Mar 13, 2012

Un purgatorio le mundo es




Un purgatorio le mundo es
Hic in foco le animas son formate
e postea indurate in aqua glacial
flagellate de ventos durante su viage
al fin illos cade e le terra los degluti

Un die circumferite de conforto e beltate
illes pote gauder se de ricchessa e amor
sed le proxime die illes deveni malade
ruinate, desperate e abandonate

In un magne ecclesia un copula sponde
fidelitate eterne le un al altere
e al placia foras del domo de Deo
sede mendicos con robas lacerate

In un appartamento in un alte edificio
sede un familia felice e canta
simultaneemente in le appartamento vicin
un viro batte e abassa su femina

Un purgatorio le mundo es
Ille qui sape isto es preparate
a caressas placente e colpos penose
a saporar le momento o escappar al memorias

Mar 12, 2012

Le arbore findite


Le arbore con duo brancas
esseva findite del tempesta

Illo ancora sta, debile
ma quanto longe?

Esque le brancas coalescera
o cadera al terra?

Io continua mi viage
ma revenira deman
con un corda in mi manos

Mar 10, 2012

Le dilemma human


Le maxime inimico
e le optime amico
del homine es
un altere homine

Mar 7, 2012

Intra me mesme


Toto lo que io besonia
es trovabile intra me mesme
Io trova in le fundo de mi anima
le calme oceano de pace
Io trova in le fundo de mi anima
le ardente sol del gaudio

Respiration es le rhythmo de mi vita
relaxate e profunde respiration
Io plena mi pulmones con aer
e mi corde con compassion

Compassion con toto vivente
de que io es un integre parte
quando io radia amor al mundo
le amor a me mesme finalmente reveni

Toto lo que io besonia
es trovabile intra me mesme
proque in le fundo de mi anima
io porta tote le amor del mundo

Mar 6, 2012

Ante le silentio


Tense como un chorda
accordate troppo alte
attachate a un violino
in improprie manos
Le archetto la abrade
e illa sona un melodia
plenate con angustia
e incessante timor
ora quandocunque
le chorda fortiate
pote esser frangite
e alora le musica
non plus sonara

Mar 5, 2012

Silente exultation del illumination


Con pensatas molle
como le folios del loto
io cautemente vole toccar
le meditative, pie aura
del sage homine
plenate con gnosis
que circumfere
le jardin japonese
con vibrationes harmonic
que dona celeste
sonoritate al quietemente
murmurante aqua del rivo
annunciante le silente
exultation del illumination
cuje semine olim
era ponite in nostre interior
e cuje crescentia es
tanto insensibile
como illo es irrefrenabile

Mar 4, 2012

Lyra a manivellar


Torna le manivella e face sonar
le stridente, susurrante tono del bordon
tocca le claves e intona un vetere
canto del epocha medieval

Canta del cavallero e le dama qui le ama
de cavalcadas nocturne trans incognite terrenos
del penose e purificante pelegrinages
e miraculos facite per Le Sancte Virgine

Canta del mercatos ruitose
venditores de pisces, carne e verduras
aromas de species e pan fresc
e grande pottos plenate con bira

Canta del vive festas regal
aurate con fanfares e sonos del harpa
del gente ridente strepitosemente
bibente vino e mangiante porco

Lassa le lyra a manivellar
translocar te al passato lontan e mystic
a un mundo desde multe seculos perite
ma su musica ancora non ha morite

Mar 1, 2012

Nostre amor es mi domicilio


Tosto io debera
lassar mi domo
mi focar e mi sanctuario
e revenir al passato

Tu partira
a un citate distante
Quando io te revidera?
Como io indurara
le menses sin te?

Io quita mi casa
ma io non relinque te
Un die nos reunira
e usque ille die
nostre amor
es mi domicilio

Feb 26, 2012

Calide Venus


Venus brilla como
un lanterna lontan
que incanta e voca
e me face suspirar

Io vole ascender
del grave terra
jacer me trans frigide
vacue spatio
sapiente que valente
io lo sustenera
reinfortiate del sperantia
del calide Venus

qui me caressara
con luce teneremente
quando io un die
planara a su suave
campo de gravitation
pro durante eones
remaner su satellite

Feb 20, 2012

Le universo comenciava un jovedi

Le universo comenciava
     un jovedi, postmeridie
          dece-tres comma septe
                  milliardos annos retro

                  Isto occurreva

                  subito, imprevistemente                      
                  primo un fluctuation
                  del quanto in le vacuo 
                  e postea un rapidissime
                  silente expansion

                  Quarks e gluones,

                              memora vos iste tempore
                                            quando vos era
                                                         calide e libere?

                                                         Isto era ante

                                                         que vos era frigidate
                                                         e incatenate
                                                         in captivitate    

                                                         durante le inflation

                                                                   initial quando le spatio
                                                                              expandeva in quasi
                                                                                            perfecte symmetria

                                                                                            e in un fraction

                                                                                            del secunda deveniva
                                                                                            dece al vinti-octave
                                                                                            potentia vices
                                                                                            major que su
                                                                                            grandor initial

                                                                                            Ma in iste symmetria 

                                                                                 se dispersava fluctuationes:
                                                                     iste semines
                                                            del futur structura cosmic

                                                           Le quarks deveniva

                                                           hadrones, leptones
                                                           e postea atomos

                                                           e le materia continuava

                                                 expander a un altissime
                                       velocitate pro plenar
                               le vacuo con spatio

                               Le resto es,

                               como on dice,
                               historia:
                               nebulosas, stellas
                               e galaxias nasceva

                               Ma nihil pote

                    esser comparate
         con le prime
tempore del pioneros

Ergo, le jovedi veniente:
que nos toasta
in Champagne!