeva un ver opportunitate
e ubi le soniatores ha le autoritate

Un universo ubi Amor es rege
e Musica le regina
ubi le homines son libere
e ha tote le tempore que illos besonia
pro facer lor creativitate florescer

Io vide John Lennon al strata in Nove York
con le dorso curve e gris capillos e barba
ma su oculos son attentive e jocose
ille me reguarda e dice pensivemente
in su dialecto typic de Liverpool:
-Es tu le soniator qui da vita al soniatores?
Io responde con su proprie parolas:
-"Tu pote dicer que io es un soniator,
ma io non es le sol."
Ille responde:
-Continua soniar, mi amico!
E non oblida que nemo pote occider un sonio...

Ille qui vide es vidite

Le observator qui specta es observate
ille qui vide es vidite
le fortia emana pro postea retornar

Ille qui cura es curate
Le cyclos del energias da le mundo su perfection
lo imperfecte sera perfecte
e lo perfecte debe esser transformate
preter multe stadios de imperfection

Le camminator qui vade deveni le camminata
Le camminata cammina le camminator
e le via que ille percurre
deveni marcas in le spirito
que crea texturas mirific

Le vita que vive es vivite
in le cyclo del vita non ha spatio pro le morte
porque illo es un circulo sin fin
in le qual le camminator observa le via
e crea ornamentos in su anima
con structuras sempre plus belle

Distante femina

Ultra le silva, laco e agros
io videva a distantia un parve puera
illa jocava e ballava
presso un parve cabana

Io comenciava vader inter arbores
a vices intervidente la trans le folios
al fin io attingeva le costa del laco

Io vadeva al aqua
e comenciava natar in su direction
spectante in alto a su figura
io videva que illa era un juvene femina
qui sedeva a un chaise e prendeva le sol

Su belle aspecto me dava fortia
vincer super le undas
e attinger le altere latere del laco

Io comenciava vader trans le agros
e videva que le juvene femina
era un dama matur
qui laborava in su jardin
e plantava flores in le terra

Al fin io arrivava
e stante ante illa
io videva un vetula
de novo reposante in su chaise

Illa surrideva  ma diceva nihil
Detra su cabana
io videva un abysso precipitose

Poseidon

        Poseidon, nos videva tu cruel figura        
elevar se del fundo obscur del mar
del cecante sol tu facie rutilava
io videva tu bucca de ira spumar

Al costas de Aceh e Siam surgente
tu sparniava necuno, plenate de odio
como tropheos del attacco lavante
al mar: homines, arbores e domos

Ha nos prendite troppo de tu pisces?
Jectate troppo immunditias a tu domo?
Ha nostre naves e gran submarinos
disturbate tu calma del fundos?

Esque un die tu reprendera
le terra lassate ante multe annos
e nostre citates tornara
a residentias pro sepias e corallos?

Ha misericordia, deo de oceanos
in iste mundo que nos vive in pace!
Audi le preces del maldivianos
e retene tu aqua feroce

Con folle homines, que tu ha patientia!
Un die illos respectara
le leges universal del natura
ancora animales, illos deos devenira    

Transplantation facial

Un homine moriva

perforate de bollettas mortal

Le vita abandonava su corpore

ma un parte era salvate:

on secava via su facie

pro dar lo a un altere homine

qui dece-cinque annos retro

in desperantia

volente perir

con un arma fusilava a su capite

ma fallente suicidar se

ille in vice deveniva

le homine sin facie

Le operation succedeva

e le surriso, mimica e grimasses

de un homine morte

es possedite de alcuno altere

qui in iste maniera reganiava

un poco de su dignitate

Le grattacelo existential

Io va per ascensor

cata etage es un anno

le cameras son identic

ma le mobiles differente

Io recognosce certe facies

ma alteres son estranie

Mi labor es le mesme

ma cata die cresce

mi responsabilitate

L'autos al strata in basso

deveni sempre plus parve

Contextos se clarifica

ma certe detalios

perde significantia

Al distantia dispare

le horizonte

Le die quando io

attingera l'ultime etage

io scalara al tecto

e vadera trans le bordo

pro planar trans aer frigide

Esque io cadera al terra

o ascendera ultra le nubes?