Desiros carnal

A tu ubere corpore,
mi manos glissa hic e hac

Se move tu suave sinos
quando tu dansa

Mi corde batte
con le rhythmo del musica

Tu capillos titilla mi facie

Ferve, arde le nocte

Le passion face
nostre corpores tremular

Io te pressa contra me
assi que tu geme

Io vole necar me
inter tu spisse femores

Io suge tu labios luxuriose

Io basia tu ventre

que va retro e avante

con tu halitos hastive

Io te basia plus basso
e tu geme de novo

surprendite del delecto

Io te mangia
assi como un dessert
le plus gustose

Nunquam io sera satiate
e jammais passara tu passion

Le horas del luna e del stellas

ancora longe durara

Nos oblidara le tempore

Nos oblidara le mundo

Nos ultrapassara
omne inhibitiones

e devorara
omne desiros carnal

in iste nocte
quando nostre fusion

complira le suspiro
que es tan grande
como le saturation

que le matino nos servira

a un platto con fructos
in omne colores

Manos de seta

Tocca me con tu manos de seta

Evelia le foco que dormi sub derma

Le nocte ha patientia

Tu caressa es tanto lente

como le cyclo del luna

Mi suspiros de placer

son tan numerose como le stellas

Tu degusta mi desiro,

surride a mi expectationes

Tu me surprende

quando tu explora mi corpore

eveliante sentimentos

que io nunquam habeva experientiate

Finalmente tu te jace presso me

Nunc es mi torno a explorar te

Intensemente io inhala tu fragrantia

Affamate io te prende in mi bucca

Tu es mie! Tu es mie!

Observationes zoologic

Hic nos vide un elephante
Un animal multo interessante
In su trompa aqua prende
su amico con un ducha surprende

Ecce un gorilla
su filia presso illa
le differentia es minimal
inter homine et animal

Non time le leon
l'animal in question
jam es domesticate
in le zoologic societate

Como salta le ranas!
Illos dansa sardanas
ma oblidava tener le manos
como face ver catalanos

Existe multe aves
alcunos super nubes
vola con ventos:
eterne momentos

Colorate serpente
se move furtivemente
forsan morde tosto
un animal ex le bosco

Le tortuca es tanto lente
Que occurre in su mente?
Le pensatas sembla tardive
ma forsan anque intensive

Curre cavallos salvage
facente un longe viage
trans le prateria american
verso le frontiera mexican

Balenas, grand' animales
son submarin mammales
Al superficie prende aer
Pois al fundo se lassa cader

Koala, dulce marsupial
folios sole masticar
somnolente animal
ramos ama imbraciar

Certo, vos sape que zebras
non cognosce algebra
ma in vice son admirate
pro lor belle pelle striate

Pisces ede pisces
Le parve ede le minime
Le grande ede le parve,
in vice edite del maxime

Ecce un juvene can
que sempre vole currer
Illo es felice e san
e nunquam te va morder

Aranea, celere chassator
certo, su aspecto evelia timor
con diligentia su rete extende,
pois con patientia victimas attende

Ulula, le uluco, huu hu huhuhuhuu
silentio nocturne interrumpente
vigila in vesperes, huu hu huhuhuhuu
durante dies dormi dulcemente

E ora audi le consilio
del parve, ma sage, conilio:
"Cata die mangia salata,
e face l'amor con tu amata"

Cattos blanc, cattos nigre
cattos grande, cattos micre
cattos plena vicos, stratas
cattos plena mi pensatas

Un alce crucia le autostrata
deveni un "animal non grata"
collisiones lethal riscante
con le automobiles passante

Le parlante parochetto
non besonia un libretto
sempre illo verbos repete
anque parolas indiscrete

Tante species del scarabeo
creava nostre sage Deo
insectos era su ver passion
in le acto del creation

Malgrado minuscule, mures
mangia multe matutin mangiares,
murmurante, masticante
multe molle materiales,
meticulosemente mandibulas movente,
minute manieras mundan mimante

Entrava olim un bufon
al multo cultivate salon
In vice de dicer "Bonsoir!"
illo comenciava coaxar

Contra le innocente ericio
alcunos ha le prejudicio
que illo fructos gusta prender
o mesmo a vices vaccas mulger

