Le historia nos pulsa in avante,
nos fortia seliger le cammino,
ma con cata passo, nonobstante,
le via bifurca, celante le destino
Oct 7, 2024
Sep 23, 2024
Picturas del vita
Colores es como emotiones,
a vices apparente in lor pur stato,
ma le plus sovente in combinationes,
al pictura del vita, in plure stratos
Le historia duce le pincel del sorte
super iste grande pictura del vita
e pinge contos de nascentia e morte,
del successo e del cadita
Le historia capriciose
face cata pictura sin par,
modeste o majestose
o bellicose o amical
Es tu vita un pictura de Michelangelo,
belle, luminose e spiritual,
benedicte de Deo e su angelos
e pace perpetual?
Es tu vita un pictura de Renoir,
in molle optimistic colores?
Apud Pont Neuf un large trottoir,
con insolate promenatores
Es tu vita un pictura de Goya,
dramatic e captivante?
Obscuritate plus grande que joia
ma interessante, nonobstante
Es tu vita un pictura de Dalí,
phantasmic e surrealistic?
Pingite con liquide phrenesi'
e talento equilibristic
Es tu vita un pictura de Munch,
saturate de angustia e crito?
Dies difficile tu ha tunc,
con un intense colorito
Es tu vita un pictura de Kahlo,
un portrait de un forte persona,
que trova joia malgrado dolo,
un ver regina sin corona?
Es tu vita un pictura de Cézanne,
plenate de fructos, sol e natura?
Esque tu promena al stratas de Gardanne
saporante estive aventuras?
Es tu vita un pictura de Picasso,
occupate de formas inexpectate?
A vices silentio, a vices fracasso,
un vita ric, plen de audacitate
Tu proprie pincel forsan tu prende
e pinge le pictura de tu existentia
Tunc le fortuna al fin tu comprende
Super tu proprie vita tu ha potentia
Sep 21, 2024
Mi desiro a te
Mi desiro a te
es un parte de me
Nos vade insimul
malgrado le distantia
Io ride con te,
plora con te,
parla con te,
ma nulle responsa
Io sonia que io te tene
in mi brachios
ma pois me evelia
solitari in lecto
Forsan in un universo parallel
nos es insimul
vadente trans vita,
mano in mano,
compartiente nostre calor
durante frigide hibernos
Nos nos bania in le laco de amor
Caressa con aqua le un le altere
Satisface nostre sed
con multe suave guttas
Satisface nostre fame
con basios profunde
Tu pone dulce uvas in mi bucca
e io basia tu digitos
Pois io te lassa gustar
mi plus sapide succo
Tu voga apud me
levemente, in le tepide aqua
e lassa le sol descendente
donar te su ultime calor
e quando le nocte finalmente perveni
nos ancora es insimul
in un altere mundo
Mi desiro a te
es un parte de me
e quando io sonia
io senti tu calor
Un viage naval
Io viagia in un nave
trans dies e noctes,
inter nubes e stellas,
sub sol e luna
Le celo es un pictura artistic
con arte abstracte in intense colores,
sempre in movimento, sempre unic,
a vices frigide, a vices ardente
Luce artificial crea un linea
al longe del distante horizonte
Nos nos approxima al urbe costal
Grues colossal nos da le benvenita
Reposo in porto, le carga es prendite
Le grues labora febrilmente
Le celo se move ma le nave es immobile
Le timonero dormi in su cabina
In nocte es le tempore pro partir
Le luces del porto illumina le nubes
Al alte mar, un tempesta de tonitro,
tosto replaciate per le celo nocturne
In nocte le vascello es un nave spatial
Le vaste mar es le cosmic vacuo
e le firmamento circumferente
monstra constellationes in tote splendor
Crasse nubes lassa pluvia cader
Celo e mar se vesti in gris
Vento, aere e aqua spumante
sempre dansa su violente ballet
Le proxime nocte, le luna es plen
Illo torna le nocte in un die spectral
Pallide nubes sub pallide astros
Jalne luce de barcas in lontanantia
Isto es barcas piscatori,
que plena le Mar Chinese Meridional
Illos brilla como soles crepuscular in fila
attrahente sepias con le luce intense
Le ample oceano me da un sentimento
de libertate total e unitate con toto,
malgrado servicio naval durante menses
Le corpore captive, le mense libere
Nos entra un archipelago
Al insulas, multe domos
Nos vade sub le ponte, inter barcas
Le porto de matricula se approxima
Sep 20, 2024
Le SAOB
Le scriber de dictionarios es un travalio minutiose, que require multo de methodic labor e patientia.
