Mar 26, 2020

Rex Corona



Le inimico invisibile diceva:

Le mundo ha un nove rege
Ecce io: Rex Corona
Io ha un grande corona auree
e un sceptro con dragona

Io es un rege potente
que in omnes timor eveliara
Io decidera qui va viver
e qui in pena morira

Tote le mundo es mi dominio
Mi poter es sin limite
Muros non me stoppara
e resistentia es inutile

Mi colpo forte vos va abatter
Le spero e amor io ruinara
Vostre familias sera fragmentate
e ante me vos vos inclinara

Io sape que vos non me pote vider:
ecce mi fortia, mi avantage
Invisibile es invincibile:
ecce mi cruel, ma ver, message


Ma le homines respondeva:

Tu non es le prime e non le ultime
Multe pandemias ha venite e passate
Nos vinceva plus fatal morbos que tu:
multe pestes nos ha superate

Tu pote abatter nos, facer nos cader,
ma nos nos de novo levara
Tu pote colpar nos usque sanguine
ma nostre vulneres curara

Tu pote raper via personas amate
e tunc nos le lucto longe portara
Ma nulle lucto es sin fin
nam de novo cata die nos nascera


1 comment:

  1. Illustration per Marcus Scriptor.

    Fonte del imagines:
    https://www.pngitem.com/middle/JbxbTR_transparent-king-crown-png-transparent-background-crown-png/

    https://en.wikipedia.org/wiki/Coronavirus#/media/File:SARS-CoV-2_without_background.png

    ReplyDelete