Ecce un amica mie
Su nomine es Alexandra
Illa es un salamandra
sempre gentil e pie

Le bardotto es le hybrida
inter stallon e asina
in latino hinnus appellate
in Interlingua solment' ora registrate

Tu vide le prime ape
Veni le ver, tu sape
Emana del prime flor
le aroma del amor

Tu jardin

Lassa me venir a tu jardin

Sentir su fragrantias

e tu presentia

Recordar me lo intemporal

Io memora lo que venira

et expecta lo que esseva

Le jardin sempre remanera

Animal nocturne

Io remane in le lecto
tote le die
audi como le vicinos
exi trans le porta
degusta le levar del sol
me addormi et evelia,
addormi et evelia
senti le odor
de distante labor

Finalmente veni le vespera
e le obscuritate
Le hora del animales nocturne
ha advenite
Io me disvesti e curre foras
pro comenciar le chassa

Telephonomania

In nostre dies le majoritate del usatores del telephonos cellular ha un si appellate smartphone, un telephono intelligente. Con illo on pote, ultra telephonar e inviar SMSes, facer le majoritate del cosas que on face al computator: navigar le internet, ascoltar musica, jocar etc. Il anque es facile a prender photos e registrar films. On mesmo pote pagar su facturas e pagar con illo in certe botecas.
Del internet on pote discargar, gratuitemente o contra un summa minor, si appellate apps, applicationes, isto vole dicer simple programmas con functiones specialisate.

Ultra apps con jocos e altere formas de intertenimento il ha GPS, le systema satellitic de positionamento global, que da le possibilitate de saper exactemente ubi on se trova al mundo e facilemente trovar le correcte adresse, pro exemplo quando on vade alicubi con su auto. 
Si on vole apprender alique il ha apps pro studiar e si on es molestate de mosquitos il ha un app que face le altoparlator del smartphone emitter ultrasonos que repulsa le parve sanguisugas.
Apps pro Facebook, Twitter, Instagram e Kik e alteres da le possibilitate a sempre poter informar le ambiente de su activitates e apprender lo que face omne le amicos, e commentar lo.

Il es facile a realisar que un tal apparato pote esser difficile a poner al latere. Ci il ha alique pro cata uno e illo pote esser usate in multe situationes quotidian. Quando on attende al autobus, in le cauda del supermercato, mesmo in le sala de cinema, le smartphone se revela. Gente lo aspecta quando illos vade al trottoir o mesmo quando illos conduce le auto. Parentes preme al schermettos con oculos fixate e a pena remarca que lor parve infantes essaya communicar se con illos. Sovente homines plange se del facto que lor consortes dedica plus de tempore a su telephonos que a su amante.

Quando le parlamento svedese esseva inaugurate post le vacantia estive in 2013 le photographo del jornal Dagens Nyheter capturava con su camera como un grande numero del consilieros usava su smartphones durante le orationes inaugural.

Sin facer alicun examinationes scientific on pote constatar que un notabile parte del population es dependente del smartphones. Illos se ha accostumate a sempre esser "a linea", actualisate del ultime eventos, in contacto con su amicos del internet, con accesso a (quasi) tote le cognoscentia del mundo e immediate stimulation e intertenimento.
Cata secunda debe esser plenate con activitate. Non plus existe tempore pro relaxation o reflexion, e mesmo in un grado minor pro presentia libere de pensatas in le nunc, ubi le mente pote regenerar, purificar se e crear spatio pro pensatas plus profunde. Le vita sempre accelera usque al momento quando le imagines vacilla ante le oculos como un videoclip hysteric.

Le smartphone es un instrumento potente e versatile, que in le futuro proxime sera indispensabile in le execution del cargas quotidian. Le defia pro nos es: apprender nos a usar lo rationalmente e con moderation, assi que nos non oblidara le multe opportunitates que le mundo real offere a cultivar nos e trovar stimulation in un maniera multo plus variate que trans un schermo que mesura tres uncias.   