Le integre processo sovente require plure annos.
Le interlinguistas que diligentemente labora con lor dictionarios, e a vices senti frustration proque le dictionarios require tante tempore pro devenir complite, io pote consolar per contar de un dictionario que ha prendite multissime tempore a elaborar per un integre equipa de expertos.
Il se tracta del SAOB, Svenska Akademiens Ordbok, Le dictionario del Academia Svedese.
Le Academia esseva fundate jam in 1786 per le rege Gustav III. In le statuto del Academia il esseva establite que on debeva crear un dictionario del lingua svedese.
Le ver labor con le dictionario solmente comenciava in 1883. On documenta le lingua del comencio del dece-sexte seculo, usque le tempore de scriber. On explica le parolas, da exemplos, citationes, e le etymologia.
Le ambition esseva que on potera finir le dictionario post circa 20 annos. Ma quando quasi 40 annos habeva passate, in 1920, on solmente habeva attingite le littera D. Le entratas esseva extrememente detaliate e exhaustive.
Le Academia Svedese non esseva contente con le tempo de labor. Certes voleva que le labor cessarea. Ma al fin on lassava le labor continuar. Post isto, le lexicographos laborava plus rapidemente. In 1960 on habeva attingite le littera R.
Le littera sequente, S, es le plus frequente littera initial de parolas svedese. Al mesme tempore veniva un nove director del equipa de lexicographos. Ille voleva retornar a un plus detaliate modo de laborar. On laborava 40 annos con le littera S.
Hodie, in 2021, un equipa de circa 22 linguistas labora con le dictionario. On dice que il ha un bon balancia in le labor, inter meticulositate e effectivitate. Le publication ha attingite le littera Å. (Post Z, le alphabeto svedese ha le litteras Å, Ä e Ö). On dice que on spera finir le labor in circa 2024. Nos videra…
Le SAOB existe in le rete al adresse saob.se. Illo es un popular dictionario inter academicos e homines interessate del lingua svedese.
On dice que Roma non esseva edificate in un singule die. Le facto es que on nunquam finiva edificar Roma. Le citate se sempre cambia, ma solmente poco a poco, e multe ruinas e domos historic remane durante le seculos. Ma le facto es que cata vivente citate, e cata vivente lingua se cambia.
Le domos es como parolas. Certes remane durante longe tempore, alteres es destruite o non plus usate. Illos remane solmente in photographias e in dictionarios historic como SAOB.
Le prime litteras de SAOB esseva scribite plus que 140 annos retro. Quando le dictionario sera complite, on debera comenciar le labor de novo, de A. On debera scriber supplementos, o rediger le parolas de novo.
Assi un tanto grande projecto lingual nunquam finira. Quando on post 140 annos attinge le fin del alphabeto, le lingua se ha cambiate, e le labor comencia de novo. Forsan in le futuro, on habera un plus dynamic modo de laborar con le dictionario, per exemplo per actualisar tote le contento, dependente de qual neologismos e cambiamentos de significationes il habera.
Addendum, septembre 2024.
Le dictionario esseva complite in 2023. On ha assecurate financiamento pro actualisationes de illo durante 2024-2034. Le actualisationes sera publicate solmente in forma digital.
Aug 25, 2024
Le gaudiose perditor
Si on sempre gania,
le joco deveni tediose,
alora io me gaude
quando a vices io perde
Jul 20, 2024
Le catastrophe climatic
Il ha consenso inter le recercatores climatic del mundo: nos attende un extense calefaction e destabilisation del climate global. Durante le veniente decennios nos debe expectar de plus in plus intensive incendios forestal, dies extrememente calorose, furiose tempestas, inundationes, pluvias torrential, fames et cetera. Ultra isto nos videra un accelerante extermination de species animal. Forsan ultimemente le extermination del humanitate, ma isto es tanto horrificante que on non vole pensar de isto.