(Chronica publicate in Panorama in interlingua, No. 3/2014, maio-junio)

Un appello a omne homines

Nos ha differente opiniones
habitos e religiones
si nos vole superviver
nos debe apprender

le un le altere tolerar
cessar odiar, in vice amar
non plus le ambiente devastar
e ora, ora lo sanar

L'integre humanitate
es un sol familia
cata nationalitate
cata puero, cata filia

Unite nos viagiara
usque al stellas
yo crede que nos creara
un mundo sin guerras

Nos ha le mesme sanguine
nos ha le mesme origine
in calide, suave Africa
ora nos vive in l'Americas

Nos vive in Australia
Europa e in Asia
Fratres e sorores
in diverse, belle colores 

Isolation

Tu dice que tu besonia nemo

ma io vide le vacuitate in tu oculos

Tu sta immobilemente 

e lassa le alteres passar

Time tu personas qui non existe?

Ha tu pavor ante le homines real 

qui sta circum te?

Tu es un gutta 

in un deserto lontan del mar

Le sal e le sablo 

rende tu vista turbide

Vide tu illes qui passa?

Lor manos extendite?

Io prende tu mano in le mie

e insimul nos va al citate

Vetuste tortuca gigantesc

Nos vacilla sur le dorso 

del tortuca gigantesc

In distantia nos audi 

su respiration anhelante

lentemente illo voga 

al oceano primordial

Nos caressa su vetuste concha

Ibi nos trova cosas inexpectate

pro le quales nos manca parolas

e que nos non sape como usar

Ubi illo nos porta? 

Le viage ancora es longe

In distantia nos vide 

incognite animales marin

Illos nata via

Nos nos addormira et eveliara

e postea de novo addormira

ma le tortuca nunquam dormi

Le pneu del rota del vita

Yo cambiava le pneu al rota del vita
satisfacente le demandas de mi marita
Le pneus era plen de grande foramines
causate d'immunditias lassate de homines

In vesper' yo brossava le dente del tempore
in speculo videva mi vetere corpore
le fluor excessive del dentifricio
damnificava mi gingiva, qual supplicio!

Le funambulo

Io es un funambulo

balanciante al fun tanto tenue

tendite inter le luna

e le polo boreal

In le mano dextere io ha un parapluvia

e in le sinistre un parasol

Durante le dies io vade avante

reguardante in basso

observante le occurrentias mundan

Io vide joia e suffrentia

amor e odio

guerra e pace

sagessa e stupiditate

ma io es super tote iste cosas

balanciante sur le corda sin cader

ni in obscuritate, ni in lumine

Durante le noctes io me jace sur le fun

e quando io claude mi oculos

io vide le Buddha ante me

con le un oculo aperte

e le altere claudite,

al bucca un calme surriso legier

Ille dice a me:

"Non time le via

Tanto longe que tu memorara le fin

tu non cadera del fun

Ma mesmo si tu caderea

un altere fun attende in fundo

usque a tu apprendera mantener le equilibrio

Toto lo que tu vide passara

Nove cosas prendera lor placia

ma tu natura interior remanera le mesme

nonobstante le multe facies que tu portara

Al fin del fun tu trovara

le ver natura del natura interior"

Audiente tal verbos

io realisa que io specta un speculo

Io me evelia, aperi le oculos, senti que io cade

Ma le terra de facto se retira!

Le celo es de plus in plus proxime

Le stellas susurra a me:

"Ancora tu non te ha eveliate..."

Sublineamentos

Non sublinea 
mi parolas!

Pensa tu que illos 
son importante o incorrecte?

Lassa illos crear
su proprie symmetrias

Realisar le sonios celate

Sape tu vermente
que io de facto scribeva?

Nocturne scriptor

In le plus profunde nocte

le casas son inveloppate

in obscuritate

Tote le fenestras son tenebrose

Le habitantes dormi

Solo detra un vitro

brilla le luce

Detra le cortina

un umbra inquiete se move

Un homine anxie

refusa cessar laborar

Le penna nervosemente

balla a un folio post le altere

Le pirouettes lassa tracias nigre

in le blancor

le quales attendera le scrutinio

de oculos futur

Le figura se leva,

lassa le tabula, exi,

ma le lampa continua radiar

Ma tosto le protagonista reveni

Un curte pausa

e postea de novo al travalio

Distante es le alba

Ave

Ave vola sur mar sin fin
Nusquam terra
Ubi reposar?
Ventos lo porta sempre avante
Le mar remane identic

Ave dispare detra horizonte
Nunquam io lo revidera