Mesmo si nos drasticamente diminuera nostre emissiones del gases causante le effecto de estufa, cessara nostre exploitation del ambiente, e deveni climatologicamente neutral in circa 2050, il habera ample cambios climatic.
Alternativemente, si nos continuara in le mesme maniera como nunc, solmente discutente como salvar le ambiente, durante que le damnose emissiones continua augmentar se, alique plus sever attende: Grande citates sub aqua, destruite terras cultivabile, fame, guerras super le diminuente ressources, letal undas de calor. De plus, un extermination massive de species. Tales jam ha occurrite durante le longe historia natural. 250 milliones annos retro, 90% del animales esseva extinguite.
Le situation resimila le legenda de Scylla e Charybdis: si nos cessa destabilisar le climate, Scylla prendera solmente alcun marineros del nave de Odysseus. Si nos continuara como nunc, Charybdis destruera tote le nave.
Nos attende un armageddon climatic. Illo jam ha comenciate: enorme incendios forestal, pluvias torrential, extreme calor e enorme tempestas. Le situation se aggrava. Quanto plus rapide nos agera, tanto plus nos potera salvar. In le pessime scenario, nos perdera toto.
Iste factos es troppo espaventante pro multe homines. Illes es in dubita o los bagatellisa. Scepticos mantene que nostre emissiones non damna le climate. Contra illes sta tote le communitate del recercatores climatic.
Certes comprehende tote iste factos e cade in desperation. Ma le mundo besonia homines que ancora vole battaliar, nonobstante le obstaculos. Nos ha perdite plure battalias, ma tote le guerra non es perdite. Ma le hora fatal se approxima.
Io escappava de me mesme
Io escappava de me mesme
Io plenava mi capite con voces estranier
Io sempre assurdava mi mente
e al fin lo lassava in le terra de necuno,
escappante in un nave con corpore cave
Ma mi mente me sequeva
Illo me attingeva,
me fortiava a ascoltar,
critava pro suffocar
le ruito del vento,
me jectava a un plagia de sablo
e quando toto se habeva calmate
illo susurrava su parolas a me
Io debeva mirar me mesme in le oculos
in un superficie de aqua inter petras litoral
Io lo plenava con multe lacrimas
e plure annos de dolor confinate
le qual al fin poteva exir
Exhaurite io me addormiva in iste plagia
e mi mente dormiva con me
Io soniava del luce in nocte obscur
e quando le alba finalmente arrivava
io me eveliava, nascite de novo
Le libro del natura
Le natura ha su proprie scriptura
Illo conta su historia multo ancian
de plantas et estranie creaturas
usque le distante periodo cambrian
Le immense epos del evolution
es scribite al folios innumerabile
in le libro profunde del terra
que contine contos incredibile
Le libro attendeva Homo Fodiens,
isto es Le Homine Excavante,
qui vole saper so origine distante,
e cognoscer le historia del comencio
E Homo Fodiens apprendeva
que le terra es multo plus vetuste
que su mythos sempre assereva,
e jam attingeva un etate auguste
Le realitate supera phantasia,
isto testifica le libro del natura,
plenate de dinosauros fossilisate
in petrificate perenne structuras
Non perde le spero!
Tu vale esser amate
Cata humano lo merita
Nos besonia amor e pote dar amor
Assi, quando nos nos ama,
nos da le plus grande dono
le un al altere
Sempre evita decisiones damnose,
attentemente ascolta tu anima,
illo te dicera que illo besonia
Non ascolta mal consilios,
non face folle cosas,
solmente pro esser
acceptate per alteres
Io spera que io te pote dar spero
Anque io desira amor
ma io non sape si io lo trovara
Sed spero sustene nostre vita, nonne?
Spero e amicitate
Il ha bontate in le mundo,
sed a vices con pena e patientia
tu debe cercar lo longemente
Non perde le spero!
Deman es un die nove
Subscribe to:
Posts (Atom)